Kudeta (49) Norberto D. Bumanglag, Jr.

“Rinaraemka ta impagarupko no maysaka kadagiti babbai a narimat ti masakbayanna iti politika. Diak ammo a kastoy ti kinababam.”

Ti Napalabas: Nagturongen ti Presidente iti kapitolio. Nakapuesto metten dagiti tao ni Agent Stewart agraman dagiti sniper iti Central Hypermart ken iti pasdek ti banko iti asideg ti kapitolio. Nagpuesto met da Ricky iti ngato ti kapitolio. Agbitbitlan ni Presidente Acosta idi paltoganda. Insalakan ni John. Pinaltogan met ni Ricky dagiti sniper a CIA. Agturongdan iti kapitolio idi malagip ti Presidente ni Gloria. Idi kuan, dimteng ni Gloria nga adda palpaltoganna. Inkeddeng ni John a da laeng Gloria, Jay-ar, ti Presidente ken ti inana ti agtuloy nga aglibas iti tunnel ta tulonganda dagiti PSG. Ngem inturong ni Gloria ti Presidente ken ni Anwar. Naragsakan ni Gen. Miguel. Kayat ni Anwar nga iwaragawag ti Presidente Acosta ti pannakayallatiw ti turay ken ni Gen. Miguel ngem di kayat ti Presidente. Babaen ken ni Deputy Bosworth, naammuan ni John a baluden dagiti kalaban ti Presidente. Inkeddengna a rautenda ti warehouse. Ngem awan tao a nadatnganda. Rummuarda koman idi adda mapayat ni Jerky a booby trap.

N(Maika-49 a Paset) AGKINTAYEG ni John a nakangngeg iti ikkis ni Jerky. Tinaliawna daytoy. Saan nga agkutkuti iti nagtakderanna. Binilinna dagiti kakaduana a rummuarda iti warehouse, sa nagtaray nga immasideg ken ni Jerky. Saan a nagtungpal da Daniel, Ricky, ken Melanie iti bilin ni John. Immasidegda ketdi met ken ni Jerky. “I told you to get out of here!” makaunget a kinuna ni John. “Diak pumanaw a diak kadua ti gayyemko,” kinuna ni Daniel. “We live and die together,” kinuna met ni Ricky. Saanen a nagtimek ni John. Inamirisna ti booby trap a badbaddekan ni Jerky. Ni Melanie, nakaturong dagiti matana ken ni John. Napino a waya ti nabaddekan ni Jerky. Naikamang daytoy iti sangabunton a dinamita nga uray ti kaguduana ngata laeng, umanayen a manglasanglasang iti sibubukel a warehouse. Ken sigurado a matayda nga uppat no mapalusposan daytoy.

“Sumapulka iti nadagsen a banag, Daniel,” immandar ni John. “Daytay agdagsen iti nasursurok ngem 50 a kilo.”

“Dayta!” Intudo ni Melanie ti lamisaan a landok sakbay a nakapagkuti ni Daniel.

Nagtitinnulonganda a binagkat ti lamisaan. Inyasidegda ken ni Jerky. “In-inayad laeng,” impalagip ni John. Imbag-ut ni Daniel ti bangir ti lamisaan, sa ingguyodna. Ngem adda natarumamis a banag a naitudok iti ramayna ket naibbatanna ti lamisaan.

Natupakan ti saka ti lamisaan ti waya. Napugsat ti waya!

Nagkintayeg ni John! “Gammatam dayta waya!” kinunana.

Agdardara ti ramay ni Daniel ngem ginammatanna ti napino a waya. Inkatikatna daytoy iti dakulapna. “Sorry,” kinunana.

Naparasaw ni John. Kinitana ti kaadayoda iti ridaw. Awanen ti sabali pay a pamuspusanda no di ti tumarayda a rummuar. Ngem agpannuray ti namnamada a makalasat iti paspasda a tumaray.

“Kasano ti peggesyo a tumaray?” sinaludsod ni John kadagiti kakaduana.

“Nataraykami,” dandani naggiddan da Daniel ken Jerky a simmungbat.

Kinitana ni Melanie. “When I say, run, we’ll run together!” kinunana. “This will be the fastest run you’ll ever do in your life. Do you, guys, understand?” Nagtung-ed da Daniel ken Jerky. “Okay, ready...” Sinaggaysa ni John a kinita dagiti kaduana. Nagtung-ed dagiti tallo. “Run!” Ket nakapaspaspasda a timmaray. Idi asidegdan iti ridaw, insuyodan dagiti bagbagida iti ruar. Isu met ti panagbettak ti warehouse.

MATMATMATAN ni Rommel ti langana iti sarming. Adu ti garadgad iti rupana. Nagasat ta isu laeng ti dunorna idinto nga adda dua a natay ken adu ti nayospital kadagiti kakaduana a mayor. Milagro ketdi ta dua laeng ti natay. Kalpasan ti pannakapuersa a pannakalukat ti ridaw, nakaparpardasda a timmaray. Agingga iti nasarakanda ti agdan nga agturong iti basement. Kadakuada nga immuna, nagasatda. Garumiad laeng ti ginanabda. Dagiti naud-udi, nakaro dagiti sugatda ket kapilitan a naipanda iti ospital.

Kasla saan pay laeng a mamati nga adda makaitured a mangpapatay iti Presidente. Nabayagen a tabtabutaben daytoy ti kaadda ti gagem ti Oposision a mangpatapuak iti daytoy iti puesto ken mangisikat iti biagna. Impapanna a

pangperperdi laeng ti Presidente iti Oposision dayta tapno ad-adda pay a kaasian ken suportaran dagiti tao.

Ita, awan ti makaammo no ania ti napasamak iti Presidente. Ngem maymaysa ti nabatad kadagiti damdamag. Ni John ti mismo a nangisalakan iti Presidente idi paltoganda. Asino kadi a talaga daytoy a kasinsinna? Masmasdaaw unay. Nangruna ta kellaat a nagparang ni Melanie a ninamnamana a natayen. Ita, nagbalinen a komplikado ti kasasaadna. Agpeggad ken ni Melanie. Adu unayen ti ammo daydiay maipapan kadakuada. Ammo daytoy ti kaadda ti warehouse a nakaidagumpuan ti adu a droga. Nakita payen daytoy ti nalimed a laboratorio ti shabu iti basement ti warehouse. Pinarparigat ken ginandatda pay a patayen. No agipulong kadagiti pannakabagi ti linteg, ditan nga agpatingga ti kinabileg ti pamiliada. Sigurado a maikkat a mayor. Tiliwen ida dagiti pannakabagi ti linteg. Dadaelenda ti warehouse.

Ngem dina ipalubos dayta. Matay nga umuna ni Melanie sakbay nga adda maaramid daytoy a pakadadaelanna.

Ngem ammonan ti kinapeggad daytoy a babai. Nalaing a makilaban. Nalaing a pumaltog. Ken no awan inalatna, kasano a nakalasat iti napalalo a panangdusada idi? Ngem ita, unaandan. Didan balballaagan. Natoktok ti ridaw. Ammona a ni Jasper a taona, dayta. Ur-urayenna daytoy.

Nagturong iti ridaw. Simmirip iti peep hole sa inlukatna. Nakaabaday ni Jasper iti atiddog ken dakkel a bag.

“Adda met laeng ti kasapulak?” sinaludsodna a dagus apaman a nailukatna ti ridaw.

“Adda, mayor,” kinuna ni Jasper. Simrek daytoy sa inawidna nga intangep ti bulong ti ridaw.

Nagturongda iti lamisaan. Indisso ni Jasper ti bag. Inlukatna ti siper daytoy ket napagrang ti dua nga M-4 ken sumagmamamno a hand gun ken adu a bala. “Mano a tao ti maukkonmo?” sinaludsodna. “Sangapulo, mayor... “Nagtung-ed ni Rommel. “Sigudda a soldado, mayor. Ekspertoda kadagiti paltog. Nakilablabanda payen kadagiti rebelde idiay Mindanao.”

“Good. Ngem ammom ngata metten ti kabaelan ni Melanie.” “Ammok, mayor.” “Kasla ‘ wild wild west’ ti situasion ti pagiliantayo ita. Sigurado nga ad-adu manen ti pinnatay. Dayta ti kasapulantayo iti daytoy a gundaway... Siimenyo dagiti gunay ni Melanie...”

“Sigurado a makikuykuyog latta ken ni John Villa, mayor.” Nagtungtung-ed ni Rommel. “Mabalin...” “Ket ania ti aramidenmi ken ni John Villa, mayor? Target kadi met?”

TIMMAKDER ni John apaman a naiwalinna dagiti naipandag kenkuana. Naimbag ketdi ta babassit a no ania la ditan a minekmek ti bomba. Makapauyek ti asuk ken ti bang-i ti napuoran a warehouse. Riniknana ti bagina. Awan mariknana a nasakit. Inamirisna ti pakabuklanna. Awan sugatna.

Nakatakder metten da Daniel, Jerky, ken Ricky. Ni laengen ken Melanie ti nakapakleb pay laeng ken kasla naipasarubsob iti daga.

Nagparintumeng ni John. Sinagidna ti abaga ni Melanie. “Are you okay, hon?” sinaludsodna.

“I’m okay... just don’t touch me,” kinuna ni Melanie.

Saan a naguni ni John. Ammona a nasakit ti nakem ni Melanie kenkuana gapu ken ni Gloria. Timmakder sa nagturong iti van. “Let’s go, Melanie,” kinuna met ni Ricky. Timmakder ni Melanie. Nagturongdan iti van. Nakiabay ken ni Jerky. Agmaymaysa ni John iti likud.

“Papanantayo, Mang John?” sinaludsod ni Daniel idi rummuardan iti kalsada.

Immanges iti nauneg ni John. Sadino? Dina ammo. Awan pamalpalatpatanna no sadino ti nangipanan dagiti kabusor iti Presidente, ti inana, ken ni Jay-ar. Dina pay ketdi ammo no sibibiagda pay wenno saanen.

“Diak ammo. Awan ammok a mabalinda a paglemmengan.”

Nagari ti ulimek iti nagbabaetanda.