No Adda Sigsigloten, Adda Met Warwaren
I DI naminsan a bulan, kas empleado, imbaonnak ti Munisipio ti Piddig, Ilocos Norte a mapan agatendar iti seminar maipanggep iti Values Formation iti Northview Hotel iti Laoag City nga inisponsoran ti Philippine Rural Development Project - Regional Project Coordination Office ti Department of Agriculture ti Rehion I. Adda dinamag ti maysa kadagiti lektiurer kadakami a nakipartisipar.
Aniat’ Aramidem?
No adda napidutmo a bag a naglaon iti kuarta nga agbalor iti makatawen a sueldom, aniat’ aramidem? Ipulangmo kadi wenno tagikuaem ta awan met pagilasinan no asino ti akinkukua?
Iti daytoy a dinamag ti lektiurer, napanunotko ngarud ‘tay ugalitayo a Filipino a no addatayo iti ruar ket makakitatayo iti sensilio iti kalsada, piduten ken ibolsatayo sa kunatayo: “Suerteak!” Pisos man wenno binting, dies ken lima a sentabo, ibolsatayo. Araramidek met daytoy. Adda pay dagiti gundaway a makapidutak iti lima a pisos kada sangapulo a pisos. Ibolsak no kua dagitoy ta suerte ngarud. No ngay P1-milion iti mapidutko iti kalsada, ibolsak kadi ta suerte met dayta?
No saan, kunayo (uray siak, saan kunak met), ania ngamin, aya, ti pagdumaan ti mapidut a sangapulo a pisos wenno pisos iti mapidut a maysa a milion? Idi agtrabtrabahoak pay laeng idiay Manila, adda dagiti tattao a no makapukawda iti binting, saandan a makaawid ta umdas laeng ti balonda a kuarta a pagpleteda. Apay ngarud a ‘diay napidutko a binting (nga ammok nga adda agkasapulan), diakon ipulang ngem ‘diay maysa a milion ket ipulangko?
Kadagitoy a senario, agpada a saanko a sanikua dagitoy a kuarta. Ti laeng nagdumaanda ket ti kantidad.
Aniat’ Isurok?
Ita ta adda ni Uno iti biagko, ania ngarud iti isurok iti anakko a galad maipanggep kadagiti mapidpidut a kuarta? Adda nabuyak a documentary maipanggep iti neighborhood
police wenno koban sadiay Japan. Idi 2013, agdagup iti dandani US$30-milion ti dagup ti kuarta a napidot ken insubli dagiti Hapon iti koban. Adda met proseso a sursuroten dagiti polis iti Lost and Founce Center-da.
Amin a banag, kuarta man wenno saan, a maipulang iti koban ket mai- log in (mailista) ken maikkan iti tag. Isu a no adda man napukawmo sadiay Japan, bisitaem a dagus ti website ti Lost and Found Center ket dandani 75 a porsiento a mabirokam ken maisubli ‘tay napukawmo.
Gapu ta awan met kastoy a sistematayo ditoy Filipinas, saanko ngarud nga isuro ken ni Uno a no adda mapidutna a sensilio iti kalsada, nasken a mapanna ited iti kaasitgan nga estasion ti polis. No adda man mapidutna a sensilio wenno papel de banko iti kalsada, ibagak kenkuana nga ipisokna dagitoy iti naisangsangayan nga alkansia ta inton makaurnong iti adu, kaduaekto a mangidonar iti iti daytoy iti Red Cross wenno iti ania man a foundation wenno charitable organization.
Dakayo, kakabsat, ania iti aramidenyo iti mapidutyo a bag a naglaon iti kuarta nga agbalor iti makatawen a sueldoyo wenno iti posible a maapityo iti uneg ti makatawen?—O No adda kayatyo a damagen wenno adda komentoyo, ag-PM-kayo ken ni Anna Liza iti www.facebook.com/annalizamgaspar.-- Editor