Idi Un-unana a Panawen

IDI un-unana a panawen, amin nga ayup, awan uloda malaksid ti elepante, nga isu ti Ari dagiti Ayup. Adu ti urnong ti elepante nga ulo a nagduduma ti langa ken rukodda. Iduldulinna dagitoy iti palasiona. No adda ayup a panggepna ti rummuar iti purok, mapan bumulod iti ulo ken ni elepante. Inton agsubli, mapanna met laeng isubli ti ulo ken ni elepante.

Ti laeng pagdaksanna, saan nga umanay ti bilang dagiti ulo a para kadagiti amin nga ayup. Adda latta maysa a kurang. Isu a no kayat dagiti amin nga ayup ti mapan iti ruar ti purok, adda latta mabati a maysa kadakuada ta awan met mabulodnan nga ulo.

Kastoy ti mapaspasamak iti nasao a purok dagiti ayup iti nabayag a panawen. Agingga iti maysa nga aldaw, kiniddaw dagiti ayup ken ni elepante a dida la koman isubsubli ti nabulodda nga ulo. Sayang kano ti panawenda a mapan pay mangisubsubli. Usarenda la kanon ti orasda nga agtrabaho.

Nayat met ni elepante ta isu kano pay a trabahona met ti agipabpabulod. Kiniddawna ngarud ken ni kappi a sekretariana a pakaammuanna amin dagiti ayup nga umayda iti palasio tapno maited kadakuadan ti bukodda nga ulo.

Iti dayta nga aldaw, naglilinia dagiti ayup tapno alaendan ti uloda. Ilista met ni kappi ti ayup a maikkan iti ulo. Agingga iti naibusen dagiti ulo.

Idi pumanaw koman ni elepante, kinuna ni kappi: “Apo Ari, dinak met inikkan iti ulo?”

“Ne, a, naglemlemmengan, aya, ta apay a dika naikkan?” kinuna met ni elepante.

“Ket no siak ti nageskribiente, apo!” kinuna ni kappi. Ngem awanen ti ulo a maited ni elepante ken ni kappi. Agingga kadagitoy nga aldaw, awan pay ulo ni nakakaasi a kappi.—O