Naluomak Kadin a Bulong?
Idi malem-kalman iti panagsammakedko iti barandilias ti lanai, nasiputak ti pannakatnag ti naluom a bulong ti gayubano iti panangdupir ti angin ti Enero manipud iti Waiehu Bay.
Saan laeng nga ita; uray idi kanikadua, dagiti met amarilio a bulong ti mangga ken kayumanggi a palatang dagiti niog ti nanarpaak iti daga... Nagtigergerak iti panangamirisko: Iti no manon nga Enero a simmangbay ken pimmanaw, iti no manon a dulluog ken kimat a simmarungkar iti biagko, naluomak kadi metten a bulong?
Nalabsak kadin ti pategko?
Kayatko pay a daliasaten ti kasla awan patinggana a kapanagan ti Haleakala Crater, ti mangsay-up kadagiti apagbukar a sabong dagiti silverswords, dagiti nakapurpuraw a busel dagiti atap nga orkidia iti rain forest ti Makawao, ti ag-night camping iti nude beach iti Makena, ti agpisawpisaw iti nasin-aw nga ubbog ti Seven Sacred Falls, ti maturog pay maminsan iti Spreckelsville, ti kampo dagiti sakada a nangpasangbay, a nangapungol, a nangdungdungngo kaniak iti kinaagtutubok iti kaunasan...
Kayatko pay ti umay umagek maminsan iti daga a nakaikalian ti kadkaduak, a nangsarukang iti panagdakkelko, a nagrusingan ti umuna nga ayat nga ininaw ken impasngay ti parbangon ti Teppang, ngem kinettel ti dakes nga apal a nakatayak, nga iti panagkunak, pimmusayak! Adda saem, ngem sarungkarak ti sabangan ti Calioet a nakaablan dagiti arapaap, dagiti katkatawa iti panagsinnayyo iti kumagat-lamiisna a danum, iti panagwidawid iti pagattengngedna nga allon; ti itatakdang iti sapaw a nagraipan ti lasag, ti kararua a nakaibuksilan ti pammasingked nga iti uray kaano man dinto agkupas ti pammateg.
Awan man laeng ti panangipagarup nga iti apagkanito, sul-ogen ti agkaradap, ti agpatengnga nga agus ti taaw...
Malem manen ditoy Makiki Street iti Waiehu Heights.
Iti panagsammakedko iti barandilias ti lanai, adda kansion iti panangindayon ti pul-oy iti natnag a naluom a bulong ti alukon. Iti nagdissuanna, adda nakabalbaludbod ti rusingna a lemon. Awanen ti saligemgem.
Itay agligsay, “Could you and Mom come, Dad? Tres missed you and your bedtime stories,” inteks ni Christopher John, ti buridek a kaing-ingas latta daydi tatang.