Kasano ti Agidatag iti Sinurat iti Bannawag?
Wen, naimas ti binubodan ngem no masobraan, makabartek met nangruna no ‘tay nagalem iti nabayag wenno no dimmanumen ‘diay innapuy. No ngamin bumabaak ti binubodan, agbalinen a digo nga isu metten ti maaw-awagan iti tapuy (tapey kadagiti dadduma). Daytoy ti mainum no adda okasion wenno parambak.
Nalaka laeng ti agaramid iti binubodan. Adda met magatang a bubod nga ilaok (isu a binubodan) wenno apog kadagiti tiendaan iti Cordillera ken Ilokos. Babaen ti maysa a tipay a bubod, makaaramidkan iti binubodan manipud iti sangasalup a bagas. Pagsabtem ti tammudom ken tanganmo nga agtimbukel ket dayta ti kadakkel ti maysa a tipay a bubod. Iluto ti bagas a kas iti panagluto iti innapuy. Kalpasanna, gawen ken pabaawan. Pagur-urayan iti ibabaaw ti innapuy, rumeken ti bubod wenno apog iti napino sa ilaok iti innapuy no nabaawen. Ikiwar a nalaing tapno maigamas ti bubod iti innapuy. Mangisagana iti panggaleman a kaldero, kaserola uray tayab. Apapan a nasayaat iti bulong ti saba sa kalpasanna abbongan met laeng iti bulong sa kaluban.
No kayat a medio sumam-it ti ramanna, mangtunaw iti apagkapat a kilo ti puraw nga asukar iti napudot a danum, ‘tay husto laeng ti kadaruyna. Inton nabaawen, in-inuten nga iwikiwik iti rabawna babaen ti kutsara (saan a kiwkiwaren). Aramiden ti kastoy no addan tallo nga aldaw ti binubodan. No immagsepen ti asukar kalpasan ti maysa wenno dua nga aldaw, mabalinen a kanen. Maammuam a mabalinen a kanen no agadiwaran ti ayamuomna. Ngem kas itay nakunakon, uray naimas, dimo palaluan. Ta amangan no agkantaka a dina oras iti “Manok na Pula.”—O