Angkel Dok (13)

Simgar ni Lakay Lito. Maikapat a pulo nga aldaw ita ti ipupusay ni Baket Eliza. “N-ni Manang Eliza! Baka sarungkaranna ni bayaw!” nagtigerger ti timekna.

Ti Napalabas: Nagawid ni Angkel Dok, 75, iti Simbaluca tapno mangasawa. Inikkan ni Jigo a kaanakanna iti pagpilian. Karaman ditoy da Angel ken Eula. Ngem ken ni Manang Tina a kabsatna, ni Ma’am Elaine ti kayatna a para kenkuana. Natakuatanna a nalaing pay laeng nga agilut iti maiddalan. Nangipaskil ni Jigo iti karatula ket immadu ti agpapailut kenkuana. Maysa kadakuada ni Ma’am Elaine. Kayat ni Manang Tina nga armen ni Angkel Dok ni Ma’am Elaine, ngem naituonen ti imatang ni Angkel Dok ken ni Angel aglalo ket kiniddaw ni Angel nga agbalin nga iskolarna. Iti naminsan a panagkitada, inderetso ni Angel iti department store ket nagala kadagiti aruatenna a ni Angkel Dok ti nangbayad. Inkeddeng ni Angkel Dok a lipatennan ni Angel. Pinasiarda ken Jigo ni Eula ngem adda met gayamen nobio daytoy. Pinasiar ida da Kasin Lucia. Nakayawan ni Angkel Dok ken ni Lynlin ng anak ni Kasin Lucia.

A(Maika-13 a Paset)

GSAPA ti Sabado. Nadlawen ni Manang Tina a saan a makaidna ni Angkel Dok sakbay a mamigatda. Agasem, maraisem, pirpiritenna ti barbasna sa kasla agpaspasiar iti kannag nga agturong iti ruangan. Rummuar, kumita iti kanigid ken kanawan sa sumrek manen ket agsubli iti kadaklan. Saan nga agbayag, mapan manen iti ruangan.

Itay damo, impapan ni Manang Tina a mangwatwat ti kabagisna ta saan a nakapuot itay alas singko. Ruam ngamin ti kabagisna ti bumangon iti kasta nga oras ket unorenna ti barangay road tapno agpaling-et.

Ngem nalabaanen ni Manang Tina dagiti pagpunasan ken pagpigadan, di pay nagsardeng ni Angkel Dok. Ita, maisalapayna man aminen a linabaanna, addayta pay laeng ti kabagisna a pagna a pagna. Isu nga idi maisalapayna ti maudi a linabaanna, saanen a nakateppel ni Manang Tina. Sinarunona ni Angkel Dok idi sumrek daytoy iti terasa.

“Adda problemam, manong? Itay pay a dika makatalna,” kinuna ni Manang Tina.

Immanges iti dakkel ni Angkel Dok. “Awan. Ngem diak ammo ta kasla madandanaganak. Adda pay koma ngarud pangawisak ken ni Jigo.” Miningmingan ni Manang Tina ti kabsatna. “Saan met la a nasakit ‘ta teltelmo?” sinaludsodna. Napanunotna ngamin nga amangan no nangato ti presion ni Angkel Dok. “Numona ket awan ita ti doktorda dita ili.”

“Saan met. No apay ketdi a kastoy ti marikriknak. Awan met ti pampanunotek a problema.”

“Awisem ni Jigo? Papananyo?”

Immisem ni Angkel Dok. “Pasiarenmi koma ni Kasin Lucia dita Buguey,” insungbat ni Angkel Dok.

Nagatap ni Manang Tina. “Ni Kasin Lucia wenno ni Lynlin?” inyayugna. “Sika met, brader, nagubing la unay! Ngem awan met la ti sabali a marikriknam no di dayta panagtibtibbayom?”

Nagkatawa ni Angkel Dok. “Awan, sis. Adda pagpapukisan dita ili?” sinabalianna ti topiko.

Ni Manang Tina met ti nagkatawa. Kinitana ti tuktok ti kabsatna. “Ayna, kabagis, ania koma pay ti papukisam ket maibus payen ti buokmo!”

Nagkatawa met ni Angkel Dok. Inaprosanna ti sumilsileng

a tuktokna. No apay ketdi nga in-inut a rimmasay ti buokna idi paatiddogenna ti bigote ken barbasna. “Daytoy ti papukisak, kabagis!” kinunana ket inaprosanna ti naraber a barbasna a manggapu metten a maisapaw iti uban.

“Awan pay ti nakitak a barberia dita ili, manong. Barberia iti parparaangan ken rabaw ti alsong a kas iti Simbaluca, wen, adu!” inkatawa ni Manang Tina. “Saan met ngarud nga aldaw ti Domingo ita ta mapanka koma lattan dita paraangan da Santos! Libre payen ti broadcast iti latest a damdamag no kua!”

Natukay dagiti agkabsat idi adda agbosina iti batogda. Ni Jigo gayam.

“Nasayaat ta immayka,” kinuna ni Manang Tina. “Inka man kasarita ni Santos ta pukisanna ni lolom!”

“Sunday ti pukis day ditoy Simbaluca, lola!” inkatawa ni Jigo. “Adda papananta!” Kiniddayan ni Angkel Dok ni Jigo. Pinerreng ni Jigo ni Angkel Dok sa kinitana ni Manang Tina. Inseniasna ti inkuentasna a selponna. Naawatan met ni Angkel Dok. Adda kabarbaro a video nga ipakita ni Jigo. Pagpiaanna, pinanawan met idan ni Manang Tina.

“Saantan a masapul dayta no kaskasano!” inkidday ni Angkel Dok ken ni Jigo sa sinallabayna ti agtutubo nga inturong iti sopa. “Mapanta dita Buguey no malem!”

“Adda pasken da Lola Lucia?”

Nagkatawa ni Angkel Dok. Nagngilangil. “Nasarakakon ti sapsapulek, apok. Mapanta pasiaren! Isu ti asawaek!”

Nagnganga ni Jigo. “Girlfriend-mon, ‘lo? Nasiglatka met gayam!”

“Armekon no malem!”

Indumog ni Jigo ti isemna.

Timmakder ni Angkel Dok. “Kuyogennak nga agpapukis ken ni Santos!” kinunana.

Ngem husto la unay ti kinuna ni Jigo. Domingo laeng ti ‘pukis day’ iti sirok ti dalligan. Dida nadanon ni Lakay Santos ta napanna kano linimpia ti pagbunubonanna. Ania ngarud, naibayag ni Angkel Dok iti sango ti sarming idi agrubuat gapu iti panangurnosna iti barbasna. Nagpataray pay ken ni Jigo iti baby oil dita Palagao tapno natultulok nga urnosenna ti barbasna.

Nakarubuaten ni Angkel Dok idi dagasen ni Jigo. Saanna koma a kayat ti makilubbon iti motorsiklo ngem adda nangarkila ken ni Celing.

“Atiwmo pay ti adu nga agtutubo, kabagis!” kinuna ni Manang Tina a makais-isem a mangsirsirig iti kabagisna.

“Baro, kunam man, kabagis!” inkatawa met ni Angkel Dok. Kasano ngamin ket nagaruat ni Angkel Dok iti nakipet a lumabaga a polo nga inasmanganna iti pangipeten met laeng a maong a pantalon. Puraw ti sapatosna a goma. Ket iti panagturongna iti ridaw, impal-idna ti ayamuom ti Tommy a bangbanglona ket ad-addan ti isem ni Manang Tina.

Ngem idi rummuar koman iti gate, nariknana manen a kasla pimmardas ti bitek ti barukongna. Nagsarimadeng.

Nadlaw ti Manang Tina. “Apay, manong?” kinunana. “Ania a talaga ti marikriknam? Saankay’ la koman nga agtuloy no madi ti marikriknam. Wenno partaan. Numona ket agmotorkayo.”

“Saan met a kas idiay Manila nga agsasallupang ti lugan,” insungbat ni Angkel Dok. Insuotna ti maysa a helmet a para iti backrider sa simmalpa iti likudan ni Jigo.

Nakaan-annayas ti panagpataray ni Jigo ket naidilig manen ni Angkel Dok ti kasasaadda idi agtutuboda. Tambak dagiti sinilong ken alubid ti irigasion ti kakaisuna a dalanda a rummuar ken sumrek iti Simbaluca. Nakagalgalis no tiempo ti tudo. Pudno, namaga ti tambak no nalpasen ti nepnep ngem kaskasdi nga isalapaymo ti pantalonmo iti abagam saagpantalon kanto no makadanonka iti highway. No saan, maslep agingga iti tumeng ti pantalonmo gapu iti linnaaw kadagiti ruot iti igid ti tambak.

Ad-addan ti annayas ti tarayda idi agpalauddan iti highway. Madamdama pay, addadan iti Maddalero, maysa kadagiti kadakkelan a barangay ti Buguey. Iti di nagbayag, simminadan iti highway ket unorendan ti agpaamianan a kalsada a nangbisngay iti sangapayakyakan a taltalon. Sa madamdama manen, ballasiwendan ti kongkreto a rangtay a nangdangan iti nalawa ngem kasla matmaturog a karayan.

“Gumatangta iti sabong. Yan ti flower shop ditoy?” kinuna ni Angkel Dok idi maballasiwda ti rangtay.

“Awan ti flower shop ditoy, ‘lo,” insungbat ni Jigo a bulonna a nagmenor sa nangisekkad kadagiti dapanna. “Gumatangta laengen iti kankanen no pasarabom ti pampanunotem.”

Ngem awan ti nasarakanda nga aglako iti cake. Gapu itoy, gimmatangda laengen iti bibingka a diket iti maysa a baket nga agisursursor. Pinabungonda sa insupotda iti plastik.

“Yan ti opisinada?” kinuna ni Angkel Dok.

“Kuna ni Manong Reybac itay nagpatangkami nga agpakanigid no maballasiw ti rangtay. Awan pay dua gasut a metro, makitamon ti opisina dagiti senior citizen iti kanigid,” insungbat ni Jigo.

Pudno, apaglabesda iti sakaanan ti rangtay, addaytan ti maysa kadsaaran a pasdek nga opisina dagiti senior citizen ti Buguey.