Ading Kosinera
natipontiponda ta agkasangay ti maysa. Reunion- da kano metten nga aggagayyem ken nagkakaeskuelaan.
“Inta agtugaw idiay,” inyawis ni Martin. Intudona ti maysa a cottage nga awan nagyanna. “Kukuam?” sinaludsodko. “Saan.” “Amangan no iparitda…” “Saan.” “Kababain… Ken amangan no agungetda.” “Saan, kunak la ngarud.” Sakbay a nakapagkedkedak, ginammatanen ni Martin ti imak. Nakatultulokak met a simmurot idi iguyodnak nga inturong iti cottage.
“Ditoytan,” kinunak idi addakamin iti katengngaan ti rangtay. Nagtugawak iti ngarab ti rangtay sa inay-ayamko ti danum babaen dagiti sakak. Immabay kaniak ni Martin. “Napintas met daydiay nobiam,” kinunak iti makaplastar. Diak tinaliaw, ngem mariknak a kitkitaennak. Mariknak no adda mangkitkita kaniak. Diak la ammo no kastakami amin a babbai.
Naggarakgak ni Martin. “Mamatika met. Kasdiayna laeng daydiay kaniak. Nasinged. Nobiona daytay nangsallabay kenkuana.”
Tinaliawko iti apagbiit sa met laeng insublik dagiti matak iti danum nga ay-ayamen dagiti sakak. “Naimbag man ta saan a gumura? No umarakup kenka…” “Naruamen. Sa awan met malisiana… Nakitam met.” Saan a kasta ti panagkitak itay damo. Naamirisko laeng a kasta itay ibaga ni Jennifer nga umadu ti nobia ni Martin a dina ammo no dina armen dagiti mayat kenkuana.
“Naalas latta a kitaen nga umar-arkup iti sabali ti babai nga adda gayam sabali a nobiona,” insintirko. “Kanayon ngarud nga ipalagipko ngem di met dumngeg.” Nariknak met ketdi a naawaten ti lalaki a kasta ti pannakilangen ni Jennifer ken ni Martin. No sabali la ngata, agapadan. Naidumduma a panagayat.
“Ngem talaga a rantam nga armen idi?” naladawen idi maamirisko a saan a mainumo ti saludsodko. Pinengdak ket nakagatko la ket ngaruden ti dilak. Inkarigatak ketdi a pinerreng ita.
Addayta manen ti mababain nga isemna a binulonanna iti panangkudkodna iti teltelna.
“Yar-arit dagiti kaeskuelaanmi idi. Nadlawko a kayatnak ngem naammuak a nabayagen nga ar-armen ni…” “’Tay gayyemna?” Nagtung-ed. “Idi kuan, ibagbagana metten a nobionak. A sinungbatannak uray diak inarem.” Nagkatawa. “Manipud idi, simmingeden ti langenlangenmi. Kasla agkabsatkamin idi agangay.” Siak met ti napaisem. Adda gayam babbai a kasta. “Pudno, aya, nga adda madebelop nga ayat?” Pinerrengnak ni Martin. “Nabayagen nga ikarkararag ken inar-arapaapko a sapay koma ta kasta… Ta adda ay-ayatek a di met makarikna iti ayat kaniak…” Nagulimeken. Imbabana ti panagkitana iti danum. Saanak a nakatimek. Siak ngata ti ibagbagana? Pinalpaliiwko ti garawna. Inur-urayko ti panagtimekna manen. Ngem diak nauray. Kasla nakipinnatelleng, makipimpinnaliiw. Ket immilet ti lubong iti panagriknak. Kasla mangngegko pay ti panagpitik ti pusonan. Ti uni ti danum a rawrawrawen dagiti sakak, kasla paturogenna ti riknak ket pilpilitennak nga agarapaap.
Nadlawko a dimmenden ni Martin. Nagtilmonak iti dakkel. Diak ammo ti aramidek. Rirriribuken ti riknak ti panunotko.
(Maituloyto)