Iti Maminsan Pay a Panagsublim
gapu ta awagandatay’ nga awagan kadagiti nagantayo iti pagsasao a nakayanakan agsublika nga agsubli
agsublika nga agsubli ta isu ti naikari kenka ken kadatay’ amin a biktima ti agam-ammangaw a kinapagilian
agsublika nga agsubli ta isu ti naikariam ket rumbeng a surotem ti dana kas iti awis ni ina iti karkarma— a maysa kadagiti uppat a kararua ni ilokano a kararua ti salun-at, kinalimbong, rason, ken lagip— ti anak a nagtalapuagaw iti sabali a disso, solar, wenno uniberso a dina nakaikamangan ngem nasursurona met laeng a tagikuaen babaen ti puersa ti palsipikado a nasionalidad nga impasungalngal ti nailian nga edukasion
surotem a surotem ti uni a bigbigbigen ti lagip ken kararuam, ti uni ti awis ti pannakabautbaut kadagiti naibitin a badom babaen ti aklo a simbolo ti ugaw a didiosen nga espiritu ti taraon ta ti pagsasao ti taraon ti Ilokano a kararuam
agsublika nga agsubli ngem kalpasanna, kalpasan a dumar-ayka iti padaya ti panagsubli, inkanto met laeng
inkanto met laeng iti nalawlawa a lubong balonem iti kararua iti nakem ken iti lagip a sakbay ti amin, sakbay ti amin a nailian, adda pagsasao a nakayanakan.
--LEONARDO TEJANO