Kasano a Mapagsidam ti Anakmo iti Nateng?
MAULIT-ULIT ti pannakaibalbalakad kadagiti ubbing nga agsidada koma iti nateng. No dadduma, daytoy pay ketdin ti pakaung-ungtanda no saan a maallukoy dagitoy a mangilabay iti nateng iti pingganda.
Ulit-uliten met dagiti eksperto iti salun-at ken nutrision ti kinapateg dagiti nateng ken bunga iti salun-at, saan laeng a kadagiti ubbing.
Nupay kasta, kadawyan a saan a kayat dagiti ubbing ti agsida iti nateng ania man ti pangipalawag iti kinapateg dagitoy a taraon kadakuada.
Adu pay ketdi a nagannak ti mangpilpilit ken mangpasuksok kadagiti annakda tapno laeng agsidada iti madasar a nateng.
Saan a mapabasol dagiti ubbing iti dida panangayat nga agsida iti nateng ta saan a makaay-ayo, napait, naalsem wenno saan a makaawis ti raman dagitoy. Kadawyan a nairuam dagiti ubbing iti nasam-it a kas iti tubbog ti suso ti inada no maladagada pay laeng.
Nasken ngarud ti adu nga anus ken pannakaipakat dagiti nagduduma a wagas tapno laeng maallukoy dagiti ubbing a rumaman ken kalpasanna mairuam nga agsidada iti nateng.
Masapul a maawis dagiti ubbing iti raman ken langa dagiti maidasar kadakuada a nateng. Mabalin a laokan kadagiti pagaayatda a ramen wenno masagpawan iti karne, hotdog, bacon wenno dagiti dadduma pay a taraon a pagaayatda.
Masansan koma pay nga inayon nga idasar dagiti nateng kadagiti dadduma pay a taraon a pagaayat kadagiti ubbing, uray no saggabassit laeng. Makuna a pangramanan wenno pangiruamanda laeng a sidaen dagitoy.
Agpayso ti pagsasao a ti nagannak ti mangipaay, mgem ti anak ti mangikeddeng no ipaunegna ti maidasar. Daytoy ti gapuna a nasken nga allukoyen dagiti ubbing a mangisubo iti nateng a maidasar babaen ti makaawis a langa ken raman daytoy.
Iraman koma pay dagiti ubbing iti panagmula iti nateng, ken iti pannakaisagana ti sidaen a nateng iti pagtaengan. Nalaklaka a maallukoy dagiti ubbing nga agsida iti nateng no makipasetda iti pannakapatanor ken pannakaisagana ti nateng a sidaenda.
Kangrunaan iti amin, nasken a makita dagiti ubbing nga agsidsida dagiti dadakkelda iti nateng tapno magutigotda a tumulad.
Saan koma a ti saan a panagsida dagiti ubbing iti nateng ti pakaung-ungtanda wenno pakaigapuan ti pannakarikiarda iti panganan.
Adda kadagiti mangisagana iti daytoy a taraon ken iti positibo a panangawis kadagiti ubbing nga agsida iti nateng ti tulbek ti nasalsalun-at a pagtaengan.—O