Ti Kayo a Nagbunga iti ‘Babassit a Bituen’
IDI un-unana a panawen, adda agnaed iti igid ti kabakiran nga ubing a babai ken ti apongna a baket. Nakurapayda ket makurkuranganda iti pagbiag ken uray pay aruaten. Iti maysa nga aldaw, a rugi ti nalamiis a panawen, napan iti kabakiran ti ubing tapno agala iti kayo a pagsungrod nga ilakona iti kabangibang nga ili. Adda balonna a maymaysa a tinapay, adda kagayna a nayon ti bado ken kamisonna a pangsanggana iti lamiis.
Ngem apagserrekna iti kabakiran, nakasabat iti ubing a lalaki. Basbassit pay ngem isuna ken agsangsangit. “Apay nga agsangsangitka?” sinaludsod ti ubing a babai. “Mabisinak la unay,” kinuna ti ubing a lalaki. “Idi pay la rabii nga awan ti kinnanko.”
Naasian la unay ti ubing a babai ket intedna ti kakaisuna a tinapay a balonna koma. Mabisinak nga agpayso, ngem nakarkaro pay ti bisinna, nakunkunana iti panunotna.
Bayat ti yuuneg ti ubing a babai iti kabakiran, nakasabat manen iti ubing. Ubing a babai a kas kenkuana ngem rutayrutay ti kawesna. Agpigpigerger iti lamminna.
Malamminak, ngem lallalo pay ti lamminna, nakuna ti ubing a babai iti bagina. Ket intedna ti badona iti ubing a rutayrutay ti kawesna. Agingga iti nakadanon ti ubing a babai iti lugar a pangaywanna. Ngem addan nakauna kenkuana. Maysa a baket a kubbo, langana ti nakakaasi ken nakakapkapsut. Kakaasi nga agur-urnong kadagiti nagango a sanga ti natuang a kayo. Agpigpigerger pay iti lamminna.
Nalagipna ni apongna a baket ket simken ti napalalo nga asina iti baket. Tinulonganna nga agurnong iti pagtungo agingga iti addan umdas a kaadu a kabaelan ti baket a kargaen. Kalpasanna, intednan ti kagayna iti baket.
Nabati ngarud ti ubing a babai a ti laengen naingpis a kamisonna ti adda kenkuana. Ngem saan a nakarikna iti lammin ken uray pay bisin gapu iti ragsakna a nakatulong. Pinidutna dagiti nabatbati a sanga ti kayo a mabalinna a yawid. Ket idi addan iti dalanna nga agsubli iti kalapawda ken apongna a baket, isu met ti pannakasabatna iti maysa a lakay a nakasarukod ken kakaasi a magmagna.
“Apok,” kinuna daytoy, “itedmo kad’ laengen kaniak dagita pagsungrod a bakruymo ta diakon kabaelan ti umuneg pay iti kabakiran.”
Nakayanakanna ti kinamanangngaasina, inyawat ti ubing a babai dagiti bakruyna a pagsungrod iti lakay. Ngem apagyawatna kadagitoy, kellaat a nagbaliw ti langa ti lakay. Nagbalin daytoy nga anghel a nakarangrangrang iti badona a puraw.
“Sika ti nakaaramid iti bilin ti Apo a mangpakan iti mabisin ken mangkawes iti awanan aruaten ket saan a mabalin a dika maikkan iti gunggona,” kinuna daytoy iti ubing. “Kitaem dayta kayo iti abaymo. Purosem amin a bungana ket yawidmo iti kalapawyo ken apongmo a baket.”
Idi laeng a nadlaw ti ubing ti bassit a kayo iti asidegna. Adu ti bunga daytoy a kasla makan. Tinungpal ti ubing ti bilin ti anghel; pinurosna dagiti bunga ket inkargana iti gayadan ti kamisonna. Idi makapagyaman iti anghel, nagawiden.
Siraragsak ti apong a baket ti ubing a nangsarabo iti apokona nupay nakitana nga awan karga daytoy a pagtungo. Ngem anian a siddaaw daytoy idi bukraen ti apokona ti gayadan ti kamisonna nangikargaanna kadagiti kuna daytoy a kanenda a bunga, ta saan metten a bunga dagitoy no di ket alahas a nagkaadu a dagiti batoda, agrimatrimat a kakasla babassit a bituen.
Inlako dagiti agapo dagiti alahas ket manipud idi, nagbiagdan a nasaliwanwan. Daydi met kinamanangngaasi ti ubing, saan a nagkupas ta nagtultuloy ti panangsarsaranayna kadagiti agkasapulan.—O