Idi Un-unana a Panawen
IDI un-unana nga aldaw, adda sangapulo ket dua a kuneng. Iti maysa nga aldaw, napanda nagbanniit iti karayan. Intugawda iti igid ket nagbanniitda a nagbanniit. Adda met sasaggaysada a nabanniitan a lames.
Idi rumabiin, napanunotdan ti agawid. Gapu ta adda iti bangir ti karayan ti lugarda, linasatda ngarud ti akikid a rangtay.
Idi makadanonda iti bangir, kinuna ti maysa kadagiti kuneng: “Bilangek man no manotayo amangan no adda kurang!”
Ket binilangna: “Maysa, dua, tallo, uppat, lima, innem, pito, walo, siam, sangapulo, sangapulo ket maysa…” Nagsardeng. Awan ‘tay maysa a kaduada!
“Adda kurang!” kinunana a bimsag pay. “Natnag la ketdi iti rangtay!”
“Siak man met ti agbilang!” kinuna ti sabali pay a kuneng. Ngem sangapulo ket maysada latta.
Uray idi simmublat dagiti dadduma nga agbilang, sangapulo ket maysada latta.
Kasano ket ‘diay agbilang, dina met iraman ti bukodna a bagi.
“Ditay agaw-awid agingga iti ditay masapulan ‘tay kaduatayo,” inkeddeng ‘tay immuna a nagbilang. Addada iti kasta a kasasaad idi adda lumabas a mannalon. Sinaludsod ti mannalon no ania ti parikutda. “Sangapulo ket duakami nga immay ditoy. Ngem itan, sangsangapulo ket maysakamin!” insungbat ti maysa kadagiti kuneng.
Iti panunotna, binilang ti mannalon dagiti kuneng. Sangapulo ket duada met. Idi kuan, naamirisna no kasano ti panagbilang dagitoy. Napaisem ti mannalon.
“No masapulak ti kaduayo, itedyo kaniak amin a nakalapanyo a lames, kas tangdanko!” kinunana.
“La ketdi,” dandani naggigiddan a kinuna dagiti kuneng. “Agliliniakayo ngaruden ta bilangenkayon,” kinuna ti mannalon.
Idi nakapaglilinian dagiti sangapulo ket dua a kuneng, rinugianen ti mannalon ti nagbilang.
“Maysa,” kinunana sa tapikenna ti abaga daytoy. Agingga iti nakadanon iti maikasangapulo ket dua. “Sangapulo ket dua!” ket tinapikna ti abaga ti maikasangapulo ket dua. “Addakayo aminen! Nasarakakon ‘tay napukaw a kaduayo!” kinuna ti mannalon.
Naragsak a nagawid dagiti sangapulo ket dua a kuneng. Naragsak met a nagawid ti mannalon a bitbitna ti naubon a sangapulo ket dua a lames.—O