Okeyka, Apong
KADAGITI agnaed iti siudad, ti Paskua ti tiempo tapno agsasarak dagiti agkakabagian nga agpapada a nagramut kadagiti probinsia.
Dagiti kakastoy nga okasion ti ad-adda a maiwaywayat iti Paskua. Mapabaro dagiti duogan a tradision kadagiti namunganayan nga away wenno komunidad; mapabiag dagiti kababalin a mapukpukawen gapu iti ipapanda panagnaed iti siudad.
Aggapu dagiti kameng ti kaamaan wenno puli iti nadumaduma a lugar iti pagilian ken iti ballasiw-taaw tapno madar-ayanda ti okasion a maiwayat iti maminsan iti makatawen.
* * *
Maiwayat met iti Paskua dagiti nadumaduma a programa kas iti panagpamakan kadagiti ubbing.
Ekstension daytoy ti kinaimbag ti maysa a pamilia a mangipaay iti ragsak ken mangpairut iti langenlangen dagiti agindeg nangruna kadagiti nakukurapay a komunidad.
Maysa ti Shalom Philippines kadagiti organisasion a mangiwaywayat iti tinawen a panagpamakan kadagiti ubbing iti tiempo ti Paskua babaen ti pannakitinnulong dagiti dadduma nga NGO ken dagiti dadaulo ti DILG.
* * *
Tiempo met ti panagkikita manen dagiti sigud nga agkakaklasean. Mapabaro ti nasayaat a langenlangen, ken mabiag dagiti lagip a nakatignayan ti tunggal maysa tapno agarapaap iti naim-imbag a biag.
* * *
Doble a selebrasion met kadagiti naipasngay iti tiempo ti Paskua. Agtitipon dagiti kameng ti pamilia, umay dagiti ninong ken ninang.
Ti Paskua, nalabit, ti karagsakan a tiempo kadagiti ubbing.
* * *
Segun ken ni Emily Matthews, iti tunggal pagtaengan, tunggal puso, tunggal disso, ti bara ken ragsak ti Paskua ti mamagaassiddeg kadatayo iti tunggal maysa.
Iti biang ni Ronald Reagan, ti Paskua ti holiday a rambakantayo saan a kas indibidual wenno kas maysa a pamilia, no di pay ket kas maysa a pamilia ti sangatawan.
Kuna ni Norman Vincent Peale, ti Paskua ti tiempo ti ragsak, panagkikinnablaaw, panagsisinnagut ken panagtitipkel ti pamilia.
Iti biang ni Pope John XXIII, nakadakdakkel a pamilia ti sangatawan. Mariknatayo daytoy iti kaunggan ti pusotayo tunggal Paskua.
* * *
Adda nagkuna a ti Paskua, maipapan iti ayat, pamilia ken ubbing. Saan a napateg no ania ti kanentayo wenno no ania ti maawattayo a sagut, basta addatayo iti sidong dagiti patpatgentayo.
Ti tiempo ti Paskua, isu ti mataginayon a tiempo iti sidong ti pamilia. Sagrado a tiempo nga addatayo iti sidong ti pamiliatayo.—O