Agbalin a Kabsatko ti Anakko?
Dear Ikit,
Bugbugtongak nga inanak. Naited amin a pagayatak ta adda met panglawaen a taltalonen dagiti nagannak kaniak. Pinagbasadak iti kolehio iti kabesera ti probinsiami ta diak met maitured ti umadayo kadagiti nagannak kaniak kasta met kadakuada. Isu a kaaduan ti panangkadkadua ni nanangko kaniak iti kaserak, agingga ti nairuamak met laengen iti biag ti pagkaseraak.
Gapu iti wayawaya a naited kaniak, immadu ti nagrayo itoy numo. Nakiboyfriend-ak iti kaeskuelaak nga adda dagiti nagannak kenkuana idiay Amerika. Saan pay a simmurot ta ileppasna kano pay ti panagadalna.
Naikawakami. Pinagsardengdak a nagbasa dagiti nagannak kaniak idi madlawen ti kaadda ti im-imetek a biag. Inyawiddak diay yan ti talonmi a dagidiay katalonanmi laeng ti kaarrubami, agingga ti naipasngayko ti maysa a nalungpo a maladaga a lalaki a manmano laeng ti makaammo. Gapu ta partera/mangngilut a baket a sinanay ti gobierno ti nangpaltot kaniak, saan pay a nairehistro ti anakko ngem addan pirmana idiay porma ti Registry of Birth.
Kayatda da tatang ken nanang a ti anakko, mairehistro a kas anakda ket ngarud, agbalin a kabsatko. Natungpal kano amin a pagayatak ket ita, isuda kano met ti matungpal.
Kalpasan ti panagtanggadko, pinagtuloydak met laeng a nagbasa ngem iti sabali a kolehio iti kabangibangmi a probinsia. Sinapulko ti ama ti anakko ngem adda kanon diay Amerika.
Ania ti aramidek, ikit? Ipalubosko kadi nga agbalin a kabsatko ti anakko ket dagiti nagannak kaniak ti mairehistro a nagannak kenkuana?—Lovely
Dear Lovely,
Naikawakayo, ngem ania ti inaramid ‘ta boyfriend-mo idi impanawdaka dagiti nagannak kenka? Sinapulnaka kadi ? No awan pay kommunikasionyo agpapan ita, lipatemon ta awan ti ilalana iti ayan-ayatyo agraman iti bungayo.
Maipanggep iti pannakairehistro ‘ta anakmo, sika ti mangpili no ania ti nasaysayaat a masakbayanyo nga agina. Late Registration ti maaramid ket ad-adu ti papel a maaramid agraman affidavit.
No irehistro dagiti nagannak kenka a kas kabsatmo, no awan la ket ti agriri iti masanguanan nga aldaw mabalin met, ngem ania man a sanikua da tatang ken nanangmo, agguduakayonto iti tawid. Mailisika pay bassit iti pannakaibabain ta nalimed ngarud ti panagpasngaymo.
Ti pagduaduaantayo, amangan no dumteng ti aldaw a tuntonen ti ama ta anakmo ket agriri iti pannakairehistrona; maaddaan iti kaso dagiti nagannak kenka. ‘Tay kunada a “Simulation of Birth”wenno darum iti pannakapeke ti birth certificate ‘ta anakmo. Sabagay, nalawag met nga abandonment ti inaramidna no kas pagarigan agriri.
No kas pagarigan piliem a sika ti mairehistro nga ina ta anakmo, ay-aywem da tatang ken nanangmo nga isuda latta ti mangtagibi, ken mangaywan iti anakmo. Apeliedoyo ti maaramat, isuratmo ti nagan ni amana ngem ikabilmo a “NOT MARRIED’’ tapno iti kasta, no makapanunotto ti ama ti anakmo a mangala kenkuana uray no nakiasawakayon nga agpadpada ti sabali, nalaklakanton a makapan idiay Amerika no awan pay la ketdi ti 21 a tawenna.
Saanak nga agdesision ta agpada a pagsayaatanyo nga agina dagitoy impalawagko, kaanakan. Sika ti mangeddeng.—Ikitmo