Idi Un-unana a Panawen
IDI un-unana a panawen, iti maysa a pagarian, adda higante a kaay-ayona ti agsida iti tao. Imasen la unay daytoy a higante ti dinardaraan a tao. Adun a wagas ti impakat dagiti tattao iti pagarian tapno mapatayda ti higante ngem saan met a kumna daytoy kadagiti pana wenno pikada.
“Sayonto la mapatay ti higante no maammuanyo no yan ti pusona,” imbalakad ti panglakayen ti pagarian. “Ngem uray siak, iti kabayagkon a tao, diak ammo.”
Isu nga iti naminsan, inummong ti ari dagiti kalalaingan a mannakigubatna. “No ditay mapatay ti higante, maibustayo la ketdi!” kinuna ti ari. “Ania ti maisingasingyo nga aramidentayo?”
“Ket patayentayo, a, patgek a pangulo!” kinuna ti maysa kadagiti mannakigubat ti pagarian. “Kinapudnona, addan napanunotko a pamuspusan!” “Ipatungpalmo ket gunggonaankanto!” kinuna ti ari. Dagus ngarud a nagpakada ti mannakigubat tapno ipatungpalna ti kunana a pamuspusan.
Iti ruar ti pagarian, iti dalan a masansan a pakakitkitaanda iti higante, nagidda ti mannakigubat a kunam la no natayen. Iti di nagbayag, simmangpet ti higante. “Ho-ho-ho!” inkatawa daytoy idi makitana ti naidasay a mannakigubat. “Saan gayamen a nasken a mapanak pay iti kabalbalayan. Addan ditoy ti sidak.”
Sinagidna ti mannakigubat ket idi mariknana a nabara pay laeng, kinunana: “Nalabit napasungadannak itay ket natay iti butbutengna. Nabara pay laeng.”
Imbaklayna ti mannakigubat ket nagsublin iti balayna iti kabakiran.
Idi sumangpetda iti balay ti higante, natakuatan ti higante a naibusan gayam iti pagtungo. Imbatina ti mannakigubat iti kosina sa rimmuar. Apagruarna, simrek ti anak ti higante. Bassit pay ti higante, kataytayag laeng ti mannakigubat. Dagus nga innala ti mannakigubat ti kutsilio nga ar-aramaten ti higante a pagparti iti tao sa rinakusna ti ubing a higante manipud iti likud sa intudokna ti kutsilio iti tengnged ti ubing a higante.
“Ibagam kaniak no yan ti puso ti amam. No saan, rukrokenka!” impangta ti mannakigubat.
Iti butbuteng ti ubing a higante, impudnona: “Adda iti kanigid a dakulapna,” kinunana.
Isu nga idi sumangpet ti higante, dagus nga intudok ti mannakigubat ti nakatadtadem a kutsilio iti kanigid a dakulap ti higante a dagus met a naarinuknok ti higante.
Ngem sakbay a nauyos ti anges ti higante, kinuna daytoy nga aggargarakgak: “Mapataydak man, dikayto inggaan. Maramanakto latta ti darayo!”
Tapno masigurado ti mannakigubat nga awanton ti mangsingsinga kadakuada, rinangrangkayna ti higante sa pinuoranna. Inakupna ti dapo daytoy sa inwarisna tapno itayab ti angin.
Pudno a ti angin, intayabna dagiti dapo. Ngem ti tunggal tinukel ti dapo, kellaat met a naikkan iti payak; sumanengsengda a nagsubli a napan nangtudok iti napagkitotan a mannakigubat.—O