Ita a Paskua, Kasaritam Man Met ni Apo Dios
Ania ti naespirituan a panaginana?
“Nagsubli dagiti apostol iti yan ni Apo Jesus ket impadamagda kenkuana dagiti amin nga inaramid ken insuroda. Masublasublat nga umay ken pumanaw dagiti tattao iti yanda ket dida pay masangon ti mangan” (Marcus 6:30). Daytoy ti gapuna a kuna ni Apo Jesus kadagiti apostoles, “Intayo iti maysa a disso tapno makainanatayo” (Marcus 6:31). Nadlaw ken narikna ni Apo Jesus a nabannog dagiti apostol kalpasan ti napaut a tiempo a panagyanda iti lugar a nagmisionanda. Daytoy ti gapuna nga inkuyog ni Apo Jesus dagiti apostol iti maysa a naulimek a disso ket sadiay, naginanada.
Iladawan daytoy nga inaramid ni Apo Jesus kadagiti apostol a kas met iti pisikal a panaginana, pumanaw ti tao iti masansan a yanna wenno pagtrabahuanna ket mapan iti maysa a lugar. Aginana sadiay agingga a mapasublina manen ti pigsana a mangituloy iti trabahona.
Kastoy met laeng ti naespirituan a panaginana. Mapan ti tao iti maysa a naulimek a lugar ket sadiay nga aginana. Ngem daytoy nga ipapanna iti maysa a naulimek a lugar ket saan laeng a tapno makainana. Ngem tapno adda panawenna nga agkararag. Ikkanna ti bagina iti umdas a tiempo a makisarsarita iti Dios.
Mapantayo iti maysa a naulimek a lugar nga awan ti makasinga. Sadiay, makisinnarak ken ni Apo Dios babaen ti panagkararag wenno iti simple a panagulimek. Uray no kanayon a mangngegtayo nga ibagbaga dagiti tattao a ti ‘Dios, adda iti amin a disso’ nga agpayso met, kasapulan a kasinnarak ti Dios iti naisangsangayan a wagas. A bayat ti panaginana, saantayo a liplipatan ti umasideg iti Apo. Ngarud, ti naespirituan a panaginana, isu ti tiempo a panangpabaro iti naespirituan a kinataotayo; palubosantayo a mataraonan ti kararuatayo kadagiti balikas ti Apo. Umasidegtayo iti sidong ti Dios. Riknaentayo ti kaadda ti Apo kadatayo iti panagulimek, iti gagangay a panagpagnapagna laeng iti naulimek nga aglawlaw.
Uray no ibagatayo a napigsatayo nga agtrabaho, adda dagiti kanito wenno gundaway a kasla awan kaipapanan dagiti araramidentayo. Para tungpal-bilin laengen dagiti maileppastayo a trabaho gapu ta nabannogtayo unayen nga agtrabtrabaho. Awanen ti kaipapanan ti panagtrabaho. Awanen ti kaipapanan dagiti ar-aramidentayo. Ipagaruptayo pay ketdin a naggapu a mismo kadatayo ti pigsatayo nga agtrabaho. Malipatantayo nga adda ti Dios. Kasapulan nga aginanatayo.
Panawen a makisinnaraktayo iti Dios ti naespirituan a panaginana. Mariknatayo, iti kakastoy a tiempo, ti naun-uneg a pannakilangentayo iti Apo.
Ti panaginana iti sidong ti Apo ket isu ti panangyawattayo kadagiti amin a rigat, bannog ken panagsagaba bayat iti inaldaw a panagtrabtrabaho. Yawattayo iti Dios ti riknatayo; ti amintayo. Luktantayo ti puso ken panunottayo. Panawen tapno umasidegtayo manen iti Apo ket ituloktayo ti bagitayo a mataraonan iti balikas ti Dios. Dawatentayo a papigsaennatayo ti Dios.
Adda kadi rumbeng nga isagana?
Kalpasan ti panangpilitayo iti maysa nga aldaw wenno adadu pay nga aldaw a panaginana, luktan ti puso tapno marikna ti anag ti aramiden a naespirituan a panaginana. Masapul nga awan sabali a panunoten no di laeng ti panaginana; ti panagkararag. Pagtalnaen ti rikna, panunot ken nakem. Awan sabali a panunoten. Lipaten dagiti saan pay a nalpas a trabaho. Ited ti oras iti Dios laeng.
Marigatan a makisinnarak ti maysa a tao iti Dios no napno ti pusona kadagiti nagduduma a pakaseknan ditoy a lubong. Lipaten uray apagdarikmat laeng dagiti agsisimparat a pakarikutan ti panunot, gura ken dadduma pay a kaaspingna a bambanag a mangipanaw ti imatangtayo iti Dios. Ipamaysa a kasinnarak ti Dios iti tiempo ti naespirituan a panaginana.
Panagpakumbaba ti kasapulan iti tiempo ti naespirituan a panaginana. Gun-odentayo daytoy a kinapakumbaba babaen ti panangisuko iti kinatao iti Apo. Ikkaten ti galad a kinatangsit, panaginkukuna, panangrukod iti kaadda ti Espiritu ti Dios a makilanglangen bayat ti pannakisinnarak/panaginana. Masapul a mabukel ti maysa a panggep sakbay a malpas ti naituding a tiempo ti naespirituan a panaginana. Ipamaysa a kasarita ni Apo Dios. Riknaem ti kaadda ti Dios. Palubosam ti nakemmo a lapunosen ti bileg ti Dios.
Kasla mangmangngegko pay laeng ti maysa a paset ti panangyam-ammo kadakami ti panggep ti naespirituan a panaginana ni His Eminence Orlando Cardinal Quevedo, OMI, DD, idi addakami idiay Betania Retreat House. Kunana, “Denggem dita pusom ti ibagbaga ti Espiritu Santo. Managpasangbay kadi dayta pusom iti Sao ti Dios? Ngem uray no pasangbayenna ti Sao ti Dios ngem baybay-anna a matay... No marigatan a mangpasangbay iti Sao ti Dios dayta pusom, kasapulam ti aginana. Makisarsarita iti Dios. Amangan no napno dayta pusom kadagiti pakaringgoran iti daytoy a lubong.”
Ti panaginana—pisikal man wenno naespirituan, masapul nga aramiden ti tunggal tao. Gapu ta babaen daytoy a panaginana, saan laeng a mapasubli ti napukaw a pisikal a pigsa, mapasubli pay ti pannakilangen iti Dios a paggapgapuan ti amin a pigsatayo.
Ita a Paskua, padasem man met ti makipaginana, makisarsarita, ken agkararag iti Dios.—O