Dagiti Pagannurotan ti Salip iti Sarita ti 22nd AMMA Foundation Literary Awards
Kasta ti kinaasikasona iti sabali daytoy a tao? nasaludsod ni Kath iti bagina. Ammona latta dagiti kasapulan ti maysa nga agbiag. Isu, dina pay napanunot no adda ipaunegna iti pagtarusanna. Agpannurayto kad’ lattan iti pagtarusanna? Nakababain met. Sabagay, adda da Elmer ken Manager Malvar a makaammonto kenkuana. “Nagsayaatkan? Diak pay napanunot dagita,” kinunana ketdi ken ni Jonas.
“Ammom metten ti biagmi idi aggatgatangkam’ pay laeng iti nateng idiay Pangasinan. No dikam’ agbalon iti agserbi kadakami, mabisinan wenno gumatangkam’ ti makan a nangina dita daldalan. Saankam’ pay a sigurado no nasayaat ti pannakaisaganada. Okey lang dayta nga araramidek. Para met kadakayo kada lola ken lolo dagita ginatangko. Agbalonakto manen inton umaykami kada boss-mo.”
Asino koma ti babai a saan a mangayat ken ni Jonas?
Ah, basta, saan pay a panawen kaniak, kinunana met laeng iti bukodna a bagi.
Nasapa a nakadanonda iti estasion ta saan a natrapik no aldaw ti Domingo. Ni koma pay Jonas ti gumatang ti tiket ni Kath ngem inatipa ti balasang ta adda met budget ti opisina.
Binantayan ni Jonas ti konduktor a nangiplastar kadagiti karga ni Kath. Isu pay ti nangpili iti maikatlo a linia a pagtugawanna iti batog ti drayber. Sinublianna ti balasang a pinagur-urayna kadagiti pagtugawan dagiti pasahero.
“Dimo met la nalipatan ‘tay pagimengmo?” “Ay, wen, diak metten napidut ket impanko iti rabaw ti katrek tapno ‘ta la mangpiduten.”
“Siguro, pampanunotem pay laeng ‘di dinner date-mo isu a nalipatam. Saan a bale ta adda ekstra a diaketko nga adda latta idiay luganko.”
Naturong ni Jonas iti lugan. Idi agsubli, addan iggemna a nalabaga a diaket. Makais-isem ni Kath.
“Ne, apay?” sinaludsod ni Jonas.
“Di pay ket kasla nakaarakupka kaniak nga agpatnagen, fren?”
“Ket saanmo a kayat? O, sige, agkutiperperka iti lamiis. Ne, ipadasmo, uray pannakkelenen ngem ‘ta agsakitka. ‘Imbag la ketdi ta diak pay inusar. Nadalus, uray angotem.” Inyasideg ni Jonas ti diaket iti agong ni Kath.
“O, sige, yusokmo ngarud kaniakon ta kitaem no bagay kaniak. Ikulpikto lattan ti manggasna uray ta uso met ti aglabonglabong.”
Nagtungpal ni Jonas.
“O, kita’m ket kasla maysakan a Junior Jonas.” Inwaragawag ti konduktor ti iluluganen dagiti pasahero.
“Thank you, fren, iti an-anusmo.” “Pakaragsakak amin nga ar-aramidek, Kath. Agan-annadka.”
Intulnog ni Jonas ni Kath agingga a nakasalpa ti balasang iti lugan.
Inarakup ni Jonas ni Kath. Nagpabus-oy met ti balasang. (Maituloyto)