Kastoy, Kapid, Ditoy Hawaii
MELE KALIKIMAKA! (Naragsak a Paskua!)
Iti daytoy pannakarambak ti Paskua itoy a tawen, manamnama nga adu a taga-New York ti umay ditoy Hawaii a kumablaaw iti Merry Christmas. Ngem kadagiti taga-Hawaii, saanda a kalikaguman dayta a kablaaw manipud kadagiti sumangpet a taga-New York. Kinapudnona, iti laksid ti pannakabigbig ti Hawaii nga Aloha State, wenno Estado a Managpasangbay, saanda a kayat nga adda lumas-ud ditoy manipud iti estado ti New York.
Kadagiti sangladan ti eroplano, masiim ken maarisit dagiti sumangpet manipud idiay New York, saan a gapu ta maatap dagitoy a mangisangbay iti MERS-CoV (Middle East Respiratory Syndrome CoronaVirus), wenno Dengue, no di ket gapu iti daytoy kinabenepisiarioda iti SOTA wenno Special One Time Assistance program.
Itay nabiit, babaen ti panangirakurak ti New York Post, maysa a mararaem a pagiwarnak ditoy Amerika, addan aganay a 12,000 a tattao iti sakup ti New York ti naikkan iti SOTA tapno mapan dagitoy kadagiti 32 nga estado ti Amerika (a pakairamanan ti Hawaii), wenno iti 373 a dadakkel a siudad.
Iti panangilawlawag ti nasao a pagiwarnak, iti daytoy a tawen, 5,074 a pamilia nga awanan iti pagtaengan wenno mapan a 12,482 nga indibidual a walang ti naikkan iti SOTA tapno umallatiwda kadagiti siudad nangruna iti nabara a lugar a kas iti Hawaii.
Iti daytoy a tawen, naipresupuesto ti $89-milion nga agpaay kadagiti nasao nga awanan iti bukod a pagtaengan wenno kadagitoy agtataeng iti City Shelters wenno kadagiti igid dagiti kalsada ken parke.
Babaen ti SOTA, maikkan dagiti walang iti kuarta a pagpleteda a mapan kadagiti kayatda a lugar, pagabangda iti pagtaengan iti makatawen, ken igatangda iti taraon. Kalpasan ti makatawen dagitoy a walang iti sangladanda a lugar, manamnama a ti siudad a nagsangladanda ti mangallawat iti parikut nga itden ti maysa a walang, kas koma iti pagnaedan wenno ti nalaad a buya no maturogda iti igid ti kalsada wenno parke, ti mangdalus kadagiti rugitda, ti manngited iti taraon ket agas no agsakitda, ti pannakaitabonda, kdp.
Ket dayta ti saan a kayat ti gobierno ti Hawaii a mapasamak. Iti agdama, dakkel a parikut ti Hawaii dagiti walang wenno tattao nga awanan iti pagtaengan. Ket mainayon manen a parikut no makalibas a sumrek dagitoy a walang manipud idiay New York.
Ngem idiay New York, maipadpadayaw ti Hawaii gapu iti kinapintas dagiti pagpalpaliwaan a kas iti igid ti baybay. Maipakpakita pay dagiti ubbing ken lallaki a nakauksob uray iti bulan ti Disiembre, wenno iti bulan a kumkumter dagiti tagakadaklan nga Amerika gapu iti lamiis.
Iti Hawaii, saan a kasapulan ti napuskol a pagimeng wenno lugar a paginuduan. Iti Hawaii, mabalin ti maturog nga awan aramaten nga ules wenno ikamen.
Gapu kadagita a saguday ti Hawaii, adu ti agkalikagum nga umay ditoy manipud idiay New York.
Nupay nangina ti plete ti umay ditoy Hawaii, ad-adda a ditoy ti pangyabugan ti gobierno ti New York kadagiti napatgan iti SOTA ta manamnama a saanen a makasubli dagitoy ket maiwalinen a parikut ida ti New York. Ngem iti biang ti Hawaii, kinuna ni Teniente Gobernador Josh Green: Adalen ken takuatenmi daytoy a programa ti New York, ti SOTA, ken kasaritak dagiti mayor ken dadduma a gobernador manipud kadagiti dadduma a paset ti Amerika ta kayatko a penneken nga awan sumangbay ditoy a walang manipud idiay New York wenno sabali nga estado. Iti daytoy a gundaway, mangiprosupuestokami iti $50-milion para iti daytoy a programa tapno kapkapnekan a mapengdan ti yuumay dagitoy ipuruak ti New York ditoy.
Idi Oktubre 31, nagsurat ni Diputado ti Kalihi John Mizuno ken ni U.S. Attorney General William P. Barr. Kiniddaw ni Mizuno a mangisayangkat koma ni Barr iti imbestigasion mainaig iti panangibaon ti New York kadagiti walang kadagiti nadumaduma nga estado, nangruna iti Hawaii.
“Saan a kabaelan ti Hawaii a suportaran ti adu a walang (awanan iti pagtaengan) no ituloy ti New York nga ipuruak ida ditoy,” kinuna ni Mizuno.
Awan pay sungbat ni Barr iti surat ni Mizuno bayat ti pannakaisursurat daytoy.
Kabayatanna, kinuna ni Mizuno:
(Agtignaytayo amin!)
Kuna met ni uliteg: Di pay la dagitay pada nga Ilokano ti maipatulod ditoy Hawaii ta ni Ilokano, no umay ditoy, mabainto a matmaturog iti igid ti kalsada wenno parke; ketdi, pagbalinennanto nga aldaw dagiti rabii iti panagtrabahona agingga a makabalay iti dakdakkel pay ngem iti munisipio ti ilida.—O
E hana kakou!