Iti Pagadalan: Apay a Nasken Dagiti Nagannak ken ti Komunidad?
SAAN a mabalin nga isina kadagiti nagannak ken iti komunidad dagiti aramid iti pagadalan.
No agkakayammet ti pagadalan, dagiti nagannak, ken ti komunidad, makapagbibinninglayda kadagiti rekursos iti uneg ken ruar ti pagadalan a para iti epektibo a panagadal dagiti ubbing.
Paneknekan dagiti adu a panagadal a no makipartisipar dagiti nagannak kadagiti aramid iti pagadalan, ad-adda nga aktibo dagiti ubbing iti panagadalda ken manmano kadakuada ti agsardeng nga agbasa.
Manmano pay ketdi a manglangan dagiti ubbing iti klaseda no makiparpartisipar dagiti dadakkelda kadagiti aramid iti pagadalan.
Kankanayon pay a maaramidda dagiti asaymentda nga agtungpal iti nangato a gradoda.
Malaksid kadagitoy, nasaysayaat pay ti pannakilangen dagiti ubbing kadagiti kapatadanda ken dadduma pay a tattao iti man ruar wenno uneg ti pagadalan.
Nasingsingpet ken natudtudio pay ketdi dagiti ubbing kadagiti dadakkelda ken nangatngato ti panagtalekda iti bukodda a bagi.
Gapu kadagitoy a pagsayaatan a magun- od iti panagtitinnulong ti pagadalan, nagannak ken dadduma a kameng ti pamilia ken ti komunidad, nasken a mabukel ken maisurat ken maaprobaran dagitoy a pagalagadan.
Maitandudo iti aglawlaw ti pagadalan dagiti wagas tapno maparegta ti panagsursuro dagiti ubbing no naregta ti panagtitinnulong dagiti nagannak ken ti komunidad.
Maibalbalakad pay a kankanayon koma a dakamaten ti pagadalan dagiti nagannak ken dadduma pay a kameng ti pamilia saan laeng a dagiti adda kadagiti umuna a tukad wenno grado nga ubbing. Nasken a mairaman pay dagiti adda iti nangatngato a grado.
Nasken pay a nalawag a maammuan dagiti nagannak dagiti nagapuanan ti pagadalan, panagdur-as dagiti ubbing, dagiti estratehia nga ipakpakat ti sistema ti edukasion ken dadduma pay babaen dagiti naisurat a pakaammo wenno dagiti mabalinda a basaen wenno buyaen iti internet wenno online.
Napateg pay ti pannakinaig dagiti mannursuro kadagiti nagduduma nga ahensia ken uray kadagiti establisimiento ti negosio tapno tumulongda kadagiti aktibidad dagiti ubbing iti pagadalan.
Ipakat koma pay dagiti pagadalan ti amin a kabaelanda tapno maaramat dagiti mabalin nga aramaten a rekursos ti komunidad agraman dagiti dadduma pay nga ahensia ken organisasion, nasaririt ken makabael a tattao, natural a rekursos ken teknolohia a mabalin nga aramaten dagiti ubbing tapno ad-adu ti maadalda.
Maysa a kapapatgan a makatulong dagiti nagannak kadagiti desision ti pagadalan ta adda pakainaigan dagitoy iti panagsursuro dagiti annakda.
Daytoy ti rason a kankanayon koma a pasangbayen ti pagadalan dagiti nagannak a tumulong ken mangpalag-an kadagiti parikut dagiti manursuro.—O