Pan de Amor (22)

Diak napupuotan nga inangot ti rakrakepek gayamen a sabong ti rosas nga intedna.

Ti Napalabas: Simmangpet ni Amor iti Pakni ta umayna bangonen ti nalugi a panaderiada. Nagpatulong ken ni Miggy. Kinasaritana ni Martin a kinaeskuelaanna idi ta isu ti mangbangon. Agkonkontrata daytoy iti mapatakder a balay ken inrapinna ti nagbasa. Insingasing ni Martin a panagananna iti Pan de Amor ti panaderia. Kinontra ni Anti Lucia ti plano ni Amor ket pati pagdissuanna. Pasaray idildilig ni Amor ni Martin ken ni Miguel a nobiona idiay Spain. Impudno ni Amor ken ni Martin nga adda nobiona idiay Spain, ni Miguel. Impaw-it ni Miguel ti dati nga engagement ring-da ken imbaga daytoy a sumarunonton. Napanunot ni Amor a padalusan ti dati a bakery-da ta isunto ti pagyanan ni Miguel. Inubor ni Jacko ti balay da Anti Lucia. Nagreklamo ni Anti Lucia ta pinaltoganda kano ti balayda. Napan da Amor ken Martin idiay karayan. Pinasukonda ida ta addan ni Miguel. Imbaga ni Martin ken ni Miguel nga agar-arem ken ni Amor. Saan nga inannugot ni Amor dayta. Ket iti rabii, nasangailina ni Martin nga adda iggemna a sabsabong. (Maika-22 a Paset)

“SUTILKA a talaga, ania?” kinunak. Inaplawak. Nasarangsang ti katawak a diak ammo ti naggapgapuanna. “No inka agpasiar ket dimmagaska laeng nga umay mangdamag no okey met laeng ti suotmo, inkan… ayos daytan. Naguapokan. Sungbatannaka a dagus ti ar-armem itan.”

Agpayso ti kinunak a naguapo. Naidumduma ti kinataer ni Martin iti panagkitak ita. Siguro, gapu ta ita laeng a makitak a napintas bassit ti kawesna. Saan a kas iti nakairuamak a makitkita a para taltalon ken para konstruksion laeng ti aruatenna.

“Ditoy ti talaga nga umayak!” Nagkatawa. “Agtalnaka man, da!” Agkatkatawaak a nangiwagis iti panagpanawna. Ngem dandani natilmonko ti angesko ta inyawatna kaniak dagiti rosas nga iggemna. Napaumelak. Naperrengko ni Martin. Nakipinnerreng.