Ti Tarakenmo ken Sika
KAS met laeng kadagiti dadduma a taraken nga ayup iti pagtaengan, nasken nga ipaayan dagiti guinea pig iti nasalunat ken balansiado a taraon. Saan met ketdi a komplikado dagiti maidasar kadagitoy a taraon ngem nasken a maikkanda iti kanenda a ruot, presko a natnateng, sangkabassit a pellets a magatang kadagiti pagtagilakuan, ken nasayaat a paggapuan ti Bitamina C.
Malaksid iti ruot, saan a nasayaat iti salun-at dagiti guinea pig ti nalabes a maidasar kadagiti nadakamat a taraon. Daytoy ti rason a ti laeng maitutop a kaadu ti ipaay kadagitoy a taraken nga ayup.
Kasapulan dagiti guinea pig ti nangato ti kalidadna a ruot. Nasken nga adda kankanayon a ruot a kanenda iti inaldaw.
Masapul ti guinea pig ti ruot a paggapuan ti gunnot (fiber) ken tapno maasa ken madalusan dagiti ngipenda.
Kasapulan pay ti ruot a pangbussog kadagiti ayup ken tapno maliklikan ti nalabes a panagipaunegda kadagiti nasam-it a pellets ken natnateng.
Adu dagiti maala a ruot kadagiti bakante a solar.
Liklikan met a gatangen dagiti pellets a naaramid manipud iti alfalfa hay. Saan pay a kaaduen nga idasaran dagiti taraken a guinea pig iti pellets. Saan koma nga ad-adu ngem apagkapat ti maysa a tasa ti maited iti tunggal ayup iti inaldaw.
Siguraduen pay nga awan ti nagtutukel wenno dadakkel a binukel a nailalaok iti pellets tapno maliklikan met iti pannakaispel dagiti taraken nga ayup.
Nasken met nga idasaran ti maysa a guinea pig iti maysa agingga iti dua a tasa a nateng iti inaldaw. Dagitay berde ken nabulong a natnateng ti maibalbalakad a maipakan kadagiti taraken a guinea pig.
Mabalin met nga idasaran dagiti guinea pig ti prutas. Isuna laeng ta nangato ti imet dagiti prutas nga asukar. Gapu iti daytoy, saan koma a nasursurok ngem maminsan iti tunggal lawas nga idasaran dagiti guinea pig iti prutas.
No awan ti maala a taraon a kayat dagiti ayup a paggapuan ti Bitamina C, nalaklaka ti mangilimog iti tableta (ascorbic acid) iti inumenda.
Nupay kasta, saan met a kankanayon a painumen dagiti guinea pig iti danum a nalimogan iti Bitamina C. Agbaliw pay ketdi ngamin ti maris ti danum a malaokan iti ascorbic acid ket adda dagiti guinea pig a mangliklik a manginum iti daytoy.
Adda met ketdi dagiti magatang a Bitamina C a pagaayat dagiti \ a ngatingaten. Adda pay dagiti maited a Bitamina C kadagiti ayup babaen ti eringgilia.—O