Sika ken ti Tarakenmo
Awan sabali a maibagasan iti rupa dagiti mannursuro no di panangay-ay ken ni Ma’am Floring.
Nabayag a di nagun-uni ni Ma’am Ellen ta amangan no dina materred ti bagina ket agsangit. Nagulimek met dagiti mannursuro.
Madamdama pay, nakaawat iti text message ni Ma’am Ellen manipud iti Superbisor.
“Kayat ti SDS nga intayo idiay District Office. Kayatnatayo kano a kasarita…” kinunana apaman a mabasana ti mensahe. Kinitana ni Ma’am Floring nga awan latta nagbaliwan ti langana. Kasla awan aniamanna iti daytoy ti naawatda a damag.
Madamdama pay, adda manen simmangpet a text message. Ti mensahe ti nagpulong. Ipatulod koma kano ti nagpulong ken ni Ma’am Ruby ti reklamo ta aggayyemda ngem ti SDS met ti nakaipatulodanna.
Kinita manen ni Ma’am Ellen ti numero ti selpon. Immanges iti nauneg.
Nagpanunot. Innalana ti selponna. Inserrekna dagiti numero ket napamulagat iti nakitana.
“Mabalinyon ti agsubli kadagiti kuartoyo,” kinuna ni Ma’am Ellen, “ngem agbatika koma pay laeng, Ma’am Floring.” Agduduma ti rikna dagiti mannursuro a rimmuar. “Ala, ungtannakon. Naalas ta bakbaketanakon ngem basolko, a, ta dika dinengdengngeg…” kinuna ni Ma’am Floring.
Imbes nga agsao, inarakup ketdi ni Ma’am Ellen ti antina. Agsangiten.
“Impagarupko la ketdin no dakayo ti nagreklamo, anti. Nasakit kaniak a maung-ungtankayo ta dakayo ti nangpabpabasa kaniak ken nangibagbaga idi a masapul nga agbalinakto koma met maestra a kas kadakayo. Dakayo idi ti torre iti imatangko.”
Nasdaaw ni Ma’am Floring. “Asino ngarud ti kunada nga agrekreklamo no saan a siak?”
“Saanen a nasken a maammuanyo, anti. Ti nasken, saan a dakayo. Sapay ta naadalankayon.” “Ni Evelyn?” Saanen a simmungbat ni Ma’am Ellen. Ngem inasitgan ni Ma’am Floring. “Kastoy, anakko,” kinunana. “Mabalin nga ungtannakanto ni Apo Superbisor inton agkitakayo. Ngem nasken koma a maawatam ti pagsasaadaana isu a dimonto koma kagura. Ti tao nga adda iti tuktok ti torre, adu ti responsibilidadna, isu nga adu ti pakabuongan ti ulona. Bareng adda kaasi ti Apo ta makadanonkanto met iti puestona. Maawatamto amin ti ibagbagak.” Ad-addan a saan a nakauni ni Ma’am Ellen. “Ket ni met Evelyn, ti la ibagbaga dagiti kamaestraantayo ket isu ti kaadda ti pabpabasaenna a tallo nga annakna. Ngem dida met dakamaten a nabiit pay a pimmusay ni lakayna iti sakit ti puso. Nagadu a nagastona iti ospital. Ket ti buridekna?”
Idi laeng a nalagip ni Ma’am Ellen ti buridek nga anak ni Ma’am Evelyn. Babai nga agtawen iti uppat. Adda sakit ti puso daytoy. Natawidna kano iti amana.
“Agasem ti inaldaw nga agas ‘diay ubing? Nailumlomen ni Ma’am Evelyn kadagiti asino ditan a mabalin a pagutangan dagiti mamaestra. Ngem iti laksid dagitoy a problemana, aggapu pay laeng iti klasena dagiti ubbing a maipatpatulod a makisalsalip idiay rehion ket sigurado a kumaut latta met iti bolsana! Agasem dayta, anakko? Isu a ditay mapabasol ni Ma’am Evelyn a ti tunggal sentabona, nakapatpateg. Ken no agsao man, maigapu aminen dita iti bukodna met a pakaburiboran nga adda iti baba ti torre a kas iti bukod met a pakaburiboran ni Apo Superintendente nga adda iti tuktok ti torre.”
“Wen, anti,” nakuna laengen ni Ma’am Ellen. Wen, ammonanton ti aramidenna inton agkitada iti superintendente.—O