Kaano a Pakanem Dagiti Uken?

SAAN a gamden ti nasapa a panangipusing wenno panangpakan iti solido a taraon kadagiti uken no di pay nakasagana dagitoy. Nasken a paliiwen dagiti uken no nakasaganadan a mangan iti solido.

Dakkel ngamin ti epekto kadagiti uken agingga iti panagdakkelda a pakairamanan ti pisikal ken emosional a salunatda no ipilit a pakanen dagitoy iti solido a taraon no saanda pay a nakasagana. No nasapa a maulila dagitoy, adda dagiti taraon nga ipatigmaan dagiti beterinario a maited kadagitoy.

Kadawyan a nakasaganan a mangan iti solido a taraon dagiti uken no madanon ti innem agingga iti walo a lawas manipud iti pannakayanakda.

Madlaw ketdi a makiinnagaw dagiti uken iti maidasar a taraon ti inada no madanonda ti maikapat agingga iti maikalima a lawasda. Nupay kasta, dina kayat a sawen a mabalinen nga ipusing dagitoy. No man umagaw dagiti uken iti taraon a naidasar iti inada, kayatna a sawen a naaktiboda. Paliiwen ketdi no agpayso a kabaelanen dagiti uken ti maipusing.

Padasen a pakanen iti solido a taraon dagiti uken no madanonda ti innem a lawas. Nayonan ti namaga a solido a taraon iti apaganem-em a danum wenno gatas tapno nalaklaka a matunaw iti tian dagiti uken.

Saan ketdi a nalabes ti kaadu ti danum wenno kaaduen ti gatas nga ilaok ta mabalin nga adda epekto daytoy iti tian ti aso. Kasla ngamin purga ti pagbalinan ti gatas no adu ti ilaok iti taraon.

Saggabassiten ti ilaok a gatas tapno saan unay a nabasa ti taraon nga ipauneg dagiti uken.

Mabalinen a saan a mapalukneng ti ipakan kadagiti uken kalpasan ti pito agingga iti walo a lawas kalpasan ti pannakayanakda. Mamitlo a pakanen dagitoy iti inaldaw ken saan a liplipatan nga ipaayan dagitoy iti nadalus a danum nga inumenda.

Kadawyan pay a nasapsapa a maipusing dagiti uken no aduda a yanak ti maymaysa nga ina. Daytoy ti rason a kanayon a paliiwen dagiti uken ken yuman iti beterinario no adda madlaw a parikut.

Mabalin pay nga ipusing dagiti dumakdakkel nga uken no mapaliiw a kabaelandan ti agwaywayas wenno umadayoda kadagiti kakabsatda nga agay-ayam, makiinnagawda iti taraon, ken umasideda iti tao nga is-isuda.—O