Memorabilia ni Pel Alcantara, maipabuya iti La Union

Maluktan ti “Pel Alcantara Memorabilia Exhibit” a maawagan iti “Gilap” inton Marso 23 iti pagtaengan ti Pamilia Alcantara iti Namnama Village, San Fernando City, La Union. Agpaut ti eksibit, umuna iti serye, agingga iti Marso 25, 2019, a nairanta a pangrambak iti maika-89 nga anibersario ti pannakaipasngay ni Apo Pelagio A. Alcantara, tubo iti Brgy. Flora, Sto. Domingo, Ilocos Sur ken mannurat ti Bannawag idi panawenna.

Ti nasao nga eksibit ti tampok a proyekto ita a tawen ti Sangkap Ilokano Arts a kukua ken imatonan ni Djuna R. Alcantara, ti inaunaan nga anak daydi Manong Pel (nalatak nga awagna). Ni Mrs. Cres Alcantara Robianes vda. de Alcantara, 86, retirado a propesora iti Don Mariano Marcos Memorial State University (DMMMSU) Mid La Union Campus, ti mangidaulonto iti pannakakartib ti seremonial a laso inton Marso 23 a panaglukat ti eksibit.

Madasigdasigto dagiti maipabuya a koleksion a pakaanninawan ti namaris a kabibiag ni Manong Pel— kas mannursuro, premiado a mannurat ti Bannawag, komunikador ti gobierno, lider ti Gunglo Dagiti Mannurat nga Ilokano (GUMIL), opisial ti Lions, bagnos ti Red Cross, ken kas padre de pamilia.

Kuna ti Pamilia Alcantara a silulukat daytoy umuna a serye ti eksibit kadagiti mannursuro ken estudiante, mannurat, opisial ti gobierno, Lions ken Red Cross iti La Union ken kadagiti gagayyemna. Maluktanto met ti eksibit kadagiti dadduma nga aggapu iti sabsabali a lugar iti sabali a gundaway.