Adda Nobia ni Carlo Ngem Saan a ni Angelica?
L INIKLIKAN, ‘bagis, ni Carlo Aquino a sungbatan ti saludsod no pudno nga adda nobiana a taga-showbiz.
Nagdardaras daytoy a pimmanaw iti maysa a komperensia dagiti agiwarwarnak.
Kayatna a sawen, ‘nganga’ man laengen dagiti CarGel ( fans da Carlo ken Angelica).
Ken, siempre, uray ni Angelica, ‘nganga.’
Annay, pusok, annay!
* * * Kasla naurnos man met laengen ti relasion da Daniel Padilla ken Kathryn Bernardo, ‘bagis. Wen, ta nagkuyogda a nagbakasion idiay Amanpulo.
Naipadamag itay kallabes nga adda sangkabassit parikut iti relasion dagitoy. No pudno nga okeydan, ala, ket naimbag ngarud no kasta.
* * * Naipadamag met, ‘bagis, a nagsuplada ni Glaiza de Castro itay nabiit.
Adda fan nga immasideg iti aktres ket kalikagumanna koma met ti makipiktiur. Ti adatna, inawagan ti nasao a fan ni Glaiza a Ryza (Cenon). Ania pay, kuna ni Glaiza a saan nga isuna ni Ryza. Sa timmalikud. Ulk.
* * * Madi ti panagsaadna ken ni Kris Aquino ti angaw ni kandidato a senador Bong Go, ‘bagis.
Kuna ngamin ni Bong nga adda uppat a putot ni Philip Salvador idiay Davao City banag a kinontra ni Philip.
Ngem saan a nagpaanawa daytoy makanawan ni Presidente Duterte ket kunana a pudno ti ibagbagana sa innayonna a linoko pay ni Philip ni Kris.
Ket kas nadakamat, saan a nasayaat ti panagsaad daytoy nga angaw ken ni Kris. Ken, siempre, uray iti kaaduan a Filipino.
* * * Iti biang daytoy nanumo a kabagismo, ‘bagis, saan koma met nga aramiden dagiti kandidato a comedy bar ti panagkampaniada.
Ilawlawagda koma lattan a nasayaat dagiti plataporma a manamnama a makatulong kadagiti umili.
Saan a pudno ti kunak, ‘bagis?—O
(Chairman ni Kabagis Eloy iti Hunta Direktiba ti FAMAS, Host-Producer ti Celebrity Hour Media Forum, ken Trustee iti Aliw Awards Foundation, Inc.—AST)