Ni Margie ti 2019 Filipino Business Woman of the Year
sinaranget dagiti propesional a Filipino a nagsangpet iti Hawaii idi ngalay ti 1970s ken umuna a paset ti 1980s. Maysa ni Margie Alcon Berueda ti nakibakal iti dayta a ranget.
Nupay maysan a rehistrado a nurse ni Margie idi simmangpet iti Hawaii idi 1983, saan a napalubosan a nagakem iti sigud nga akemna a nurse idiay Northern General Hospital idiay Siudad ti Laoag. Imbilangna dayta a karit iti kinatao ken propesionna. Iti simmaruno a tawen, nairuarna ti eksamen a para kadagiti nurse.
Nupay ti mangaywan ken mangagas kadagiti addaan iti sakit ti immuna nga arapaapna, saan a nagsarday a nangbirok iti wagas tapno ad-adda ti maipaayna kadagiti tattao, nangruna kadagiti nataengan.
Idi sumagpat ti 2000s, agparikut ti gobierno ti Hawaii ti pannakaaywan dagiti masakit nangruna kadagiti nataengan. Dakkel unay ti magasto kadagiti ospital ket masapul ti wagas a maibaba daytoy a saan a makissayan ti umno a pannakataripato dagiti pasiente/masakit.
Iti dayta a gundaway, idi 2002, impasdek ni Margie Berueda ti MB Case Management, maysa nga opisina a mangpennek ti pannakaipatungpal ti pannakaaywan dagiti masakit iti ruar ti ospital wenno kadagiti care home—wenno kas iti annongen dagiti ospital
Narisgo daytoy nga addang iti biang dagiti nurse. Dakkel daytoy nga addang a mabalin a maitaw-ang no bilang agkibaltang.
Ngem natibker ti pammati ni Margie iti bukodna a kabaelan. Ket no bilang agballigi, agbalinto daytoy a pagrukodan iti kabaelan ni Filipino iti daytoy a benneg.
Nangrugi ni Margie a nangopisina iti pagtaenganna: tallo ti adda iti opisina, dua a consultant a nurse, uppat a nurse a mapan mangkita kadagiti masakit nga adda iti pagaywanan, ken dua a social worker.
Iti laksid ti kinaadu ti bangen iti pannakatarawidwid ti kastoy nga opisina, nalaktawan amin daytoy ni Margie. Dimmakkel ti opisinana; immakar iti Century Square iti puseg ti siudad. Kalpasanna, immakar iti nalawlawa nga opisina iti Waipahu.
Iti sabali a bangir, gapu iti nagduduma a rason, adu met dagiti marigatan a lumaktaw.
Kas maysa a tao a mannakaawat ken mangtaliaw iti panangtulong kadagiti padana iti daytoy a benneg, inkeddeng ni Margie Berueda a makiragup kenkuana dagiti dadduma a case management ket binukelna ti Residential Choices, Inc. (RCI)—a nagpaayanna a Presidente ken Chief Executive Officer.
Gapu iti kinapardas ti idadakkel ti RCI ken kinaadu ti matultulongan daytoy iti komunidad, impaay ti Filipino Chamber of Commerce of Hawaii ken ni Margie ti pammigbig a kas 2018 Filipino Entrepreneur of the Year, 2018 Outstanding Woman Achiever manipud iti Filipino Women’s Club, kdp.
Iti daytoy a tawen, impaay ti Filipino Business Women’s Association (FBWA) ken ni Margie ti 2019 Filipino Business Woman of the Year. Naaramid ti pasken itay Nobiembre 9, 2019 iti Ala Moana Hotel, Honolulu, Hawaii.
“Maysa a pagtamdan ditoy Hawaii, nangruna kadagiti Filipino, ti gapuanan ken balligi ni Margie A. Berueda. Rumbeng unay daytoy pammigbig a maipaay kenkuana. Sapay koma ta adunto ti makasurot iti tugotna,” kinuna ni Fe Edita M. Velasco, presidente ti FBWA.
Iti biang ni Margie, kinunana a dakkel ti naitulong ni Michael, ti kaingungotna, iti pannakaragpatna iti daytoy a benneg ti serbisio ken negosio. Maysa a Civil Engineer ken Geodetic Engineer ni Michael, ken lisensiado a Land Surveyor iti Hawaii. Taga-Bacolod ni Michael ngem nagsabatda idiay Sarrat, Ilocos Norte, ti ili a nakayanakan ken dinakkelan ni Margie, idi ni Michael ti nangiwardas iti Cadastral Survey ti Sarrat. Adda tallo a bungada.—O