Ti Gasatmo Ita a Lawas
GIMMANAR ti “Mary, Marry Me” a pelikula da Toni Gonzaga-Soriano ken Alex Gonzaga. Daytoy ti inako ni RC Delos Reyes a direktor ti nasao a pelikula.
Ket gapu ta gimmanar, masunotan kadi ti pelikula dagiti agkabsat?
Kuna ni Direk RC a saan pay kadagitoy. Adda ngamin nakalinia a pelikula ni Alex iti Viva Films. Segun iti direktor, makapareha ni Alex ni Xian Lim.
*** Iti maysa a pasken, kinuna ni Piolo Pascual nga awan ti suportaranna a kandidato iti daytoy masungad nga eleksion, agpapan pay personal nga agpatulongda kenkuana. Para kenkuana, tumulong laengen iti sabali a wagas imbes nga iti politika.
Impasimudaag met ni Piolo nga adda aramidenna a pelikula iti katengngaan daytoy a tawen. Nupay dinakamatna a maysa romantic-comedy, dina naagapad no asino ti kaduana iti daytoy a pelikula nga iprodius ti Star Cinema.—O AQUARIUS (Enero 20- Pebrero 19). Palagipannaka ti paniempo a masapul nga aywanam ti salun-atmo ken ipangrunam ti pagimbagan ti rikna ken panunotmo. Maamirismo a nupay nasirut ti kammayetyo nga agkakapamilia, ad-adda latta a sika ti mangkitkita iti pagsayaatan ti bukodmo a bagi. Nagasat a numero: 2, 6, 9. PISCES (Pebrero 20- Marso 20). Adda dagiti pasamak a mangIpalagip kenka a masapul nga ipangrunam met dagiti bambanag a mainaig iti panangpatan-ay iti bukodmo a biag. Nupay kasta, dimo maliklikan a nanamen ti sam-it ni ayat. Nagasat a numero: 3, 4, 7. ARIES (Marso 21- Abril 20). Magagaranka a mangpadas iti maysa a banag a dimo pay pulos napadpadasan. Kasta met a makagtengka iti maysa a disso wenno lebel a dimo ninamnama a magtengmo. No di am-ammo ti mangibaga a nakapsutka, saan a sika ti dakdakamatenna. Nagasat a numero: 1, 5, 8. TAURUS (Abril 21- Mayo 20). Iti pananggun- od kadagiti arapaap, masapul a bigbigen a masapul nga agtignayka a para kadagitoy, nga iturong ti imatang kadagitoy, ken mangisayangkat kadagiti napateg nga addang tapno magun- od dagitoy. Nagasat a numero: 3, 4, 7. GEMINI (Mayo 21- Hunio 20). Posible a dumteng ti panagbalbaliw no rugian iti bukodmo a bagi. Mabalin met a padasen a tingitingen ti biag wenno dagiti bambanag kadagiti nadumaduma a perspektibo. Dagiti pammati wenno prinsipio, bagnos dagitoy iti panagbiag, saan ket a pangibusbosan iti biag. Nagasat a numero: 2, 5, 9. CANCER (Hunio 21- Hulio 20). Ad-adu ti magapuanan no in-inayad ken naannad nga aramiden dagiti bambanag. Adda dagiti masayang no piliten ti bagi, no ibusen ti enerhia, wenno no bennaten ti anus. Kunada ngarud a ti naanus, makagun- od. Nagasat a numero: 1, 6, 8. LEO (Hulio 21- Agosto 20). Ad-adda a napartak ti pannakairingpas dagiti aramid no agpannuray iti bukod a kabaelan, nangruna no ti mangtignay kenka ket ti kalikagum a para daytoy iti pagimbagan ti ad-adu. Nagasat a numero: 2, 5, 9. VIRGO (Agosto 21- Septiembre 22). Masansan a pakairubuan laeng ti tsismis. Ad-Adda a produktibo ken umisu no kasarita mismo ti maysa a tao a mainaig iti maysa a banag. Iturong ti imatang iti isyu, saan ket nga iti personal a kabibiag ti maysa a tao a saan met nga agkasapulan iti tulong kenka. Nagasat a numero: 3, 4, 7. LIBRA (Septiembre 23- Oktubre 22). Kadagiti tiempo a makatikaw dagiti situasion, saanka koma nga agbabain a dumawat iti tulong. Adu dagiti nakasagana a tumulong kenka ta idi pay a kayatda met ti makabayad iti utang a naimbag a nakem kenka. Nagasat a numero: 2, 6, 8. SCORPIO (Oktubre 23- Nobiembre 22). Panagbalin laeng nga optimistiko ti masapulmo tapno nadardaras a maileppasmo ti aramidmo. Maysa a pagayam a nabayagen a di nakomusta ti manglukat kenka iti maysa a tawa ti oportunidad. Nagasat a numero: 1, 4, 7. SAGITTARIUS (Nobiembre 23- Disiembre 20). Dagiti kabaruanan a teknolohia, makatulongda kenka nangruna no usarem iti nakaisangratanda. Masansan a masayang ngamin dagiti oportunidad gapu iti panagpakutibengmo. Nagasat a numero: 3, 5, 9. CAPRICORN (Disiembre 21- Enero 19). Magun- odmo ti talinaay ti panunot ken rikna itoy a lawas. Adda dagiti saan a kasapulan iti biag a nasken nga ibbatanen; makatulong ketdi iti sabali no itedmo kadakuada dagitoy. Ad-adda a naragsak no addaanka laeng iti umdas a para kenka. Nagasat a numero: 2, 6, 8.