Adda Latta Naasi a Tattao
ITI dayta a rabii ti Huebes, Hunio 27, 2019 a sumrekak iti trabahok ditoy Siudad ti Baguio, natnagko ti selponko iti taksi a nagluganak. Babaen ti selpon ti katrabahuak, inaw-awagak ken tinekteksak ti selponko nga addaan iti dua a sim card. Agri-ring nga agpada dagiti dua a numerok ngem awan sumungbat; kaawatan nga awan pay nakapidut wenno di pay nagshutdown; di pay naikkat dagiti sim-na isu nga awan iti riknak ti panagdanag gapu ta kunada a kaaduan a mapukpukaw, saanen nga ag-ring no awagan.
Ngem simken latta ti panagduaduaak. Kabigatanna, iti alas onse, pinadasko manen nga inawagan dagiti dua a sim-ko. Ti maikadua nga awagko ti nasungbatan a dagus ket ti simmungbat, a naamirisko nga isu ti drayber ti nagluganak a taksi, ammonan
a siak ti nakabati iti selpon iti luganna, Ti kunana, “Naimbag ta nakapakleb ti selponmo iti igid ti tugaw ta di madlaw no adda umawag ken awan nakakita a sabali a pasahero ta adu pay ti nailuganko kalpasan kenka.”
Dinamagna ngarud a dagus no sadino a lugar ti pangisublianna. Inammok met ti naganna (Dominador “Jhay Ar” Bugayon IV).
Inurayko ngarud ni Manong Jhay Ar iti Jeepney Terminal iti Scout Barrio, kas nagtulaganmi. Kunana nga aggapu pay idiay Irisan. Bayat ti panagur-urayko, adda sumagmamano a babbalasang nga agur-uray met iti taksi a paglugananda, isu nga idi agsardeng ti taksi ni Manong Jhay Ar, impagarup dagitoy nga iluganna ida ngem dagus a sinapul dagiti matana no asino ti pangisublianna iti selpon. Inasitgak a dagus ken inyam-ammok ti bagik gapu ta malagipko nga isu daytoy ti taksi a nagluganak iti napalabas a rabii (BIS TAXI Plate # AYT 996).
Napalaus unay a yamanko gapu iti pannakaisubli ti selponko ta daytoy laeng ti us-usarek a pangawag iti anakko nga adda iti probinsia ti Pangasinan. Saan a kayat ni Manong Jhay Ar ti itedko a gunggona. Ngem ti kunak kenkuana, “No ania man dagiti bendision a maawawatko, agiparparaburak.” Ti sungbatna, “Inaramidko laeng ti rumbeng.”
Naimatangan gayam dagitay babbalasang ti panangyawat ni Manong Jhay Ar iti selponko ken nangngegda ti saritaanmi. Isu nga idi agpakadan a mapan manen agpasada, nangngegko a kinuna ti maysa a balasang, “Diyan na kayo sumakay, you’re in good hands.”
Kadagiti dadduma pay a saritaanmi ken Manong Jhay Ar iti text, kinunana: “Adda metten sumagmamano a nakabati iti selponda ditoy taxi ngem uray maysa diak inalman.. Sinapulko dagiti akinkukua; insublik. Kaniak laeng, diak kabaelan nga usaren ti diak kukua; diak mairusok. Diak maalimon ti makan a naggapu iti kinadakes.”
Gapu ken ni Manong Jhay Ar, naisubli ti panagraemko kadagiti taxi driver a napukaw gapu met laeng ti kinaabusado dagiti dadduma a drayber.—O
(Adda kadi padasyo, wenno padas ti maysa nga am-ammoyo, a nakaipakitaan ti kinamanangngaasi ti maysa a tao? Ibinglay iti daytoy a benneg, “Addada Latta Naasi a Tattao.” Ipatulod ti sinurat iti bannawagmagazine.mb@gmail. com. Mabayadan dagiti maipablaak a sinurat.—Ed)