Isublitayo Koma ti Pudno a Kaipapanan ti Paskua
MABIGBIG ti Filipinas a kabayagan a mangramrambak iti Paskua iti sibubukel a lubong— mangrugi iti umuna nga aldaw ti Septiembre nga aggibus iti Enero 6 iti sumaruno a tawen.
No matapoganen ti umuna nga aldaw ti Septiembre, mangrugi metten a maipatangatang dagiti kanta ti Paskua ( Maituloy iti sumaruno a panid )
kadagiti mall ken estasion ti radio. Madekorasionan metten dagiti balay, kalsada, parke, ken dagiti nagduduma a lugar.
Mapaliiw nga iti daytoy a kabayag ti panangrambak ti Paskua, maipukpukkaw met ti “Naragsak a Paskua ken Narang-ay a Baro a Tawen.”
Panawen pay ti panangted ken panangawat kadagiti sagut, pannakaidasar dagiti nabaknang a taraon, ken dadduma pay a wagas ti panagrambak.
Makaparagsak dagitoy a maar-aramid. Nupay kasta, dagitoy met ti manglinglinged iti napaypayso a kaipapanan ti Paskua. No dadduma malipatantayo pay ketdin a naisangrat daytoy a panagrambak iti pannakaipasngay ni Jesus nga anak ti Dios.
Malipatantayon a maysa nga okasion ti Paskua a panagbabawi kadagiti basol, panangabaruanan, ken panangpabileg iti biag. Naisangsangayan daytoy a panawen a panagragragsak ta imbaon ti Dios ti anakna ditoy daga nga indirdir-i dagiti pastor, mamasirib a tattao, ken dagiti anghel. No ngarud amirisen ti agdama a pannakaselebrar ti Paskua, saanen a maramrambakan iti napudpudno a kaipapananna. No saludsoden kadagiti ubbing ti kaipapanan ti Paskua, ti Christmas tree, aggilapgilap a silaw, ken panagsisinnagut ti isungbatda.
Iti daytoy a panawen ti materialismo ken komersialismo, saan pay a naladaw a nasken nga ipaanag kadagiti ubbing ti orihinal ken napaypayso a kaipapanan ti Paskua. Rumbeng laeng a maipalagip iti uneg ti pagadalan babaen dagiti mannursuro, kangrunaanna kadagiti pagtaengan ken uray kadagiti pagiwarnak, radio, telebision, ken social media.
Maysa a gundaway ti panangrambak iti Paskua tapno maipasagepsep kadagiti ubbing ti kinamanagayat ti Dios. Ipaanag kadagiti ubbing ti kinapateg ti nalinteg a panagbiag ken pannakamuli ti makaay-ayo a galad tapno maipaamiris kadakuada ti napudpudno a kaipapanan ti Paskua.
Babaen dagiti dekorasion ti Paskua, mabalin nga ipalagip kadagiti ubbing ti simbolismo dagitoy a bisti. Kas koma ti Christmas tree. Naiturong ti tirad ti kayo iti langit a mangipalagip iti pannakaidanon dagiti kararag iti Dios. Berde met ti marisna a mangisimbolo iti namnama.
Isimsimbolo met ti sinambituen ti bituen a nangsilnag iti nakaipasngayan ni Jesus. Itaktakderan ti bituen ti pannakaipatungpal ti kari a pannakaiyanak ti kakaisuna nga anak ti Dios. Madakdakamat a ti bituen ti nangsilsilaw iti dalan dagiti napan nagrukbab iti maladaga sadiay Belen.
Isimsimbolo met ti masindian a kandela no dumteng ti Paskua ni mismo a Jesus a kas silaw ti lubong. Ni Jesus ti makunkuna a mangsilaw iti dalan dagiti maiyaw-awan iti kasipngetan.
Itaktakderan dagiti sagut ti panagpipinnateg iti tunggal maysa. Ipalagip pay daytoy nga inted ti Dios ti bugbugtong nga anakna tapno isalakannatayo iti dakes.
Idi simmarungkar dagiti mamasirib iti Belen, nangtedda iti sagut a balitok, insenso ken mira.
Iti aglaplapusanan a panagayat ti Dios iti lubong, insagutna pay ti kakaisuna nga anakna.
Dagitoy ti rason nga agsisinnaguttayo no dumteng ti Paskua. Dagiti anghel ti nangidirdir-i ti nagloriaan a pannakaiyanak ti Mesias. Daytoy met ti rason nga adda latta imahen dagiti anghel a maibisti no dumteng ti Paskua.Dagitoy anghel ti nainlangitan a mensahero a nangipukpukkaw iti: “Gloria ti Dios iti Kangatuan! Sumangbay koma ti talna ken panagpipinnateg iti tunggal maysa!”
Makunkuna a saan paset ti orihinal a Paskua ni Santa Klaus. Ngem isimsimbolo ni Santa Klaus ti nalimed a panangipaay iti sagut a saanen a napateg a maammuan pay ti nakaawat.
Isublitayo koma ti umisu a kaipapanan ti Paskua babaen ti panangipalagip kadagiti ubbing a ni Jesus ti pudpudno a makaigapu no apay a kastoy ti karungbo ti panangrambaktayo iti Paskua.—O