Kastoy, Kapid, Ditoy Hawaii
RINAMBAKAN ti Hardware Hawaii ti maika-65 a tawenna a kas kangrunaan nga aglaklako iti tabla ken dadduma a kayo a maaramat iti panagpatakder iti pagtaengan ditoy Hawaii. Ti Hardware Hawaii ti kabayagan ken kaanduran a tableria iti daytoy nga estado. Kadagiti napalpalabas a tawen, adu dagiti adda iti daytoy a tay-ak ti negosio ngem di naanduran dagitoy dagiti gawat ken tribunada ti ekonomia a kadarato dumarup iti Hawaii.
Kalpasan a nagsasaruno a narpuog dagiti dadakkel a tableria ket nabati ti Hardware Hawaii, simmangpet ti dua a higante a kompania nga aglaklako iti materiales ti konstruksion iti entero nga Amerika idi 2000. Nangbangonda iti sagduduada a dadakkel a pagtagilakuan banag nga adu ti nangipapan a daytoyen ti makaigapu a maangsan ti Hardware Hawaii. Adu ti nagliday ta no mangrikep daytoy, awanton ti “mannakigayyem ken naisem” a pagtagilakuan.
Ngem naglabas ti sumagmamano a tawen, adda pay met laeng ti Hardware Hawaii. Kinapudnona, idi 2001, makatawen kalpasan a simmangpet dagiti dua a dadakkel a kabalubalna, naipatakder ti sanga daytoy iti Mapunapuna, iti asideg ti pagtagilakuan ti dua a sigud a dadakkel a tableria a narpuog gapu iti di mailawlawag a gapu.
Nagtalinaed a napinget ti balubal iti negosio ti tableria. Ngem idi 2006, maysa manen a dakkel a sanga ti Hardware Hawaii ti naipatakder idiay Kapolei. Iti Kapolei ti pinasayaat ti siudad ti Honolulu a pakaipasdekan dagiti nadumaduma nga opisina ti gobierno ditoy Hawaii, banag a namagbalin a maikadua a sentro ti gobierno ken negosio iti Oahu. Sumagmamano a tawen kalpasanna, idi 2012, iti sanga ti Hardware Hawaii iti Kapolei ti pakaigabsuonan dagiti agsangpet a kayo ken dadduma a tagilako manipud iti kadaklan nga Amerika. Ditoy metten ti pagrubuatan dagiti kayo a maitunda kadagiti maipatpatakder a pasdek.
Idi maimtuod no ania ti nalimed a pinangsukal ni David Lundquist, ti presidente ken kangrunaan nga agtagikua iti Hardware Hawaii, kinunana a ti panagtalinaed a pannakaipangpangruna kadagiti aggatgatang ti kakaisuna nga armasda a namagtalinaed kadagiti suki ti tableria.
“Manipud pay idi un-unana,” kinuna ni David, “nagtalinaed a pilosopia ti Hardware Hawaii a saan laeng a ti pannakailako dagiti produkto ti pakaiturongan ti imatangmi no di ket ti pannakatulongmi kadagiti tattao ken ti panangipanamnamami a mapnekda iti serbisio nga ipaaymi.”
Innayonna: “Saan laeng a ti maganansia ti duri ti negosio. Ad-adda a ti mangpabileg iti negosio ket ti nasayaat a pannakatarawidwidna ken ti pannakatulongmo kadagiti tattao. No adda kenka dagitoy dua a banag, agtalinaed kenka dagiti aggatgatang. Ket ti kaaddada iti tiendaan, adda latta dumket a ganansia.”
Naipatakder ti Hardware Hawaii idiay Kauai idi 2006.
Idi Hunio 19, 1954, impasdek da Dana ken Mary Lundquist, dagiti nagannak ken ni David, idiay Kailua ti kaunaan a Hardware Hawaii. Sigud nga addaan dagitoy iti pagtagilakuan idiay Minnesota, maysa a paset ti kabambantayan idiay kadaklan nga America. Uppat ti tawen ni David idi. Nawaya a kunaen nga iti tiendaan ti ad-adda a pagrikrikusan ni David bayat ti panagubingna. Naigamer daytoy a negosio iti lasag ken panunotna.
Malaksid iti pagadalan, iti tiendaan ti nakasursuruanna iti adu a banag. Nagtalinaed met iti panunotna dagiti prinsipio ken pilosopia ti dakkelna a lalaki. Kinapudnona, kunana a ti amana ti nakaadalanna iti amin nga ammona. “Nagtalinaed kaniak amin a balikas nga insawangna,” kinunana.
Kas pagarigan ti wagasna a mangpili kadagiti agtrabaho iti tableria. Kunana a saan a nasken a nainget ti panagpili iti trabahador. Ti nasken, ammuem a ti tunggal tao, addaan iti bukod a paglaingan. Ket no maipuestom dayta a tao iti trabaho a paglainganna, namnamaem a nasayaat ti gapuananna.
Ngem patienna ketdi a naisangsangayan dagiti Filipino nga agtrabaho. “Saanda nga agpilpili iti kita ti trabaho,” kinuna ni David. “Ken kasla paglainganda amin a kita ti trabaho! Malaksid iti dayta, kanayon a naragsakda. Ket dayta ti maysa a gapuna nga adu dagiti Filipino nga agtrabtrabaho iti Hardware Hawaii!”
Nasinged ti rikna ni David kadagiti Filipino. Maysa a Filipina ti kasisingedan iti pusona, ni sigud nga Ellie Molina Fagarang manipud iti Badoc, Ilocos Norte. Napateg pay kenkuana dagiti katuganganna, da Nicolas ken Bernarda Fagarang.
Idi kanikadua a tawen, nagpaaramid iti plano ti balay a pagnaedan dagiti katuganganna. Adda sigud a balayda iti puseg ti Kailua. Ngem gapu ta nataenganen dagitoy, napanunot ni David nga umakarda iti nalawa a lugar tapno nasadsadiwa ti angin a lang-abenda, ken iti asideg ti balayda iti Waimanalo tapno ad-adda a mataming ni Ellie ti kasapulan dagiti dadakkelna.
“Nasayaat da Tata ken Nana (awagna kadagiti katuganganna), isu a kayatko a maipaay kadakuada ti dungngo ti maysa a pudno nga anak,” panangilawlawagna idi maplamplano ti maaramid a balay.
(Adda tuloyna)