NAKAAN-ANEP DAGITOY NGA INNA NGA AGIBILAG KEN AGLAKO
iti daing iti igid ti National Highway nga agpa-Ilokos kangrunaanna iti paset ti Barangay Damortis, Sto. Tomas, La Union. Asideg ngamin daytoy iti Lingayen Gulf ken addaan iti napintas a pantalan (fish port) ken planta ti yelo a pagiponduan dagiti makalapan nga ikan. No adu ti makalapan, dagus met a madaing dagitoy sa mailako kadagiti aglabas iti daytoy a paset ti kalsada a mangmangted iti inaldaw a pamastrekan dagiti lumugar. Agbatay iti klase ti ikan a kas iti dalag-baybay, espada, sapsap, dilis, bangus, salmon kdp., mailaklako dagitoy iti P100-P300 ti kada katuon. (LEILANIE G. ADRIANO)