Ipennek da Mayor Isko ken Yul Servo ti Tumulong
KARAMAN ni Diputado Yul Servo iti pelikula a “Food Lore: Island of Dreams” a naaddaan iti iti 32nd Tokyo International Film Festival iti Japan. Indirehe ni Erik Matti, karaman ti nasao a pelikula iti World Focus Powered by Aniplex a paset ti food anthology series ti HBO Asia. Kakadua ditoy ni Diputado Yul da Angeli Bayani, Ina Feleo, ken Joey Marquez.
Iti innuman ti prensa ken ni Diputado Yul, nadakamatna a pagaayatna ti ginisar a paria nga adda itlogna. Simple laeng ken naimas uray awan ti innapuy.
Innayonna a kalakaan para kenkuana a lutuen ti itlog ken saan a napili iti panganan a restauran. Liklikanna ketdi ti rasa ta adda alerdyina iti daytoy. Pagaayatna met a sinam-it ti leche flan.
Iti sabali a bangir, nadakamat ni Diputado Yul a manipud nagtugaw a pannakabagi ti distrito, salun-at latta ti kangrunaan a parikut ti siudad.
Sigud a kinadalus ti parikut ngem gapu iti panangipangruna ni Mayor Isko Moreno iti kinamanagdaldalus, in-inuten a nadalusan ti masakupan ni Diputado Yul. Kinapudnona, immuna a pinadalusan ni Yorme Isko ti masakupan ni Diputado Yul kas iti Divisoria, Carriedo, ken Blumentritt.
Naistoria pay ni Diputado Yul nga agiwarwarasdan iti “nutribun” kadagiti estudiante kadagiti para publiko nga eskuela. Saan pay ketdi a “todo” ta agkurang pay laeng ti pondo nga us-usarenda. Inton 2020, ipennekdan daytoy a programa ta addanton pondona.
Kasta met nga addan alawans dagiti adda iti Grade 12 ken dagiti estudiante iti kolehio. Uray dagiti PWD, solo parent ken senior citizen, adda metten binulan nga alawansda. Malaksid iti daytoy, mabalinen nga agtrabaho dagiti senior citizen kadagiti fastfood restaurant.
Maragsakan ni Diputado Yul kadagiti panagbalbaliw a napasamak iti siudadna, ken maragsakan ta ad-adu pay ti mapasamak a panagbalbaliw iti 2020.—O
Naisangsangayan daytoy nga album ni Joel ta adda dua a Tagalog a nailaok—ti “Pangako Sa ‘Yo” ken “Sabi Mo Noon.”
* * *
Saan a nakakaskasdaaw ti panagiray ni Joel iti musika. Kadagiti dadakkelna a da Pedro Tolentino ken Primitiva Sarmiento, ni nanangna ti nakatawidanna iti laingna a kumanta. Kabsat ni nanangna ti mabigbig a singer-composer a ni Amancio Sarmiento. Kakasinsinna met dagiti Ilokano recording artists a da Rosanna Sarmiento ken Juliana Sarmiento.
Tubo ni Joel iti Brgy. 4-B Aring, Badoc, Ilocos Norte ken maikawalo iti siam nga agkakabsat. Nayasawa met ken ni dati a Jane Cristobal ken addaanda iti tallo nga annak, da Jeno, Jade ken Jabin. * * *
Saan laeng nga iti musika ti paglatakan ni Joel. Am-ammo pay daytoy iti tay-ak ti negosio. Kas negosiante, nakaawaten kadagiti pammadayaw manipud kadagiti komunidad Filipino iti Hawaii. Aktibo met kadagiti organisasion a kas iti Samahang Ilokano Associacion iti Hawaii ken Oahu Filipino Council of Hawaii.—O