Panangimaton iti Pagtaengan

ADU nga inna iti pagtaengan ti agparparikut iti kanayon a narugit ket saan a naurnos a banio aglalo no adu dagiti agaramat.

Kuna met dagiti dadduma nga agtagtagibalay a nalaka laeng daytoy nga aramid no inaldaw a dalusan ti banio nga aramiden laeng iti uneg ti lima a minuto.

Iti umuna a minuto, dalusan amin dagiti espasio ken pagparabawan iti uneg ti banio. Ipakni dagiti bambanag a naiwara kadagiti saan a maitutop a disso.

Masapul nga awan ti maiwara a mureng ken tualia iti suelo. Maipan dagiti mureng iti paglabaan ken maisab-it wenno makupin met dagiti tualia a mabalin pay nga aramaten.

Iti sumaruno a dua a minuto, dalusan wenno punasan dagiti pagparabawan ken lababo kalpasan ti panagdigos tapno saan a maurnong dagiti dimdimket a sabon. Ipakni ti naaramat a polbos ken toothpaste. Piduten dagiti naiwara a buok ken dadduma pay a bambanag.

Isaruno a punasan ti tangke ti inodoro, pagiggaman, pagtugawan, batay ken bibig ti inodoro iti kastoy a panagsararuno.

Kanayon nga isagana ti all-purpose cleaner ken dagiti rigis iti maysa a pagyanan tapno asideg laeng a gaw-aten.

Sibugan ti aglawlaw nga akin-uneg a paset ti inodoro sa kirkiran babaen ti a brotsa sa i-flush.

Aramaten ti maudi a minuto a panangdalus iti sarming, babaen ti nadam-eg a rigis a kadawyan a maidulin iti sirok ti lababo.

Nalaklaka a dalusan dagiit naipurpuritak a toothpaste no dagdagus a punasan.

No sigud a nadalus ti sarming, aramaten ti kanito a panangdalus iti lababo ken dadduma pay a gamigam iti banio.

Kabayatan ti panagdalus, paliiwen dagiti dadduma pay a kasapulan iti uneg ti banio a kas kadagiti tualia ken toilet paper.

Maibalbalakad pay ti panangipuesto kadagiti alikamen a pagdalus iti asideg ti banio tapno saan nga makabusbos iti tiempo a panangsapsapul wenno panangal-ala kadagitoy iti adayo a pagidulinan.—O