Pan de Amor (18) Cris J. Dacuycoy
Ti uni ti danum a rawrawrawen dagiti sakak, kasla paturogenna ti riknak ket pilpilitennak nga agarapaap.
Ti Napalabas: Simmangpet ni Amor iti Pakni ta umayna bangonen ti nalugi a panaderiada. Nagpatulong ken ni Miggy. Kinasaritana ni Martin a kinaeskuelaanna idi ta isu ti mangbangon. Agkonkontrata daytoy iti mapatakder a balay ken inrapinna ti nagbasa. Insingasing ni Martin a panagananna iti Pan de Amor ti panaderia. Kinontra ni Anti Lucia ti plano ni Amor ket pati pagdissuanna. Pasaray idildilig ni Amor ni Martin ken ni Miguel a nobiona idiay Spain. Inkeddeng ni Amor a pabendisionan ni panaderia. Kas nayon ti saganada, nagdudolda. Dandanin maluto daytoy idi adda nagubor. Napuntaan ti saka ni Amor ket limteg. Inablon ni Martin. Impudno ni Amor ken ni Martin nga adda nobiona idiay Spain, ni Miguel. Impaw-it ni Miguel ti dati nga engagement ring-da ken imbaga daytoy a sumarunonton. Napanunot ni Amor a padalusan ti dati a bakery-da ta isu ti pagyanan ni Martin. Pinadasna met ti nagpalako iti tinapay kadagiti ubbing. Idi kuan, dimteng ni Anti Lucia. Sinalangadna ni Amor. Nagsangit ni Amor ket inubor ni Jacko ti balay da Anti Lucia. Kabigatanna, impakammo ti kapitan a nagreklamo ni Anti Lucia ta pinaltoganda ti balayda.
I(Maika-18 a Paset) NIBBATAN ti babai ti tengnged ni Martin sa immarakup iti baro nga agkikiad.
Kasla masinsinit met ni Martin a nangakkal iti ima ti babai iti siketna. Agarup induronna daytoy ngem idi malasinnan sa, immisem met laeng. “Jennifer?” kinunana a masmasdaaw. “Wen, siak! Apay, ‘ya, a kasla budobudoak a kaariekmo unay?” agkatkatawa ti babai a nagkuna.
“Saan met a kasta, sika met. Nakaad-adu a tao… dika la mabain.” Nadagsen ti timek ni Martin ngem saan met a makaunget. Nagkatawa pay ketdi.
“Dati met nga ar-aramidek ti kastoy, a?” Naginmimisuot ti babai.
No sabali laeng ti mangkita, sigurado nga agkatawa ta awan dumana nga aggargaraw iti sidekick ti bida a babai iti pelikula. Kinapudnona, aggagaratigiten dagiti bababi a kakaduana. Mayat met ti katkatawa dagiti lallaki isu nga ipagarupko lattan nga agaammoda. Ngem kasla makasuronak a mangkita iti araramidenna. Napintas pay met ngarud.
“At saka dyowa kita, wala silang pakialam kung gagahasain