Saludsodem ken ni Apo Hues
SALUDSOD: ldi Hunio iti daytoy a tawen, nangpaangay iti eleksion ti presidente ti municipal federation-mi a senior citizen, kas imbaga kano ni Apo Mayor. Iti nasao nga eleksion, daytoy presidentemi, isu met laeng ti nabotosan a pangulo ti municipal federation-mi. Pinagsapata ni Apo Mayor agraman dagiti kakaduana a nabotosan.
Ngem sumagmamano kadakami a presidente ti barangay federation ti nagprotesta ta maikontra iti Constitution-and-by-Laws ti National FSCAP ti naaramid. Ngamin, iti koma Pebrero a maangay ti eleksion ti municipal federation. Iti suratmi iti Federation of Senior Citizens Association of the Philippines wenno National FSCAP, kiniddawmi a maikkat wenno masuspende koma dagiti nagbasol.
Gapu ta dakayo ti maikadua a kangatuan a pangulo ti nasional nga asosiasion dagiti senior citizen ken dakayo met ti am-ammomi babaen ti Bannawag, nagturedkami a nagsurat kadakayo, Apo Hues, ta bareng malawlawagankami iti daytoy a reklamomi. Ania kadi ti makunayo iti reklamomi? Sapay koma ta desisionanyo iti mabiit daytoy, Apo Hues. --Manuel Abuan ken kakaduana, Probinsia ti Tarlac
SUNGBAT: Ti darumyo, impatulodyo ken ni nagpaso a presidente ti National FSCAP (taga-Cagayan). Gapu ta saanen nga isu ti agdama a presidente, impatulodna ti darumyo iti baro a presidente a taga-Cagayan de Oro a nabotosan idi laeng Hunio. Inikkanna pay iti kopia ti sekretaria ti National FSCAP (taga-Palawan). Natratar daytoy darum wenno reklamoyo idiay Mandaluyong City idi naaramid ti miting ti National FSCAP idi maikadua a lawas ti Nobiembre iti daytoy a tawen. Kas agpapaay pay a legal adviser ti pederasion, intedko ti komentariok a kastoy:
Amin a problema dagiti senior citizen iti barangay, imbestigaren ken risuten ti municipal federation. Dagiti problema ti municipal federation, ti met provincial federation ti mangiggem. Dagiti met problema ti provincial federation, ti met rehion ti mangkita. Ket dagiti problema ti rehion, ti met ti National FSCAP ti mangrisut.
Ngarud, ti rumbeng a mangasikaso iti parikutyo, isu ti provincial federation. Apay?
No ngamin amin a kaso nga aggapu iti baba ket maidatag kadakami, dimi maasikaso ditoy National FSCAP ta maminduakami laeng nga agmiting iti uneg ti makatawen. Agaaddayo pay ti yan dagiti kameng ti board of trustees (17 amin).
Ita, no dita provincial federation ti pakatamingan ti parikutyo, asideg laeng ti pagparanganyo ta maikkan met iti gundaway ti/dagiti indarumyo nga agsungbat iti darumyo. Kalpasanna, mangted ti provincial federation iti desision: no maikkat, mauspende wenno maawan basol ti/dagiti naidarum.
Ditoy National FSCAP, di met kas karina nga ibagami a maikkat wenno masuspende ti/dagiti naidarum ta awan met ti naan-anay nga imbestigasion a maaramid, kas maibatay kadagiti maidatag nga ebidensia. Isu a manen, kas nakunakon, dayta Provincial FSCAP-yo ti mangimbestigar ken mangdesision iti kasoyo.
Nupay kasta, gapu ta addan iti presidente ti National FSCAP ti suratyo, patulodannakayonto iti sungbat—ta isu ti akinrebbeng a mangsungbat iti daytoy.—O bakbaketan!”
Kasla nawagwag a balay ti abuos ni Dr. Calangacang. “An’a ‘ta kunam? Ulitem man!” Saanna pay a napadasan ti nakipengnget ngem no sao, awan ti atrasanna. Awan ti is-islenna idi superbisor pay laeng, daytoy la ketdin nga agtartarindanum iti kaikanan! Nagpang-es manen sa nagrikabrikab dagiti abut ti agongna.
“Aniakan, baket, innak agpatudok iti antayrabis, ta kinaramutannak ti pusa!” kinuna ni Mulong. Ket inistoriana ti napasamak ken ni baketna. “Este, ma’am, ikkandakon iti pagpaagasko ta inkamin ken baket!”
Aniatta ti itedko ket awan pay sapul ti puestok? inngernger ti kaunggan ni Dr. Calangacang. Ket nalagipna manen ti yur-urnonganna. Ngem ania ngarud. Paskuanton no maminsan a lawas ket nakisang pay laeng ti urnongna a pagpaalana ken pagpa-reunion kadagiti kakaanakanna. Sa ita, maulog manen iti mano ribu? Singirem ‘diay pusa, kunana koma ngem maalas man a birngasanda iti pilosopo a baket. “Ala, ikkanka iti dua ribu! Husto daytan!” imbikagna met laeng.
“Saan nga umanay! No marabis ni lakayko, sika ti akimbasol a baket!” imbannikes ni Damiana.
Tumanabutob ni Dr. Calangacang a nanglukat iti kaha. Adda imbatina idi rabii a tallo ribu dita. Pininggitna ti dua. Piniritpiritna dagitoy a kunam no maalana ti karkarma ti kuarta iti panangmikismikisna.
“No di umanay, saanka nga agsubsubli ditoy, sika Mulong!” imballaag ni Dr. Calangacang. “Saanko nga inggagara ti pannakasugsugatmo!”
“Imut!” immisugsog ni Damiana. “Inta ngaruden ket malaes ‘toy lakok nga ikan!” inkudilapna ken ni Mulong. Imbuatna ti baniera ket kasta unay dagsen dagiti paddakna a pimmanaw.
“Da, agbantayka ditoy ta innak agtanggar iti aggatang,” immandar ni Dr. Calangacang ken ni Gualbina apaman a naiplastarda dagiti dadduma a tagilakoda.
Tienda ita ti San Guillermo ket adu ita ti tattao. Nasken a maabrotda ken Gualbina ti intedna a pinagpaagas ni Mulong. Isu a kunam no sibeg nga agsisiim iti agkuti nga igges ti kueen ni Dr. Calangacang iti pasilio a pagserkan iti seksion dagiti dry goods. Sadaenna amin a lumabas. Naipagagangayen nga aramidna dayta, banag a pangkuskusilapan dagiti kakaduana nga adda puestona iti tiendaan.
“Saandak nga ipadpada kadakayo a bassit la ti am-ammona,” ibikag no kua ni Dr. Calangacang. “Siak, am-ammok amin a tattao! Isu a siak ti rebbengna a paggatanganda!”
Naungaran ti kaunggan ni Dr. Calangacang idi mapasungadanna ti baket nga ardiod ngem medio arukong, adu ti galanggalang dagiti takiagna ken puraw aminen a buokna.
“Mrs. Trumpaquita Tumangar?” inyawat ni Dr. Calangacang ti imana idinto a napasardeng ti baket ket pinadpadasna nga inunnat ti siketna. Minulagatanna ni Dr. Calangacang.
“Umayka gumatang iti iregalom ita a Paskua?”