Ammuem Pay Dagitoy
Nakarikna iti dakkel a bang-ar ni Dr. Calangacang.
“Ii, ‘ta lokom nga ubing ta adda met gayam guapuem!” inggarakgak ni Dr. Calangacang. “Da, innan ta retratuenka ta ipisbokka man ketdi ta mabasa dagita padak a retirado!”
Ad-addan ti ragsakna idi maammuanna a Quiterio ti maikadua a nagan ti ubing.
Ammo met dagitoy ti manglana, nakunana iti panunotna ket nagkuenta manen no manonto ketdi ti pagbayadna iti ospital.
BISPERAS ti Paskua. Ita koma ti panagpaala ni Dr. Calangacang ngem nayalud-od inton sakbay ti Baro a tawen ta ti kuarta a pagpaalana koma, napanen kadagiti agina a Shane ken JQ. Ibabawina koman ngem mabain kadagiti padana a retirado a da komarina nga Ely Dacquel, Sayong Bumingay, Superintendente Sesing, Perfecta Baniaga ken dagiti dadduma pay a kinabaddungalanna.
Agsipud ta agpaypayegpeg ni Shane— epekto pay laeng kano ti anesthesia— tengtenglen ni Sencio ti baketna ket ubba met ni Dr. Calangacang ti maladaga ta agsangsangit.
“Ay, ustonan, balong… ustonan, balongko, aya…” Insala ni Dr. Calangacang ti maladaga. “Agsardengkan, ala, ta siak kenkat’ mangub-ubba.”
Ngem imbes nga agsardeng, inyad-adda ketdi ti maladaga ti nagsangit.
Ngem kellaat a napasardeng ti maladaga idi ibel-a ti ridaw da Perfecta Baniaga, Ely Dacquel ken Sayong Bumingay a nakaiggem kadagiti binugsongda. Nagsardeng met ti panagpayegpeg ni Shane.
“Ne, ne, dikay’ man la nagpakpakapuot, aya, kokomari?” kinuna ni Dr. Calangacang idinto a nagallingag ni JQ.
“Nabasami ti paskilmo iti Facebook, komari, isu a nagtutulagkami nga immay,” kinuna ni Ely Dacquel.
“Agsipud ta dimi ammo ditoy, sinurotmi ti map app no sadino daytoy Dumayas Hospital,” imparagipig met ni Perfecta Baniaga. “Nauneg met gayam! Itay nakitami ti dakkel a sinambituen dita sangon, ay, ket isun, a!”
“Komari Quiter, dagitoy man ti masapsapul ‘toy ubing nga isagutmi,” kinuna metten ni Sayong Bumingay ket inyawatna ti sangabugsong a diaper. “Merry Christmas, balong!” Iniggamanna ti ima ti maladaga. Nagkulinamnam daytoy.
“Daytoy met kaniak,” kinuna ni Perfecta Baniaga ket intedna ti uppat a lata nga infant formula. Inanggona met ti takiag ti maladaga. “Merry Christmas, balong!”
“Diak met paudi, a,” kinuna ni Ely Dacquel. Adda binay-on a bado ti maladaga nga inyawatna. Inungnguanna met ti takiag ni Joshua. “Nagasat a Paskuam, balong!”
“Ne, an’an, agtenkiukayo met, a!” indusngo ni Dr. Calangacang ken ni Sencio nga itay pay