Dear Ikit
Dear Ikit,
Tanga ken bulsek kadi ti agayat iti napudno? Aw-awagandak iti tanga, bulsek a nakamulagat, waeng ken gatel ta agid-iddaak kano la ngaruden iti papag, uray no awan kudsonna, nagsubliak kano pay laeng nga agidda iti datar a rutrot ti ikamenna.
Siak ti buridek iti lima nga agkakabsat ken 23 nga agkakasinsin. Siak laengen ti awan nasayaat a pagsapulanna. Diak pay ngamin nairuar ti Nursing Board gapu iti pannakidennak iti ama ti agduabulan nga anakko, nupay dinak inkasar.
No ungtannak ni ikitko a nangpaadal iti daydi amak, agbusi ti ngiwatna a mangiriag kaniak. “Sika pay a kapintasan kadakayo nga agkakasinsin ti tanga ken bulsek nga agayat. Ania la unay ti nakitkitam iti dayta nakaputot iti anakmo ? Ti utek adda iti ulo. Ni puso adda ti barukong. Nangatngato ti nagsaadan ti utekmo ngem dimo met inusar!”
Nanayonan pay ti rurodda idi immaydak inakkal ket nadanonda a pagsasawannak ni katugangak a didak pagan-ano a manugang ken ikamkamatko kano ti bagik iti anakda. Saan kano pay a mabalin nga agasawa ti barona ta adu pay ti obligasion daytoy ngem awan man la ti pananganawa ti ama ti anakko ken ni nanangna no di ket pinasarunuanna pay iti, “Imbagak la ngaruden nga agawidka pay laeng.”
Isu a nagawidak kaduak ti anakko iti balay ti kabsatko. Ngem kalpasan ti dua a lawas, immaynakami innala ti ama ti anakko. Simmurotak a dagus. Diak kayat a dumakkel ti anakko nga awan amana. Maysa pay, mariknak a daytoy ama ti anakko, isu laeng ti lalaki iti biagko. Ania ti agas ti tanga ken bulsek nga agayat? Tulongannak man, ikit.--Buridek
Dear Buridek,
Agpayso ti kuna ni ikitmo a nababbaba ti nagsaadan ti puso ngem ti utek—a kayatna a sawen, inaramatmo koma ti panunotmo a saan laeng a dayta ti riknam. Ta gagangay a manangikulbo ni rikna; bulsekenna a simumulagat.
Ala, timbangem a nasayaat no agbiagka a puso laeng ti paturayem. No nakurang ti ayat ni katugangam ken dayta ama ti anakmo kenka, agbalinka a martir. Anianto ti pagbanagan dayta anakmo?
Maysa pay, adda kadi plano ‘ta boyfriend- mo a tumulong tapno makaalaka iti board exam? No awan, agsublika pay laeng iti pamilia a naggapuam, Agpakawan ken agpakpakaasika a tulongandaka ti panag- board- mo wenno aywananda ‘ta anakmo tapno agbirokka ti trabaho.
No sisasaganan ‘ta ama ti anakmo a mangaklon iti responsibilidadna kadakayo nga agina a napnuan ayat ken dungngo, maipaneknek ken maipasindayagmonto a saan a tanga ken bulsek ti agayat a sipupudno.--‘Toy Ikitmo