Siled ti Kararag

Basaentayo ti Efeso 4:29-32:

Nabara koma ti panagiinnayatyo a kas agkakabsat ken ni Kristo ket naregtakayo a mangipakita iti panagraemyo iti tunggal maysa.—Roma 12:10

“NASAYAATKA nga asawa, Bert,” kinunak iti asawak. Nasdaaw a timmaliaw kaniak. Kalpasan a nagrikiarkami iti dayta a bigat, saanna a ninamnama a baliksek daytoy kenkuana. Uray diak unay narikna ti panagayat ti asawak iti dayta a kanito, ammok nga ay-ayatennak. Ket diak kayat a madadael ti relasionmi gapu laeng ta narigat a mamakawanak.

Nakakaskasdaaw no kasano ti kaalisto a sumayaat ti aldawmi no balbaliwak ti rikna ken panagkitak kenkuana. Tunggal piliek a raemen ni Bert a saan ket nga ungtak wenno diak pagtagtagarian, nasaysayaat ti riknak kenkuana, iti bagik, ken iti relasionmi a kas agassawa. Ammok nga agpadakami iti marikrikna iti kanito a subadannak iti kinasingpet iti laksid ti saan a nasayaat nga inaramidko kenkuana. Kadagiti nangngegak kadagiti sabali a tattao, ammok a saan laeng a dakami ken lakayko ti makaadal manipud iti bersikulo iti daytoy nga aldaw. Pagaayatko la unay ti kunana a, “naregtakayo a mangipakita iti panagraemyo iti tunggal maysa.”

Naim-imbag no dawatentayo iti Dios nga ipakitana kadatayo ti dalan ti ayat ken panagraem kadagiti tattao iti aglawlawtayo, imbes a ti panangatiwtayo iti asawa, kakabsat, katrabahuan wenno gagayyemtayo— nangruna iti panawen a kasapulanda la unay ti panangipateg ken panagraem.

Kararag: Apo, tulongannakami a mangipakita iti panagraem ken panangpasingked kadagiti tattao iti aglawlawmi ita nga aldaw. Amen.

Kapanunotan: Ti panagraem kadagiti sabsabali ket mangbalbaliw iti taray ti aldawko.

Ikararagan: Dagiti narikut a relasion.