Ti Tarakenmo ken Sika
Naiggamanen ni Dr. Calangacang ti siko ti baket. “Ammok lattan, Mrs. Tumangken. Ala, idiayta puestok. An’at’ gatangem, aya? Libre ta bungonnan no kua, sika!”
“Anampay, aya, nga innak taltalaanen, sika?” nagbilaw ti baket. Impadasna manen nga ipaatras ti barukongna. “Kumitaak la’t mabalin nga inabel a mapadait a pagkuami inton baro a tawen.”
“Inabel?” imbullad ni Dr. Calangacang. “Ay, adut’ dita puestok! Kartingam, ala, ta inta dumanon!” Saan nga inibbatan ni Dr. Calangacang ti siko ti baket. “Sisiak laeng ti aglaklako iti inabel ditoy, Mrs. Tumapao,” impang-aw ni Dr. Calangacang ket nasakit ti ikikita kenkuana ni Doniquita a malabsanda ti stall-na. Nagtanabutob daytoy ngem kinudilapan ni Dr. Calangacang.
“Mabinsirko ket masukansukat ti yaw-awagmo kaniak, adi?” immulagat ti baket sa manen inyatrasna ti barukongna. “Siak ni Simpatiella Tumamao. Saan a Tumapao, sika!”
“Ay, isu la isu, kaka,” impurdingi ni Dr. Calangacang. “Ay, Gualbina, iruarmo dagitay inabel dita, ala, ket adda gumatang. Partidaenna la ketdin, saan, Mrs. Kamanao?”
Indagsuol ni Gualbina dagiti nadumaduma a maris nga inabel a tela manipud iti no sadino a suli ti shop. Nagbaeng ti baket ket naaruy-oy ti butegna. Inyatrasna ti abagana sa inaguantaanna nga inyapras ti abadayna nga apuro.
“Makapaangkit dagitoy lakom!” inraed ti baket. “Innan, kitaek man no mabalin!” kinunana sa binidingbidingna dagiti tela.
“Diak man kayat ti bursina dagitoy,” inngirsina. “Da, innak man pay la sumursor!”
Nagdanag ni Dr. Calangacang. “Ay, saan, Mrs. Tumacao, mapanka ibirokan iti kayatmo. Isu pay ket a pagbambannogam. Ala, agtugawka man pay laeng ta siak ti mapan mangala iti kayatmo.”
Rimmuar iti puestona ni Dr. Calangacang. Tinuparna ti puesto ti Caring’s Dry Goods. Kukua ni Caridad a nabayagen nga agtagtagilako.
“Ay, Caring, kumitaak man i’ta inabelmo!” impukkaw ni
Dr. Calangacang ta awan makitana a tao iti uneg. Sakbay a makapagwen ti akinkukua, tinurongem a binakruy ni Dr. Calangacang ti sumagmamano a nakabungon a tela nga inabel.
“Siguraduenyo a bayadanyo, doktor!” immisugsog ti para lako ni Caridad.
“Ay, saanak a daytay suitik, sika, Moning!” inkanayon ni Dr. Calangacang a sinipdut ti maysa pay a nakitana nga inabel. “Pito daytoy, ne, tandaanam!”
Bumanang-es ni Dr. Calangacang. Apounayen ti rigrigatna nga agullo iti kuarta. Ngem no di agsikap, ania ngarud ti inayonna iti isaganananto inton bisperas ti Paskua? Sa pay laeng agmalas a kas itay panangdutdotna iti dua ribu nga intedna ken ni Mulong? Umabante met ti malas, umatras ti buenas.
“Ne, napanannan ‘tay baket, sika, Gualbi?” naglagaw ni Dr. Calangacang ta awan metten a makitana ti baket iti uneg ti puestona. “Dimo la naigawiden?”
“Mapan kano pay kumita iti kalsonna nga umuna santo agsubli ditoy, mistra,” immisugsog ni Gualbina.
“Ket no di agsublin? Kasta unay a rigatko a nangtanggar kenkuana tapno ammom! Awan pay serserbim a susuelduak!” indagsol ni Dr. Calangacang dagiti bugsong. “Sinarsaritaam koma, a, kasdiay! Dimo maal-ala ti abilidadko, aya, sika, Gualbina?”
“Kasano koma a maal-alak, mistra, no diak met nagmistra?” Kinudkod ni Gualbina ti pagaga a buokna. Implastarna ti bakkukona sa nagtugaw iti stool sa nagkuyyakoy. Innalana ti