Saan a Nagpaudi ni Janella ken ni Maricel
SABONG ti dila dagiti agbuybuya ti pelikula a “The Heiress” a pagbidaan da Maricel Soriano ken Janella Salvador. Improdius daytoy ti Regal Films ken indirehe ni Frasco Mortiz.
Napalalo ti panangdayaw dagiti nakabuya ken ni Diamond Star ta nupay sumagmamano a tawen a nagsardeng nga agaramid iti pelikula, saan a naglumen ti laingna iti akting.
Iti sabali a bangir, kas suporta ni Markus Paterson ken ni Janella, napan met nagbuya daytoy iti premiere night ti pelikula.
Ni Markus ti maatap a nobio ni Janella. ‘Maatap’ ta saan met nga inako ni Janella a nobiona ni Markus. Kuna ketdi ni Janella nga ibagananto ti pudno, inton nakasaganadan ken Markus.
Kasta met a dimmaw-as iti premiere night da Maja Salvador ken ti nobiona a ni Rambo Nuñez. ‘Dimmaw-as’ ta saan a lineppas da Maja ken Rambo ti nagbuya. Gayam, saan a nabaelan ni Maja dagiti makaparurusok nga eksena ti pelikula. Maipapan ngamin daytoy iti ‘barang’ wenno gamud kadatayo nga Ilokano.
Nagyaman ketdi latta ni Janella iti ipapan da Maja. Malaksid nga agikit dagitoy, agkaduada pay iti teleserye a “The Killer Bride.”
Saan met a nakababain iti biang ni Janella iti ikitna a ni Maja ta napintas ti akting nga impakitana iti nasao a pelikula. Ay, saan a nagpaatiw iti innaktingan ken ni Maricel.
* * * Napagsasaritaan met laengen ti maipapan kadagiti nakabutbuteng a pelikula, madakamatmi man a ti dokumentario a pelikula nga “Aswang” nga indirehe ken improdius ni Alyx Ayn Arumpac, nairaman kadagiti 12 nga entry iti International Documentary Film Festival Amsterdam (IDFA) Competition for First Appearance 2019 iti Netherlands. Kalabanna dagiti pelikula a naggapu iti Spain, Russia, Qatar, Denmark, Brazil, Poland, China, UK, Serbia, Croatia, Colombia ken Georgia. Iti tawenna a 32, ti IDFA ti ‘Cannes’ iti lubong ti documentary filmmaking.
Segun ken ni Alyx, soldout ti dua nga screening ti “Aswang” iti Amsterdam.—O