Angkel Dok (12)

Ansong. Ania ‘ta unspoken kada yutot a kunkunam?

“You taught my heart how to dream…” Nagkuridemdem ni Baket Sianang ket inyayugna ti kanta nga In Despair nga uso iti panawenda.

Naggarakgak ni Angkel Dok. “Naay, adda pay la daydi bosesmo idi balasitangka pay!” kinunana.

Naggarikgik met ni Baket Sianang. Nagkuridemdem a kasla malidayan. “Unspoken, arem-mata bain baga. ‘Nimal, puro pormaka ngamin idi. No bisukol koma ti suerte, umuli la ngaruden iti gurongmo, iwalinmo pay laeng.” Nagdanggay ti katawa dagiti dua. “Sika ngamin, kanayon nga umayka, awan met ibagbagam iti daydi manang. Adda met riknana kenka. Puro regaloka met iti kaggo ken barungrong. Isu, nagtapuak iti daydi Kayong Ansong a boksingero kano ngem knockout met iti arak!” Naggarakgak manen ni Baket Sianang.

Napitpit ti isem ni Angkel Dok. Nagsayangen dagidiay a gundaway, insennaay ti unegna. Ket nalagipna daydi panangpaspasiarna ken ni Mary dita Turod, ti purok iti abagatan ti sentro, uray tiempo ti nepnep. No masulit idi nga agtalaytay iti tambak, agsakay iti nuang sananto iparnged ti ayup iti alad ti kiskisan ni komparina a Tacio dita Palagao.

“Agurayka…” pinababa-pinangato manen a kinita ni Baket Sianang ni Angkel Dok. “Langa ken panagkawkawesmo pay laeng, madlawen a bimmaknangka, Mang Angkuan!”

Nagkatawa ni Angkel Dok. “Jani, kunam metten, a!” kinunana.

“Mano met ti naputotmo?”

Nagkatawa iti nakapsut ni Angkel Dok. “Baroak pay, kunak ngaruden!” Nagmulagat ni Baket Sianang. “Alla, apo! Agingga ita, unspoken-ka pay laeng?” “Ammom, impamaysak ti nangged ken nagurnong idiay Manila tapno nataltalged ti panagpamiliak. Ita, nakasaganaakon,” insungbat ni Angkel Dok.

Napunas ti isem ni Baket Sianang. “Kayatmon ti mangasawa, kasta? Apay ngarud a ditoy ti immayam? Dimo kuna a kayatmo nga asawaen ni Ullang! Kasano a naamammom ‘ta anakko?”

“Barkada ni Jigo, isu a barkadak metten!”

Nagkatawa ni Baket Sianang. “Nakibarkadaka iti ubbing? Kayatmo ti mangasawa iti ubing? Alla, agpipiek, kunadan, a! Ti kunam, kabaelam pay? Dugyot!” Sinipat manen ni Baket Sianang ti takiag ni Angkel Dok.

“Uray, a, ta adda met kuartak!” inkatawa ni Angkel Dok.

“Saan a ti kuartam ti kayatko a sawen! Kayam pay ti labinglabing?”

“Diak inabuso ti bagik. Isu nga inurnongko ti natgedak, inurnongko met ti pigsak!” Naggarakgak manen ni Baket Sianang. “Apay, kasla banko? Mabalin nga urnongen sa iruar no kasapulan? Deposit, deposit, deposit, widro! Sabagay…” Nagtungtung-ed ni Baket Sianang. “Sus, diak ma-imagine, Mang Angkuan!”

“Jani, kunam!”

“Timmarabitka payen! Sabagay, uray idi mannanaoka met. Ti laeng ay-ayatenka ti dimo mabalikas!” Naggarikgik ni Baket Sianang.

Talanggutang, inridis ni Angkel Dok iti unegna. Isu met nga adda nagbanurbor a motorsiklo. Idi tuman-aw, dina magustuan ti nakitana. Kurkuraban ni Eula ti iggem ti kanawanna a liningta a mais idinto a nakarakus ti kanigidna iti siket ni Jigo ket mairidridis ti barukong daytoy iti bukot ti apokona.

“Addan ti nalaing nga anakko!” kinuna ni Baket Sianang a bulonna a timmakder. “Agurayka ta paramanak tapno agnakem daytoy nga ubing!”

Ngem idi yawat ni Eula ti dua a supot ken ni Baket Sianang, kunam la no nagbukar a sabong ti karabasa dagiti bibigna iti panagrungiitna.

“O, pamigatyo… ginatang ni Jigo!”

“Ay, nagsingpet nga ubingen!” kinuna ni Baket Sianang a bulonna a nangawat kadagiti supot. “Immala ken ni lolona!”

Nagkatawa ni Angkel Dok ngem nagsennaay ti unegna. Ammona a ti impaiggemna ken ni Jigo a paghalohaloda iti Edison’s Ungot ti pinagpabor ti apokona. Ket siguradona a saan nga imbaga ni Jigo a kuartana ti inggatangda. Ngarud, plus one wenno plus two pabor ken ni Jigo.

“Ay, prito a payak ti manok ken pansit!” inkatawa ni Baket Sianang ket di payen nagpakada ken ni Angkel Dok idi mapan iti kosina.

Ad-addan ti panagduadua ni Angkel Dok idi sumango kenkuana da Eula ken Jigo. Kasano ngamin ket imbes a mangguyod ni Eula iti pagtugawanna, nakikatugaw ketdin ken ni Jigo ket kurang laengen a sakloten daytoy ti kapatadanna. Ania ngarud, adda natipping iti rikna ni Angkel Dok ken ni Eula. Isu a saan a nagbayag, timmakder ket tinung-edannan ni Jigo.

“Naay, nagbiitkayon, angkel?” kinuna ni Eula.

“Ni nanangmo?” sinaludsod ketdi ni Angkel Dok.

“Inang, mapan kanon da Angkel Jani!” inyawag ni Eula.

Simmirip iti ridaw ni Baket Sianang nga agkabkabukab. “Halla, na-nagsafa fay!” nagbuabo ti nakalanlanit a subsob ti baket iti pannakapusek ti ngiwatna iti pansit. Nagtilmon ket uray la nabennat ti tengngedna.

“Mapanak met makitienda,” insungbat ni Angkel Dok. “Intan!” Tinung-edanna ni Jigo.

Ngem idi tumpuardan iti highway, imbilin ni Angkel Dok nga agpakanawanda ta agawiddan.

Nasangpetannan da Manang Tina ken Lakay Lito. Naipakni payen ni Manang Tina dagiti ginatangna a kasapulanna iti kosina ken sabon a paglabana iti makadominggo. Naglayon metten ni Jigo iti balayda idi maidissaagna ni Angkel Dok.

“Komusta ti lakadmo, bayaw? Adda nasaruagam?” Indisso ni Lakay Lito ti basona a napno iti Coke iti mesita. Inkudkodna ti tammudona iti nagbabaetan dagiti ramay ti sakana.