Ading Kosinera
IBURAYMI man ti sabali pay a resipe ti kankanen a parnuay dagiti agad-adal a kameng ti Grade 8-Excellence ti Ilocos Norte Agricultural College (INAC), Pasuquin, Ilocos Norte nga insalipda iti salip iti panagluto iti kallabes a Farmers’ Field Day a naisayangkat iti pagadalanda (INAC) a nangyalatanda iti Maikatlo a Gunggona.
Cheessy Yema Rice Cake Dagiti Ramen:
Diket a bagas, 2 kg
Getta ti niog, 2 tasa
Nestle Cream, 2 pakete Gatas kondensada, 1 lata a dakkel Sesame seeds, 1 pakete
Eden cheese, maysa
Panangisagana: 1.
Apuyen ti diket. Linayen a nasayaat.
2. Lutuen met ti sesame seeds agingga nga ag-golden brown.
3. Pespesen met ti getta ti niog kabayatan a malutluto ti diket.
4. Mangala iti sabali a paglutuan. Ipaburek agingga nga agladek daytoy.
5. No medio nagladeken, inayon ti Nestle cream ken gatas kondensada.
6. No nalinayen a nasayaat ti diket, mangala iti tray ken ipinas a nasayaat.
7. No naluton ti sauce/ syrup, mabalinen nga iparabaw iti napinas a diket. Iraman nga iwarakiwak ti nagadgad a cheese ken sesame seeds.
8. Mabalinen nga idasar.
* * * PANANGATUR: Iti resipe ti kankanen a “Binagkat” (Dis. 1-15, 2019 a bilang), nariruanmi nga inlanad ti ½ tasa nga asin kadagiti ramen. Ti rumbeng, ½ kutsarita. Inyalat ti nasao a kankanen ti Umuna a Gunggona iti salip iti panagluto iti 2019 Farmers’ Field Day iti INAC Karaman iti grupo a nangisagana iti kankanen da Neil Christian B. De la Cruz, January P. Valdez, Karla Cristine Fe D. Aguilar, Grace S. Failano, Jenedy S. Garcia, Geraldine Mateo, Keith Glaiza Minas, ken Danica Valdez. Adviser-da ni Mr. Oscar S. Bugaoisan. Agpapadispensarkami kadagiti nainaganan iti ngato aglalo kadagiti readers ti Bannawag gapu iti nasao a riro.
* * *
Padasentayo man met ti agluto iti Shanghai Rice. Inadawtayo ti resipe ti Shanghari Rice iti Rice-Based Food Products Recipes nga inaramid ti Philippine Rice Research Institute (PhilRice). Ti PhilRice ti mangisaysayangkat kadagiti nagduduma a panagsukisok ken pannakaiwaras dagiti nagduduma nga impormasion ken teknolohia para iti pannapasayaat ti apit a pagay iti pagilian; iti kasta, manamnama a maaddaantayo iti umdas a suplay a bagas.
Shanghai Rice Dagiti Ramen:
Glutinous rice, 80 g Bawang, nadekdek, ½ kutsarita Nagiling a karne ti baboy, 160 g Sibuyas, nagalip, 1 kutsara Asin, ½ kutsarita Manteka, 2 kutsara Pimienta, ¼ kutsarita Manteka a pagprito, 1 tasa Lumpia wrapper, 20 pedaso
Panangisagana:
1. Lutuen ti glutinous rice (diket a bagas). Ipaigid iti apagapaman no maluto.
2. Gisaren ti bawang ken sibuyas.
3. Inayon ti nagiling a karne, asin ken pimienta. Lutuen agingga nga ag-golden brown. Ikkaten ti sobra a manteka.
4. Paglaoken ti nagiling a karne ken innapuy a diket iti dakkel a malukong.
5. Mangala iti sangakutsara a mixture. Ikabil iti lumpia wrapper. Bungonen a nasayaat.
6. Prituen (deep fry).—O
4 ti nangabak iti Cabie PINILI
Uppat nga agad-adal iti hayskul iti Pinili, Ilocos Norte ti nangabak iti 11th Prof. Honor Blanco Cabie Essay Writing competition a nairusat idi Agosto a para kadagiti agad-adal iti Pinili Institute, Pinili National High School, ken Sacritan Integrated School.
Dagiti nangabak, kas innaganan ti Cabie PINILI (Premio Iti Naisurat Iti Literatura Ilokana Wenno Ingles) Secretariat: Christian Britany Barroga, Pinili National High School, 1st; Jolina Espiritu, Sacritan Integrated School, 2nd; Shanel Jay Aguinaldo, Pinili National High School, 3rd; ken Mark Angelo Perez, Pinili Institute, consolation prize.
Pinangabak ni Barroga, editor in chief ti The Dawn, ti “Scars of Yesterday: Pinili’s Celebration of Grandeur for Today and Tomorrow”; ni Espiritu ti “Pinili Infused with Love, Dedication and History: Soaring High”; ni Aguinaldo ti “A Tale of Metamorphosis”; ken ni Perez ti “Pinili: Soaring High Into The Post Centennial Rollover.”
Awatendanto ti premioda manipud iti Cabie PINILI Awards for Literature ken sertipiko manipud iti Pinili Local Government Unit inton Abril 2020 iti panangrambak daytoy nga ili iti maika-100 a tawen ti pannakaipasdekna, kas kinuna ni Evangeline Abriol-Pascua, coordinator ti Cabie PINILI iti Pinili, I.N..
Naiwayat ti nasao a salip babaen ti pannakitinnulong ti Pinili LGU nga idauluan da Mayor Rommel Labasan ken Vice Mayor Mayo Bumanglag.
Naiputan dagiti naisalip a salaysay iti tema ti panangrambak ti ili iti maika-100 a panagtawenna: “Pinili 2020: Panangipateg ken Panangitandudo iti Naindaklan a Gapuanan, Puersa iti Masakbayan.”
Dagiti hurado: Dr. Paul Blanco Zafaralla, dati nga art critic in residence ti University of the Philippines System ken agnaed iti UP Los Baños (chairman); Mr. Jimbo Owen Gulle, city editor ti Manila Standard; ken Dr. Carmelita B. Bagayas, prinsipal ti Paoay North Institute.
Naipanagan daytoy a pasalip ken ni Honor Blanco Cabie, mangisursuro iti panagiwarnak, literatura ken Asian Civilization iti Metro Manila. Immuna a nairusat daytoy idi 2008 tapno maengganio dagiti mannurat nga Ilokano a mangikur-it iti gameng ken kinabaknang ti bukodda a kannawidan.
Daytoy ti umuna a gundaway a naluktan ti Cabie PINILI para kadagiti agad-adal iti hayskul iti ilina. Kadagiti napalpalabas a tawen, naluktan ti salip iti sarita ken daniw para kadagiti propesional a mannurat nga Ilokano.
Nagbalin ti Pinili a maika-17 nga ili ti Ilocos Norte babaen ti Orden Ehekutibo ni Gobernador Heneral Francis Burton Harrison idi maika-1 ti Enero 1920. (Maria Rosa A. Cabie)