Panangimaton iti Pagtaengan
ADDA dagiti ubbing a saan a dagdagus a makaaramid iti bukodda a desision. No dadduma, agpampanunotda iti mabayag no ania ti gatangen wenno ipagatangda nga abalbalayda wenno alikamenda iti pagadalan.
Adda met dagiti pettat ti panagdesisionda a didan pampanunoten no ania ti pagtungpalan daytoy a pangngeddengda.
Kadawyan a dagiti ubbing nga agtawen iti lima agingga iti innem ti saan a dagdagus a makadesision no maigatanganda iti sorbetes wenno abalbalay.
No abalbalay manen ti ikeddengda a pagatang, saanda manen a makapagdesision no ania a klase ti abalbalay.
Kadagitoy a nasapa nga edad dagiti ubbing, kadawyan a dagiti nagannak ti agdesidir para kadakuada.
Ngem no sumrekdan iti pagadalan, lumawlawa ti lubongda ket ad-adu met dagiti gundaway a maipapilitda dagiti nagduduma a bambanag a kayatda a para iti bagbagida.
Nasken a sursuruan dagiti ubbing nga agpili iti kayatda a para iti bukodda a bagi.
Babaen daytoy, agbalinda a nawaya, responsable ken mapabileg pay ti panagtalekda iti bukodda a bagi.
Nupay kasta, saan nga apagbiit a masursuruanda tapno ammoda ti umannugot, agkedked wenno agduadua kadagiti nagduduma a desision a pakaipasungalngalanda.
Uray kadagiti simple laeng a bambanag a kas iti panangitantan iti panaginnaw kadagiti lunglongan, nasken nga ipalawag dagiti pagsayaatan ken pagdaksan dagitoy a bambanag.
Ipakita pay kadagiti ubbing no kasano ti panangisayangkat kadagiti bukod a pangngeddeng para iti bukod a bagi ken para iti pamilia.
No kasta nga agkasangay, pagpilien kadagiti kalkalikagumanna a mabalin a magatang a para kenkuana.
Mabalin a pagpilien no agsaganakayo a para iti maysa a padaya wenno kadagiti kayatna a maisagana.
Saan ketdi nga adu unay dagiti ited a pagpilian dagiti ubbing no sursuruan dagitoy a mangeddeng iti bukodda a wagas.
Nasken laeng a matulonganda nga agdesision tapno maikabassit met ti pannakaburiborda ken tapno saanda a makabusbos iti adu a panawen nga agdesision.
Ipalawag kadakuada ti pagtungpalan dagiti babassit a panagdesision a kas iti balonen a taraon no mapanda agbasa ken no ania ti napatpateg kadagiti kayatda a gatangen.
Bay-an ngarud a saludsoden dagiti ubbing iti bukodda a bagi wenno pagdiligenda ti padaksan ken pagsayaatan ti tunggal desision nga aramidenda.
Ngem uray no kasta, bay-an met a mapadasanda ti pagtungpalan dagiti saan a natalged a pangngeddengda.
Kas pagarigan, bay-an a maamirisda no ania ti mapasamak no busbosenda amin a naited a kuarta a balonda imbes a maaramat koma iti rumbeng a nakaisangratanna.
Nasken met a mapadasan dagiti ubbing ti saan a nasayaat a pagtungpalan dagiti desisionda tapno makaadalda para iti sumaruno a nasiksiken a pangngeddeng.—O