Ti Puga (4)

Kellaat, nabtak ti napuskol a sarming ti tawa. Limmagto ni ASAC Donoteli a nanggammat ken ni Agent Stewart.

Ti Napalabas: Kalpasan ti pananglapped da John Villa, Daniel, ken Jerky iti kudeta a mangtippuog koma iti turay ti Presidente ti Filipinas, impaayan ti CIA da Daniel ken Jerky iti kuarta nga usarenda a mangabaruanan, ken babaen ti Witness Protection Program, naipanda iti lugar nga awan ti makaam-ammo kadakuada. Naital-o met ni Mr. Bosworth a handler ni John a kas baro a Direktor ti CIA, ket ti umuna a bilinna: papatayenda ni John. Iti dayta a rabii iti Filipinas, a kaaldawan ti panagsapata ni Mr. Bosworth a kas Direktor, naggigiddan nga adda nangraut kada John, Daniel, ken Jerky. Napatayda a dagus ni Jerky. Agpeggad met ti pamilia ni Daniel ket inawaganna ni John. Ngem madama a makirangranget ni John. Idi mapatayna dagiti nangserrek iti balayda— a natakuatanna a kameng ti Triad, inkeddengna a mapan saranayen ni Daniel. Ngem naladawen ta natayen ni Loida nga asawa ni Daniel ken dagiti annakda.

N(Maika-4 a Paset) AKATARTARAY ti namay-an ni John iti luganna. Kayatna a makadanondan a dagus iti pagtaengan ni Jerky nga itay pay nga aw-awagan ni Daniel ngem saan a sumungsungbat. Adda ni Daniel iti abayna. Saanda nga agtintinnimek ngem maymaysa ti saludsodda iti bagbagida: ania ti napasamak ken ni Jerky?

Agam-ampayag pay iti panunot ni John dagiti pinatay ni Daniel. Sakbay a sinaggaysada nga inlugan dagitoy iti van ni Daniel, rinetratoda ida. Kayatna nga ammuen ti kinasiasinoda. Awan ID-da ket ammo ni John a paset dayta ti panagannadda— tapno awan ti makatunton kadakuada.

Awan ti ammona a makatulong kenkuana iti PNP wenno iti NBI a mangbigbig kadagiti nangraut ken ni Daniel ngem mabalinna a kontaken ni Rudy, daydi kaduana a naibaon iti Basilan. Adda nasinged a gayyem daytoy iti NBI. Naimbag kadagiti naipaknina nga Intsik idiay balayda ta mabalinnanto a kontaken ni ASAC Donoteli ti FBI.

Ngem kapatgan ita ti pannakaammoda no ania ti napasamak ken ni Jerky. No naggiddanda ken Daniel a naraut, mabalin a rinautda met ni Jerky.

Saan a nagbayag sa nakagtengda iti naiputputong a pagtaengan ni Jerky. Sipapardas dagiti dua a dimsaag iti lugan. Nakaiggemda nga agpadpada iti paltog ken bassit a flashlight. Imbaklay pay ni John ti M-4-na. Pinaliiwda ti aglawlaw ti pagtaengan. Nakaul-ulimek.

“Saan a nagtaul ti aso ni Jerky,” inyarasaas ni Daniel. Ti aso ti mangpasungad kadakuada tunggal sarungkaranda ni Jerky. “Dakes daytoy...” insungbat ni John. “Is your bluetooth on?” “Yes.”

“Mapanka iti likud. Siak ti mapan iti sango.” Nagtung-ed ni Daniel. “Be careful...”

Pinatangad ni John ti tanganna. Nagsinadan. Naannad ti pannagna ni John bayat ti panagtaltalangkiaw ken panangipaturongna iti flashlight iti aglawlaw. Nakagteng iti ridaw. Inarikapna ti nagsaipan ti ridaw ken ti hamba tapno masiguradona a saan a namulaan iti booby trap ti balay. Awan ti nakarawana a waya. Idinto a nakain-inayad ti panangpusiposna iti seradura, al-allingagenna no adda aglitek. Awan. Induronna ti ridaw, impaturongna ti flashlight iti uneg. Nalayus iti dara ti datar ngem awan ti makitana a napasag a tao.

“Downstairs, clear.”

“Copy that,” insungbat ni Daniel a nakangngeg iti imbaga ni John iti bluetooth. “Adu ti dara iti kosina ngem awan tao.” “Kasta met iti salas.” Ni John.

Nagdanon dagiti aggayyem iti kosina. Intuloyda ti nagsawar. Impaturongda dagiti flashlight-da iti agdan sa nagsarunoda nga immuli. Nagderetsoda iti master’s bedrooom. Nakalukat daytoy. Agpadada a napakidem idi makitada ti bagi ni Jerky a dandani payen dida malasin iti pannakatatekna iti bala.

Naglulok dagiti tumeng ni Daniel. Naparintuod iti sakaanan ti bangkay ni Jerky. Iniggamanna daytoy. Nalamiisen. Sumagmamano siguron nga oras ti napalabas sipud natay.

Napaanges iti nauneg ni John. Nadamsak dagiti nangpapatay ken ni Jerky. Ngem asinoda? PNP? PSG? Hired killer ti Presidente?

Awan pamalpalatpatanna. Ngem asinoda man, siguradona a saan nga agang-angaw dagitoy.

Pagam-ammuan, nagkiriring ti selpon ni Daniel. Nasdaaw. Inruarna ti selponna sa kinitana ti Caller ID.

Agsalsaludsod dagiti mata ni John a nangkita ken ni Daniel. “Diak ammo ti umaw-awag.” Tinangad ni Daniel ni John. “Sungbatam,” kinuna ni John.

Pinisel ni Daniel ti Accept iti selpon. Arig kinagiddan dayta ti pannakangngegda iti a lanitek. Napamulagatda nga agpadpada, dandani naggiddanda a nangtaliaw iti naggapuan ti lanitek. Naipasabat kadagiti matada ti raniag ti digital counter a

nakapaspaspas ti panagbaba ti numerona.

“Shit!” nayesngaw ni John.

“Hello, Daniel,” nagtimek ti immawag ken ni Daniel. Napangariet ni Daniel. Kasla dimmakkel pay ti ulona. Saan a karkarna ti timek kenkuana. Masiguradona a ni Edwin Castillo, maysa a hired killer ti PNP. “Welcome to hell!”

Naputeden ti linia ket kasla immalisto pay ti panagpababa ti numero iti counter.

“Time bomb!” inriaw ni John. “Intan!”

INDISSO ni Deputy Director Adam Hutchison ti folder a naglaon kadagiti impormasion maipanggep ken ni John Villa. No namin-anon nga inukagna dayta a folder ta agingga ita, kasla di mamati a nabaelan dayta a tao ti nanglapped iti panangtippuogda koma iti gobierno ni Presidente Acosta.

Saan a gagangay ti kabaelan dagiti operatiba nga inkuyogna idi. Naplano met a naimbag dagiti kayatda a mapasamak. Ket nupay kimmontra ni John kadakuada, ninamnamana a kabaelan ti bungoyna aglalo ket timmulong pay ti Armed Forces of the Philippines ken ti ISIS nga imbagian dagiti Abu Sayaff. Ngem nagbiddut.

Siguro, biddut ti yaannugotda iti pagayatan ni Gen. Miguel a makibiang ti Abu Sayyaf— nga inkarian ti heneral a maikkan iti autonomous government iti Jolo, nupay impanamnama daytoy kadakuada a saanto met laeng a matungpal.

Dakkel a nakaibabainnana daytoy a black ops. Ken saanna a maawat ti pannakapaayna. Liwliwana laengen ti panagbaliktad dagiti pasamak. Imbes nga isuda ti mapabasol, wenno mapukaw ti panagtalek ti ahensia kadakuada, isuda ti nagunggonaan iti pannakapaayda. Naital-o iti posisionna.

Ngem ania ti kasukatna? Ammona nga adda milagro iti ngato iti panagbaliktad dagiti pasamak.

Lima ti naideklarar a natay a taona, ngem up-uppat ti napaneknekan ken nasarakanda ti bangkayda. Ti lead man a ni Agent Craig Stewart, saanda a nasarakan ti bangkayna ngem imbilangda a natay. Ania ti napasamak daytoy? Nagimbestigar dagiti matalekda iti PNP ken NBI, agramanen ti FBI ken CIA, ngem saanda a pulos a natunton no ania ti nagbanagan ni Agent Stewart. Kadakuada, iti lubong ti panagespia, saandaka nga ibilang a natay agingga nga awan ti masapulanda a bagim.

Nagkiriring ti selponna. Dinardarasna nga inruar sa kinitana ti caller ID. Ti Direktor. Ammona lattan a napateg dayta nga awag.

“Deputy Director Hutchison, sir... What can I do for you?” insungbatna a dagus.

“Good afternoon, deputy... Are you ready for another black ops?” dineretso ti Direktor.

“Simultaneously with Operation Orient Express, sir?” “Yap...”

“Sir, no namnamaenyo nga agballigiak iti Operation Orient Express, masapul nga ipamaysak daytoy.” Nakaun-uneg nga anges ti nangngeg ti Deputy.

“No patay ken biag ti kaibatogan ti pannakairingpas ti Orient Express, bay-andak a mangileppas nga umuna iti daytoy...” kinuna manen ti Deputy.

“Damagek man laeng, Deputy... Agsipud ta sika ti nangidaulo iti napaay a kudeta iti Filipinas, ammom kadi ti napasamak ken ni Craig Stewart?”

Naikuleng ni Deputy Hutchison. Dayta ti sangkasaludsodna iti bagina!

“Natay kadi met a kas kadagiti kakaduana?” sinaludsod manen ti Direktor.

Napaanges met iti nauneg ti Deputy. “Saan, sir... Awan narecover a bagina.”

“Ngem awan damagmo maipapan kenkuana?”

“Awan, sir. Nagpukaw lattan a kasla asuk.”

“Ket no ibagak a sibibiag?”

“Maragsakanak no kasta, sir.”

“You better rethink, Deputy .... ”

“Sir...”

“He is back in America... and he is scheduled to testify in the Senate Intelligence Committee hearing tomorrow... and do you know what?”

Nagmaga ti karabukob ni Deputy Hutchison. “Operation Coup d’etat, I assume, sir...” nakakapkapuy ti timekna. “Exactly...”

Napatilmon ti Deputy. Kasla naparkaganen ti karabukobna. “And you know what’s at stake here, I assume...”

“My career... a lot of people, including you, sir.”

“I was never a part of the illegal operation.”

“But, you participated in the cover up and dessimination of lies. This is obstruction of justice, sir.”

Nangngeg pay ti Deputy ti panagngaretnget ti Direktor ti pigsa ngata ti panagtupa dagiti ngipen daytoy.

“We are all involved, Director, either directly or indirectly... Have you talked to the other parties, sir...”

“Yes... and the order is to stop Craig Stewart at any cost. He cannot appear in the Senate hearing and spill the truth about the coup... He cannot be allowed to testify against us.”

“Am I thinking what you are thinking then, sir?”

“I’m sorry but there’s no other choice, Deputy. I worked so hard to get this position... and I cannot lose it just because of one rogue spy.”

“I need all the information I could get, sir, so that I can work on it.” When is he scheduled to testify? Where are they hiding him? Those are the only two I needed... the rest of it, I could get them myself...”

“Perfect. Remember, this is your operation. Yours and yours alone without the involvement of other people.”

Naggiteb ti pispis ti Deputy.

“You are a decent individual, deputy... You are one of the most decorated spy in the agency. If you play this right, who knows... you’ll become the next Director.”

Naglingaling ti Deputy. Awan iti panunotna dayta. Saannan nga ambisionan dayta a takem. Ti laengen kalkalikagumanna, malapdan ti pannakadadael ti naganna. Ken maalawna ti nabatbati pay a dayawna iti ahensia.

SAN NICOLAS, ILOCOS NORTE. Iti isu met laeng nga oras. Iti saan unay nga adayo iti pagtaengan ni Jerky, maysa a van a namarkaan iti PLDT ti nakaparada iti kasipngetan a sirok ti maysa a kayo. Dua ti nakatugaw iti sango idinto nga uppat iti likud. Maysa ni Edwin Castillo kadakuada. Nakaul-ulimekda a kumitkita iti pagtaengan ni Jerky.

Sinipsiputanda itay ti isasangpet dagiti dua a nailangaanda a da Daniel Pacis ken John Villa. Kayatna a sawen, saan a nagballigi dagiti nangraut iti balay ni Daniel. Ngem malasna laeng ta iti daytoy a gundaway, sigurado a saan a makalasat.

Apagleppas ti panangawagna ken ni Daniel. Di ammo daytoy a naikonektar ti awagna iti bomba ket iti panangsungbat ni Daniel iti awag, nagbiag ti timer ti bomba.

Madamdama laeng, uray la a nadayyeg ti van a yanda iti panagbettak ti bomba. Gimlayab ti apuy iti balay ken nakitada dagiti paset daytoy a timmayok.

Napaisem ni Edwin. Ammona nga awan makaanay a gundaway dagiti dua a nakapagtaray. Siguradona a nairaman dagitoy a nawatwatak.

“Ania ti panagkunayo, ubbing, nataydan?” kinuna ni Edwin. “Sigurado, boss!”

Nagkakatawada.

“Imposible a makalasatda iti dayta a nakapay-an ti balay,” innayon ti maysa.

“Intayo ngaruden ag-good time, boss! Idiay B-1!”

“Agtutorkayo... Awagak pay nga umuna ni boss. Masapul a maammuanna daytoy... tapno maragsakan met,” kinuna ni Edwin. Indayalna ti numero ti boss-na ket bayat ti panagkiriring daytoy, impalapalna ti panagkitana iti aglawlaw ti nagbalinen a kasla patta a balay a lamlamuten pay laeng ti apuy. Awan ti makitana a pagilasinan ti biag.

“Ti kayatko a mangngeg ti ibagam,” kinuna a dagus ti inawaganna.

“Eksakto, sir. Nataydan a dua... da Daniel Pacis ken Jerky Santos...” “Siguradoka? Awan paltosna?” “Wen, sir, nagulimekdan a sangapamilia. Ti nagpintasan daytoy nga operasion, imbes a dua, nagbalin a tallo ti nairingpas ta nairaman pay ti kangrunaan

a kabusoryo.”

“Ni John Villa?”

“Yes, sir.”

“Good! Good job!” nakaragragasak ti naawagan. “I’m proud of you, guys... Ala, inkayon ag-happy-happy! Adda ammom a papanan?”

Imbaga ni Edwin ti dinakamat itay ti taona. Nagkatawa ti inawagan ni Edwin. “Mayat! Wen, mayat idiay!” “Napadasamon ti napan, sir?”

“Lokloditennak kadi?” ngimmato ti boses ti naawagan. “Siak ti kangatuan a polis iti pagilian sa innak sadiay?”

“S-sorry, sir...”

“Ngem inkayo man ketdi padasen.”

“Yes, sir.” Napaisem ni Edwin iti panagkambio ti kasarsaritana. Awanen ti unget iti timek daytoy. “Over and out, sir...”

Ibaba koman ni Edwin ti selponna ngem apagisu nga aguni manen ti hepe.

“PO2 Castillo... para kadata laeng daytoy, wen? Yal-alaandak met idiay ket. Diak laeng mapmapan ta naalas met a kitaen...” Nagkatawa.

Nagkawata met ni Edwin.

“Ipalagipko laeng a dagiti pinaaramidko ken dagiti naammuam, awan ti rumbeng a makaammo uray ania ti mapaspasamak.”

“Yes, sir. Loud and clear.”

“Laglagipem a no maammuan ti publiko daytoy, mabalin a papatayka, wenno sabali ti mangpapatay kenka, tapno laeng masalakniban ti pagilian. Nalawag?”

“Yes, sir. My word is my honor...”

Ket pinanawan da Edwin ti lamlamuten pay laeng iti apuy a nadadael a pagtaengan ni Jerky.

SAAN nga aggunggunay ti nakapakleb a bagi a silsilnagan dagiti sumagmamano a sumsumged pay laeng a paset ti naipinas a balay. Makirinrinnimbaw ti kanta dagiti mangrabrabii iti garakgak ti apuy. Malaksid kadagita, nakataltalinaayen ti aglawlaw. Uray no apagbassit koma laeng a palayupoy, napaidam pay.

Madamdama bassit, naggunay ti nakapakleb a bagi. Nagkuti ti tangan ti imana, sa ti pattungagan sa ti kikit. Di nagbayag, naggunay ti dapanna— immuna ti kanawan, sa ti kanigid. Sa nagareng-eng. Immangad. Nagmulagat. Naipasabat kenkuana ti asuk. Naguyek. Nagdata sa inarikapna ti bagbagina. Nayusong dagiti ramayna iti naribkas a polo shirt-na. Ngem intuloyna nga inarikap ti bagina. Timmakder. Mariknana, awan natukkol a tultulangna.

Liningayna ti nagbalinen a rurog a balay. Pagam-ammuan, adda nalagipna. Ni Daniel! Impalawlawna ti panagkitana. Malaksid iti anaraar ti matmatayen nga apuy ti maur-uram a balay, awan ti makitana.

“Daniel! Daniel!” inyawagna. Inruarna ti selponna ket inusarna daytoy a pannaka-flashlight-na. Impaturongna ti silaw kadagiti nasamek a mulmula. Agingga a nakitana ni Daniel a nakadata. Daradara. Narayray-ab ti polona. Nagadu a garumiad ti rupana.

Nagparintumeng iti sibay ni Daniel. “Daniel... Daniel...” kinunana idinto a taptapikenna ti rupa daytoy. Ammona a sibibiag ni Daniel ta aggunggunay ti barukong daytoy.

Nagmulagat ni Daniel. Kasla masmasdaaw a nangmatmat ken ni John.

“Ania ti napasamak?” sinaludsodna a masmasdaaw. “Timmapuakta iti balkonahe...”

Nagkuretret ti muging ni Daniel sa imbakalna ti panagkitana iti nadadael a balay. Malagipnan ti napasamak. Immanges iti nauneg sa kinuna: “Saanda nga agang-angaw dagitoy...”

Nagtung-ed ni John. “Ngem uray data... Kabaelam ti lumaban?”

Nagngirsi ni Daniel. “Pinapatayda ti pamiliak...”

Narikna ni John ti pait a naibinggas kadagiti balikas ni Daniel.

“Gubat daytoy, manong, tulongannak man ken saan.”

Nagtungtung-ed ni John. “Itedta ti sapsapulenda, gayyem. Uray no asinoda.”

Nakalansa pay laeng dagiti mata ni Daniel iti dimmapon a balay. Ammona, dimmapo metten ni Jerky.

“Ania ti planom iti pamiliam? Ipumponta ida, a...” insabali ni John ti saritaan.

Nagwingiwing ni Daniel. “Bay-ak lattan dagiti pannakabagi ti linteg wenno ti gobierno a mangeddeng iti dayta. Narigaten nga agsubliak idiay balay. Naimimbag nga ipapanda a natayak metten...”

“Dayta ti pampanunotek,” inyanamong ni John. “Bayam a panunotenda a nataytan. Agpaknita pay laeng. Aggunayta laeng iti rabii. Ammuenta ti kinasiasino dagiti naggandat a mangpapatay kadata agraman ti nagbilin... uray no addan pamalpalatpatak no asino...”

“Am-ammok ti dadaulo dagiti hired killer. Singirek iti katukad ti inaramidna kadagiti agiinak.”

“Sabali laeng ti bunggoy a nanggandat met a mangpapatay kaniak. Panagkunak, Intsik.”

Nagmulagat ni Daniel, “Apay, adda atrasom kadagiti Intsik? Wenno binayadan laeng ti CIA ida?”

“Dayta ti kayatko a maammuan.”

MAKASINGSINGKIT nga agngayngayemngem ni Deputy Hutchison. Di makatalna. Pagna a pagna iti bukodna nga opisina. Itay pay a nakayapput ti selponna iti lapayagna ta ur-urayenna a sumungbat ti maysa kadagiti matalekna a taona a kameng ti Death Squad. Nakapaminliman a nagkiriring ngem awan ti sumungbat. Madamdama pay, nagturongen iti voice mail ti awagna. Pinutedna ti awagna. Dina kayat ti mangibati iti mensahe.

Nagtanabutob. Makasuron. Katugtugawna pay laeng a kas Deputy, agsasallupangen dagiti pakarikutanna. Saan met ngarud a mainaig iti naipakumit kenkuana a pagrebbengan kas Deputy Director iti Global, Anti-Terrorist Division no di ket nagbalinen a para dalus kadagiti illegal nga inaramidda.

Naparasaw manen. Adda panagkedkedna iti daytoy nga aramid. Ngem agpeggad ti masakbayanda. Kas kadagiti padana a nairaman iti daytoy a black ops, saanna met a kayat a madadael ti dayawna. Nasken a salaknibanna uray kaipapananna ti panaggastona iti dakkel a gatad.

Indayalna manen ti numero nga inawaganna itay. Nagkiriring iti namindua sa adda simmungbat.

“Delta Squad, what can we do for you, sir?” Limmukay ti aangsan ti lakay. “Assemble your man, Delta. You have a mission to accomplish.”

“Right on, sir. Identity... Location... Priority...”

“It’s a Code Red, Delta... it’s a number one priority. I’ll transmit the information in an encrypted mode... And this info has to be safeguarded, do you copy?”

“Loud and clear, sir. Consider it done. And I’ll deploy our people ASAP...”

SAAN a makatalna ni Craig Stewart. Nakatartaraki koma iti aruatna a coat and tie ngem inlinged bullet proof vest-na. Saan a makaidna, pagna a pagna iti uneg ti maysa a nadaeg ken dakkel a kuarto. Kasla maang-angsan. Sangkataliawna dagiti dua a naka-coat and tie a dadakkel a lallaki a nakatakder iti sango ti ridaw. Isuda dagiti naited a guardiana. Tallo pay ti nakapuesto iti ruar ti kuarto sa ammona nga adda pay iti lobby ti hotel. Ngem saan nga agtalek kadagitoy. Im-impenna nga isuda ti naimula a mangpapatay kenkuana.

Nakalawlawag ti briefing-da kenkuana. Nga iti panagtestigona iti Senate Intelligence Committee, adu ti mapagurana. Adu ti agbalin a kabusorna. Dadakkel ken nabibileg a tattao nga uray ti nagtipon a sibubukel a puersa ti Federal Bureau of Investigation ken US Marshall, a naka-asssign a security detail-na, saan a makaanay a mangsalaknib kenkuana.

Impanamnama ketdi dagiti dua a federal law enforcement agency ti panangsalaknibda kenkuana. Nga awan ti asino man a makaasideg kenkuana. Nga agtalek kadakuada.

Ngem dina ammo ta saan latta nga agtalek kadakuada. Sabagay, uray ania ti pagpilianna— agtalinaed nga aglemlemmeng lattan wenno agtestigo iti Senate Intelligence Committee— agpadpada a risgado ti biagna. Awanto ti panagtalna ti lubongna.

Napataliaw idi matoktok ti ridaw. Simmirip ti maysa a security detail iti peep hole. Sa nadagdagus nga inlukat daytoy ti ridaw. Simrek ti maysa a natayag ken nabisked a lalaki. Nakacoat and tie. Nadusol ti nakallalasin a paltog iti siketna. Uppat a nababagi met laeng a lallaki ti nangbayabay iti daytoy. Nailasinna a dagus daytoy. Ni Donoteli, Assistant Special Agent In-charge ti Federal Bureau of Investigation, Langley.

“Good morning, Mr. Stewart...” impasungad ni ASAC Donoteli.

“Good morning, sir,” insungbat ni Agent Stewart. Dina ninamnama ti isasangpet ti Assistant Special Agent In-charge ti FBI.

“Are you ready?”

Immanges iti nauneg ni Agent Stewart sa nagtung-ed. “Worried?”

“Very much, sir.” Impalawlawna ti panagkitana. Immisem ni ASAC Donoteli sa sinallabayna ni Agent Stewart. “I know you are... Ngem addakami ditoy... nagtipon a bileg ti FBI ken US Marshall ti mangsalaknib kenka isu a saanka a madanagan. Awan ti makasagid kenka.”

Saan a nakauni ni Agent Stewart. Sinangona ni ASAC Donoteli. “Am I really doing the right thing, sir?”

Nagtung-ed ni ASAC Donoteli. “You are... No napukaw metten ti konsiensiam ket ipalubostay lattan nga aglablabes ti saan a nainkalintegan nga aramid dagiti nangangato a turayen ti ( Maituloy iti bangir a panid )

pagiliantayo, sadino ti pagtungpalantayo? We are a decent people, Agent Stewart. Saantay nga usaren a rason ti national security tapno biangantayo ti sabali a pagilian. You are doing the right thing and we are on your side.” “Saandanto a mamingga agingga a didak mapapatay.”

“We are here... trust us...”

Nagsennaay ni Agent Stewart. “I trust you you, sir. But do you trust me, too?”

“Of course we do. Isu nga ar-aramidenmi ti amin a kabaelanmi a mangprotektar kenka.”

“Then give me a weapon.”

Nagwingiwing ti ASAC. “Sorry, agent, but you are temporarily suspended from carrying a gun. You know your agency is trying to discredit your credibility as much as possible. Ania man a sangkabassit a paglabsingam, makaanayen nga usarenda tapno pagduaduaandaka ti Senado ken ti publiko. Italekmo kadakami ti seguridadmo.”

“Diak laeng kayat nga adda dakes a mapasamak kaniak nga awan man laeng ti labanko.”

“Agtalekka kadakami.”

Sininga ida ti radio transmission.

“Delta to Tango, Delta to Tango, the convoy is here, sir...” “Copy that, Delta...” insungbat ti ASAC. “Has there been a swept on the perimeters... All sorrounding tall buildings checked?”

“That’s a 10-4, Tango. All clear...”

Nagturong ni ASAC Donoteli iti dakkel a sarming a tawa. Kinitana dagiti natatayag a pasdek iti sango ti hotel. Nakitana ti dua a helikopter a namarkaan iti US Marshall nga agamampayag. Kayatna a pasimbengen ti riknana ngem dina ammo no apay a madandanagan latta. Gapu ngata iti naawatna nga awag idi rabii?

Dina am-ammo ti immawag, ngem kuna daytoy a maysa a nabileg a tao. Binallaagan daytoy a saan a makibiang iti pannakasalaknib ni Agent Stewart. A no ituloyna ti personal a panggepna a mangsalaknib iti traidor nga ahente, adda dakes a mapasamak kenkuana.

Nabayagen nga awan ti nangipangta iti biagna. Kadagidi laeng panawen a nairaman kadagiti kaso ni John Villa. Ngem idi maital-o ti posisionna, nagbalinen a natalna ti biagna. Agingga ita.

Gapu iti daytoy inawaganda iti traidor a CIA.

Asino ti patienna? Daytoy nga agkabannuag wenno dagiti nangangato a turayen ti CIA ken ti nangipangta kenkuana iti telepono?

Minatmatanna ti agkabannuag. Awan pagilasinanna nga agparparnuay laeng daytoy kadagiti pammabasolna.

Kinitana dagiti uppat a badigardna ken dagiti dua pay a security detail.

“Are you ready?” kinunana.

Immasideg ti kadakkelan a badigardna. “Are you sure you want to do this, sir?” inyarasaas daytoy. “Napeggad unay daytoy. Kabaelanmin daytoy. Imonitornakami lattan iti opisinam. ”

Nagwingiwing ni ASAC Donoteli. “I got this, Agent... I’m fine,” insungbatna. Ngem pagammuan la ta nasilud dagiti matana iti gilap manipud iti tawa a naggapu iti maysa a natayag a pasdek iti sangoda.

Kellaat, nabtak ti napuskol a sarming ti tawa. Limmagto ni ASAC Donoteli a nanggammat ken ni Agent Stewart. (Maituloyto)