Siled ti Kararag
Basaentayo ti Taga-Roma 12:9-17:
“Nabara koma ti panagiinnayatyo a kas agkakabsat ken ni Kristo, ket nareggetkayo a mangipakita iti panagraemyo iti tunggal maysa.—Taga Roma 12:10 B
AYAT ti kaaddak iti maysa a restauran, adda nakitak a maysa a grupo nga agkarkararag sakbay ti pannanganda. Ngem ti nakakaskasdaaw ket ‘diay simmaruno a napasamak. Naregreg ti maysa nga agserserbi kadakuada ti maysa a pinggan nga adda taraonna iti saklot ti maysa a nasayaat ti panagkawkawesna a babai. Ngem imbes a makaunget wenno paawaganna ti manedier, impanamnamana iti madandanagan nga agserserbi nga awan aniamanna ti napasamak.
Pinampanunotko daytoy iti sumagmamano nga aldaw. Impakita daytoy a grupo ti pammatida babaen ti panagkararagda iti panganan. Ngem ti kangrunaanna, ti kinamannakaawat ti babai iti agserserbi ti nangipakita iti pammatina. Dayta a kinasayaat ti nakita dagiti adu a mangmangan iti dayta a panganan.
Pinampanunotko daydi nga aldaw ken no kasano ti kinapateg ti kinamanagayat ken kinasayaat iti pada a tao iti Nakristianuan a biag. Nupay kasta, nalaka daytoy a panunoten ngem narigat nga aramiden. Okuparen ti panunottayo dagiti trabahotayo, dagiti annak, pagrebbengan ken pamiliatayo ket malipatantayo nga ipakita dagitoy nga aramid.
Ikarkararagko a dagiti tattao makitada koma ni Kristo kaniak a kas iti pannakaimatangko ken ni Kristo iti daydi a grupo iti daydi a panganan. Iti inaldaw, mabalintayo a palubosan ti lawag ni Kristo nga agraniag babaen kadatayo. Kararag: Managparabur a Dios, aglawagkami koma iti inaldaw babaen ti lawagmo. Amen. Kapanunotan: Ania iti maaramidak ita tapno agraniag ti silaw ni Kristo iti lubong? Ikararagan: Dagiti agserserbi iti restauran.