No Adda Sigsigloten, Adda Met Warwaren
BARO a tawento manen; baro manen a gundawaytayo a mangrugi aglalo iti gandattayo nga agurnong, aglalo no ditay nagun-od ti kalkalikagumantayo a gatad a maurnong iti 2019.
Ala, iruartayo ngarud, kaka, ‘tay kuaderno (notebook) a pagisursuratan kadagiti arapaaptayo iti biag. No awan pay kastoy a notebook-mo, ala, panawen koman a maaddaanka. Awan sabali nga isuratmo no di laeng dagiti arapaapmo. No dayta nga arapaap ket masapul ti kuarta tapno magun-odmo, masapul met ngarud nga isuratmo no mano ti budget-mo. Kas pagarigan koma: “Family trip to Hong Kong on or before May 2020.” Yabaymo ngarud met no mano ti pattapattam a magastosyo iti dayta a biahe.
Kanayon a Panangkita
Kas kadagiti dadduma nga arapaaptayo iti biag, saan kadi a masansan nga adda evaluation-na? Di met kitaentayo no kua ti nagun-odtayon ken kitaentayo met ti kayattayo a magun-od?
Kastoy met dagiti arapaaptayo nga addaan iti money equivalent-na. Kinapudnona, dayta agurnong iti kuarta ti kalakaan kadagiti nadumaduma nga addang para iti pananggunod iti arapaap. No maidilig iti umuli iti agdan ti pananggun-od iti maysa nga arapaap, umuna nga agpang dayta panagurnong iti kuarta.
Kas pagarigan koma ti arapaapko a makapagturposto koma met ti ubing pay nga anakko iti kolehio, di ngata ti karirigatan wenno kangangatuan nga agpang iti agdan daytoy nga arapaapko ket isu ti panangipasagepsepko iti anakko ti kinapateg ti adal?
Ta uray man riniwriw a kuarta ti naurnongko a para iti panagkolehiona inton dumteng ti panawen no kunananto met kaniak, “Nanay, ita a panawen, awanen ti serserbi ti panagturpos iti kolehio!”
Kayatna a sawen, kaka, nga iti panagsigsiglottayo, saantayo koma a liplipatan dagiti kasapulan a banag a masapul a masursurotayo ken masapul nga isurotayo kadagiti ipatpategtayo iti biag.
Iti daytoy Tawen 2020, sapay koma ta umasidegtayo nga umasideg kadagiti arapaaptayo.