Ti Puga (3)
Ti Napalabas: Kalpasan ti pananglapped da John Villa, Daniel, ken Jerky iti kudeta a mangtippuog koma iti turay ti Presidente ti Filipinas, impaayan ti CIA da Daniel ken Jerky iti kuarta nga usarenda a mangabaruanan, ken babaen ti Witness Protection Program, naipanda iti lugar nga awan ti makaam-ammo kadakuada. Naital-o met ni Mr. Bosworth a handler ni John a kas baro a Direktor ti CIA, ket ti umuna a bilinna: papatayenda ni John. Iti dayta a rabii iti Filipinas, a kaaldawan ti panagsapata ni Mr. Bosworth a kas Direktor, naggigiddan nga adda nangraut kada John, Daniel, ken Jerky. Napatayda a dagus ni Jerky. Agpeggad met ti pamilia ni Daniel ket inawaganna ni John. Ngem madama a makirangranget ni John. Idi mapatayna dagiti nangserrek iti balayda— a natakuatanna a kameng ti Triad, inkeddengna a mapan saranayen ni Daniel. Ngem naladawen ta natayen ni Loida nga asawa ni Danienl ken dagiti annakda.
(Maika-3 a Paset)
NILGAT ti raniag ti silaw ti lugan ni John ti nakasipsipnget a dalan nga agturong iti pagtaengan ni Daniel. Naulimek, ta awan pay dagiti managparbangon a lugan, ket agsisimparat iti panunot ni John dagiti mabalin a napasamak ken ni Daniel ken ti pamilia daytoy. Inaramatna ida ken Jerky tapno malapdanna ti panangpatapuakda iti Presidente ti Filipinas. Ngem imbes a magunggonaanda, nagbaliktad dagiti pasamak ket isudan ti napabasol.
Babalawenna itan ti bagina. Saanna la koman nga inramraman da Daniel ken Jerky. Ammona met ti aramid ti CIA— a mangipakni kadagiti pagpeggadan ken pakairubuan ti ahensia, ngem no apay a kasla nalipatanna dayta idi.
Nagpingki dagiti sangina. Dinagsenanna ti panangpayatna iti siliniador ket sumiwsiweten ti luganna.
Pagam-ammuan ta napurar iti silaw nga imballatek ti rear view mirror. Timmaliaw iti likudanna. Adda napaspas a van a sumarsaruno kenkuana. Saanna nga inkankano daytoy. Ad-adda ketdi a pinapardasna ti luganna. Pumarpardas met ti lugan a mangsarsaruno kenkuana.
Nagduadua. Saan sa man a nairanrana ti kaadda dayta a lugan. Pinapardasna pay ti luganna ket iti umuna a kursada, kellaat a nagpakanigid. Inwekweknan ti siliniador. Kimmita iti rearview mirror. Awanen ti lugan.
I“SUROTEM!” immandar ni Agent Fleming iti drayberda. Nagtungpal ti drayber. Ngem iti kellaat a panagpakanigidda, sinabat ida ti nakabengbengbeng a tapok. Awan ti maanninawanna a silaw. Awen ti sarsarunuenda.
“We lost him, sir,” kinuna ti drayber. “Do we continue to pursue?”
“Yes!” imbugkaw ti Agent Fleming. Marurod unay. “Saan a mabalin a mayawawannatayo, maawatam?”
“Yes, sir!“Intuloy ti drayber a sinurot ti kalsada a tinurong ni John nupay narigat payen a makitana ti sanguananna ta nabungondan iti napuskol a tapok. Gimminad ti panagpatarayna.
“Operation Orient Express to base ops... do you read me, over,” inradio ni Agent Fleming.
“You’re coming loud and clear, Operation Orient Express... Status?” insungbat ti base.
“Orient Express is on the move, Base Ops... and we lost him, we need satellite support...”
“You’re just starting the operation and you’re losing control...”
“We won’t, sir... We’ll terminate Orient Express. But I need extra help. kabesado daytoy a lugar,” inlawlawag ti ahente.
Anges a nauneg ti nangngeg ni Agent Fleming.
Saanmi a
“Satellite is trying to pinpoint the area,“insungbat ti base ops. “Let me know if you get the picture...”
“Yes, sir...”
“I’m giving you all the logistical support you need, agent... And there is no room for errors, do you copy?”
“Loud and clear, sir. I promise, we will get rid of the target.”
“Update me as much as you can... Ulitek, saan a mabalin nga agkibaltangtayo. Ammomon ti maaramid no mapasamak dayta.”
Nagmaga ti karabukob ni Agent
Fleming. “C-copy that, Base Ops... over and out.”
“We have video, sir,” impakaammo ti maysa kadagiti taona nga adda iti likud ti van a mangbuybuya kadagiti monitor.
Naragsakan ti ahente. “Good! Update...”
“No moving vehicles within a mile radius, sir.”
“What do you mean? Imposible a naadaywannatayo iti maysa a milia. Addatay’ laeng iti likudanna itay. Check your monitor again if its working properly...” Makasuronen ni Agent
Fleming.
“I did, sir. Nothing is wrong with the monitor...”
Pagam-ammuan la ta nagiwes ti luganda. Sabalin ti turongenda. Agturongdan iti kataltalonan! Uray la a nagan-anit-it dagiti ligay iti panagpreno ti drayber.
“What the fuck is going on?” imbugkaw ni Agent Fleming.
“I’m losing control of the vehicle, sir,” kinuna ti drayber. “Nabtakan ti maysa nga akinsango a pilid.” Daytan ti naudi a naisawang ti drayber sakbay a nanartarusda iti kataltalonan.
MANIPUD iti pangatuen a paset ti kalsada, sipapardas ni John a nagsubli iti luganna. Inlukatna ti ridaw daytoy. Indissona ti M-4 iti passenger seat sa siiisem a limmugan. Nakitana ti lugan a mangsursurot kenkuana a nagbaliktad iti kataltalonan. Sigurado a saandan a masurotan pay— no asino man dagita a mangsursurot kenkuana. Nupay kasta, dakkel ti atapna a pasetda ti bunggoy dagiti agpanggep a mangdangran ken ni Daniel.
Pinasayagna ti luganna. Saan unay a nagbayag sa nakagteng iti pagtaengan ni Daniel. Awan ti silaw iti uneg ti balay ken nakaul-ulimek isu a pinilina nga imparking ti luganna iti ruar ti inaladan. Ginammatanna ti M-4 sa dimsaag. Inyabadayna ti M-4. Ket bayat ti naannad a yaasidegna iti balay, as-asutenna met ti Glock .45-na sa ti plaslaytna.
Nagragutok ti barukongna iti pannakakitana iti nadadael a ridaw a nakalukat. Simmirip. Awan ti makita wenno mangngegna a pagilasinan ti kaadda ti tao. Naladaw ngatan?
Impaturongna ti flashlight iti uneg sa nakaan-annad a simrek. Nakitana dagiti naudatal a tao. Simmidap dagiti matana ken pinatademna ti panangdengngegna. Ngem nupay nakain-inayad ken nakaan-annad dagiti paddakna, nakapayat iti nalkab a tabla. Kellaat met a nagranipak ti paltog.
Dagus a nagkul-ob. Pal-idan pay dagiti sumanengseng a bala ti lulonanna. “Sige, sumrekka ta patayenka met a kas kadagiti kakaduam!” inriaw ti maysa a lalaki.
Nalasin a dagus ni John ti timek. “Daniel!” impukkawna.
“John?” naisungbat. Kapkapnekanen ni John a ni Daniel. “Manong John... Sika dayta?”
“Wen!”
“Sorry!”
Timmakder ni John. Nagturong iti naggapuan ti timek. Kasla naggugubatan iti aglawlaw. Agkaiwara dagiti nabuong a sarming ken nalnalkab a tabla—nga ammona lattan a naggapu iti kayo nga agdan.
Immasideg ni John iti agdan. Impaturongna ti flashlight iti ngato. Apagisu a nagdisso ti lawag daytoy iti rupa ni Daniel a nakatugaw iti akinngato a pangal. Lupaypay dagiti abagana. Daradara ken linussok ti sumagmamano a bala ti aruatenna. “Are you okay?” kinunana.
Masadsadut ti tung-ed ni Daniel. Iggemna pay laeng ti paltogna ngem intugkelna daytoy iti pangal a paypayatenna. “Ngem ti pamiliak...” Saanna a naituloy ti kayatna nga ibaga.
Ammon ni John a dakes ti napasamak iti pamilia ni Daniel, ngem nagsaludsod latta. “Apay, ania ti napasamak?” Sagdudua ti panagpangalna nga immuli iti maikadua a kadsaaran.
“Awandan...” arig arasaas ngem napnuan sanaang ti timek ni Daniel. Liningayna ti maysa a kuarto.
Naawatan ni John nga adda sadiay ti pamilia ni Daniel. Mangemkemkem a nagturong iti main bedroom. Sa napan iti CR idi dina makita dagiti agiina ni Daniel. Iti uneg, iti ngimmisit ti labagana a bathtub, nakitana ti nakaam-ames a nagbanagan dagiti agiina ni Daniel.
Naglingaling. Ngarngaretngetennan dagiti sangina. Adun ti nasaksianna a collateral casualty iti pananggubatda iti terorismo ngem maysa daytoyen a kaaamesan nga ipapatay.
Dina nagawidan ti nagsanaltek gapu iti rurodna. Nagsadag iti diding ti banio. Dinanogna ti diding. Nakapigpigsa. Uray la a nagdara ti gemgemna.
Nalagipna ni Jay-ar ken ti inana. Sumagmamano metten a gundaway a ginandat dagiti kabusorna ti mangisikat kadakuada ngem napaayda. Ngem kasanon no agballigida? Agbanag ti inana ken ti anakna a kas iti pamilia ni Daniel? Nakemkemna dagiti sangina. Inruarna ti selponna ket uray no nakasapsapa pay laeng a parbangon, inawaganna ni Jay-ar.