Ti Gasatmo
CAPRICORN (Disiembre 21- Enero 19). Magupugop ita ti pamanunotan ti amin a kameng ti pamilia para iti adda dagdagsenna a pangngeddeng. Mapagkurri ti utek kasta met a mapaatiddog ti pawayway ti puso. Mapagnunumuan a maaddaan ti pamilia iti para iwardas maipanggep iti kuarta tapno makainut. Agsuerte iti maysa a panguartaan a mainaig ti sibubukel a kaamaan. Nagasat a numero: 2, 4, 9.
AQUARIUS (Enero 20- Pebrero 19). Maibanag ti planom maipanggep iti panagin-inut iti amin a paggastosan, dakkel man wenno bassit. Adda kadagiti lugar a pagaaduan ti sapsapulen a suerte. Masurnadan met ti taeng ti pammati ket adda masakdo a kapanunotan a mamagbaliw iti panirigan a no maipakat, tawingenna ni parabur. Nagasat a numero: 1, 5, 8.
PISCES (Pebrero 20- Marso 20). Iti panangaklon a ti kinamanagparabur, isu metten ti mismo a gunggona, ad-adda pay a nasamsam-it ti agsubli kenka a parabur babaen ti panagyaman dagiti mairanud. Maliklikan ti pannakaadas ti puonan iti sugpon a negosio babaen ti madagdagus a panagsaoyo ken ti kasosiom. Nalaklaka ti umaddang gapu iti panagtutugmok dagiti kapanunotanyo nga agkakadua. Nagasat a numero: 2, 6, 7.
ARIES (Marso 21- Abril 20). Natalinaay ita ti aglawlaw gapu iti panangrisut a dagus kadagiti babassit a susik. Agbalin a nawadwad ti linaon ti bolsa a dimo mapupuotan, maur-urnong dagiti babassit a sensilio a nasarimutmot iti kallabes. Naynay a malaglagipmo nga iti amin a tiempo, agpapada ti panangtratom kadagiti adda iti aglawlawmo, nabaknang man wenno napaidaman iti grasia. Nagasat a numero: 3, 4, 8.
TAURUS (Abril 21- Mayo 20). Adda oportunidad nga agtoktok iti ridaw; luktan a dagus. Agbalinka a gubuayan ti kinanakem para kadagiti tattao a mangtangtangad kenka. Napintas a lawas a panagpirma iti papeles, panagsapul iti trabaho, wenno kaayan-ayat. Nagasat a numero: 1, 5, 9.
GEMINI (Mayo 21- Hunio 20). Umno unay daytoy apagsagpat ti tawen a panangyetnagmo iti maysa a pangngeddeng no ania ti kayat iti agdama ken para iti mabayag a tiempo. Maipalagip ti kuna ti maysa a kanta nga ababa laeng ti biag. Paragsaken dagiti nasken a paragsaken; aramiden dagiti nasken nga aramiden. Nagasat a numero: 3, 4, 7.
CANCER (Hunio 21- Hulio 20). Maipaayanka iti tiempo tapno matingitingmo no ania ti nasken nga ipangrunam iti agdama ken kadagiti masungad a lawas. Laglagipen a basta nalag-an ti rikna iti araramiden, naamo ti gasat ken agraman ti pannakasapul iti kaliwanliwa. Nagasat a numero: 2, 5, 8.
LEO (Hulio 21- Agosto 20). Adda dagiti pasamak a mabalin nga ibilang ti sabali a kas tubeng ngem para kenka, maysa a pangtenneb iti kabaelam. Panagsagana daytoy iti yaay kenka ti dakdakkel ken nadagdagsen a responsibilidad a no la ketdi usarem ti kinaimbag ken kabaelam, laklakaem a sarangten. Nagasat a numero: 1, 6, 9.
VIRGO (Agosto 21- Septiembre 22). Ti panagbalin a napudno iti agdama a trabaho ken iti kaayan-ayat, agbunga iti naruay a parabur. Mamatika a nakadaya iti sangom dagiti kasusudian a taraon ket saanmon a malagip pay ti tumaliaw iti sabali wenno marikna nga adda kurangna. Nagasat a numero: 2, 4, 7.
LIBRA (Septiembre 23- Oktubre 22). Tiempo ti panangbigbig kadagiti tattao a makaanus kenka. Kabaelam ida ita a paragsaken iti sangkabassit a kabaelam nangruna ket saanda met a mangnamnama iti dakkel kenka. Nagasat a lawas a panangirugi iti pamastrekan. Nagasat a numero: 1, 6, 8.
SCORPIO (Oktubre 23- Nobiembre 22). Saan a makadkadan ti kaham ngem makatulong kenka ti panangilakom kadagiti gamigam a saanmon a kasapulan ngem adda pategna iti sabali a tao. Matun-oyam ti inana a kalkalikagumam. Nagasat a numero: 3, 5, 9.
SAGITTARIUS (Nobiembre 23- Disiembre 20). Tiempo ita ti panangipinget iti ammo nga umno. Mairana met nga addaka iti situasion a sika ti kasiglatan. Agannad ketdi a saanka a malmes iti sangsangabaso a balligi. Nasaysayaat no dagiti ad-adu ti ammona ti kalangenmo ita tapno makasakdona iti mabalin a mangbaliw iti turong ti biagmo—para iti pagsayaatam. Nagasat a numero: 2, 6, 7.