Haytek!
SAANEN a malapdan ti panagramaram ti internet ken panagaramat iti World Wide Web. Dagiti ubbing iti elementaria ken hayskul, ammodan ti agusar iti smartphone, apps, ken internet. Ngem ammoda kadi ti husto a panangusar iti daytoy kunatayo a World Wide Web?
Adda nainget a pagalagadan ti media a print, radio, ken telebision. Saan a mabalin ti mangibbet iti balikas a mabalin a makadadael iti asino man. Ngem awan ti kastoy a pagalagadan iti World Wide Web. Masansan ketdi a makitatayo ti pinnasagid, makasair a balikas iti Facebook ken dadduma pay a Social Media, ken ti panagramaram dagiti naigagara a palso nga impormasion.
Masapul ngata ketdi a maisuro ti umno a pannakilangenlangen iti social media ken no kasano ti nasayaat a panangusar kadagiti nadumaduma a website. Umuna, masapul a masursurotayo no kasanot’ mangarisit iti pudno a maisupadi iti propaganda ken impormasion a nairanta a mangkuriro iti panunot dagiti tattao. Masapul pay a masursurotayo no ania dagiti mapagtalkan a paggapuan ti impormasion.
Adda met koma asignatura maipapan kadagiti umno a kababalin ken husto a pannakilangenlangen online. Ditay’ kayat a bugkawan wenno kaapa dagiti kakaarrubatayo. Ngem no mapantayo iti Facebook ken Social Media, di kadi nagadu nga apa ti masansan a makitkitatayo?
Kasano kadi ti makidebate iti online? Mabalin met ti makisinnukat iti opinion ken kapanunotan iti online. Mabalin a napudot ti diskusion. Ngem maipakitatayo met latta koma ti respeto iti tunggal maysa nupay agsupadi dagiti kapanunotantayo iti politika, relihion, ken dadduma pay a topiko.
Saan laeng a para ubbing ken estudiante ti panagadal kadagiti naimbag a kababalin iti web ken social media. Masapul a mairaman dagiti nataengan. No dadduma ngamin, datayo pay a nataengan ti mangisungsong iti panagsusubang iti online. Nalaka ngamin ti agsasao iti online no saantayo a kasango ti kapatangtayo. No ngata rupanrupa a pannakitungtong, maibagatayo pay ngata dagiti naadat a balikas a kas kadagiti maiposposte iti Facebook?
No kayatyo ti libre a resources iti daytoy a topiko, mapan iti https://www.commonsense.org/.—O