Panangimaton iti Pagtaengan
ADU a nagannak iti mangpabpabasol kadagiti mannursuro kadagiti saan a nasayaat a galad dagiti annakda. Kunkunada a saan nga epektibo ti pagadalan a mangipasagepsep kadagiti alagaden ti nasayaat a kababalin kadagiti ubbing.
Dakkel a biddut dagiti nagannak, kangrunaanna dagiti konsintidor, ti kanayon a panangpabpabasolda kadagiti mannursuro.
No utoben a naimbag, mangrugi amin a sursuro iti uneg ti pagtaengan a pakairamanan ti panangamirisda kadagiti bukodda nga aramid, no kasano ti pannakilangenda iti sabsabali a tattao, ken kadagiti bambanag iti aglawlawda.
No amirisen a naimbag, napateg ti akem ti pagtaengan tapno maipaay ti maitutop a sursuro a kasapulan dagiti ubbing iti bukodda a panagdur-as.
Napateg met ti akem ti pagadalan tapno mataginayon dagitoy nasayaat a galad dagiti ubbing.
Laglagipen a padur-asen laeng dagiti mannursuro dagiti naagsep dagiti ubbing a makaay-ayo a kababalin iti uneg ti pagtaengan.
Iti sabali a pannao, iti pagadalan a maisuro kadagiti ubbing dagiti pagsiriban a mainaig iti matematika, siensia, historia, geograpia, arte ken dadduma pay a tay-ak ti pagsiriban.
Iti pagtaengan ti pakaisuruan ti kinasingpet babaen ti panangitandudo dagiti nagannak.
Dakdakamaten ngarud dagiti adu a mannursuro a saan a mailibak nga iti pagtaengan ti pasursuruan dagiti ubbing a saan nga agul-ulbod, panaggaggaget ken panangipatungpalda kadagiti obligasionda.
Iti pay pagtaengan ti pakasursuruan dagiti ubbing no kasano a makipagriknada iti sabali a tao ken iti panagraemda kadagiti nataengan.
Saan koma ngarud a pabpabasolen dagiti nagannak dagiti mamaestra no saan a nadalus ken saan a naurnos dagiti gamigam dagiti annakda. Isuda koma a nagannak ti kangrunaan nga akin-akem ken mangisuro iti daytoy a galad a kinamanagurnos kadagiti ubbing.
Akem dagiti mannursuro ti mangilungalong iti kinapateg ti panagsingsingpet dagiti ubbing. Ngem dagiti nagannak ti kangrunaan a mangsursuro kadagiti annakda nga agbalin a nasingpet.
Mapaliiw kadagiti nasisingpet nga ubbing a no addada iti pagadalan, kanayon a tumulongda iti maestrada, kablaawanda dagiti kaeskuelaanda, agpadispensarda no adda biddutda, agyamanda no adda naimbag a nagun- odda ken agaramatda kadagiti makaay-ayo a balikas.
No ngarud adda ubing a mangkatkatawa kadagiti biddut dagiti kaklaseanna ken saan mangikankano kadagiti kasapulan dagiti kapatadanna, kadawyan a saan a naisuro daytoy iti pagtaengan a naggapuanna.
No met kankanayon nga agreklamo wenno awan anus ti maysa nga ubing, maipato a naggapu daytoy iti pagtaengan a saan a naigunamgunam kenkuana ti panagan-anus.
Agpayso a sinakupen ti mobile technology ken social media ti agdama a kasasaad ken panagsisinninged dagiti kameng ti pamilia. Ngem saan koma a daytoy ti rason tapno saan nga ikaskaso dagiti nagannak ti panangitandudo iti kinasingpet kadagiti ubbing. Ken imbes nga agpabasolda iti sabali gapu ti di makaay-ayo a galad dagiti annakda, agsarmingda koma nga umuna.—O