Panangimaton iti Pagtaengan

NO mapaliiw a narigat a lumned ti danum iti lababo, saan a dagdagus a mangayab iti tubero a mangtarimaan.

Padasen pay nga aramiden dagiti sumaganad a pamuspusan ta mabalin a makatulong dagitoy.

Umuna a padasen a sibugan ti pagayusan ti danum iti agburburek a danum. Karsan ti lababo sa isibug ti sangakaserola a danum iti pagayusan nga abut.

No saan a lumned ti naisibug nga agburburek a danum, palamiisan daytoy, karsan sa sibugan manen iti sabali a napudot a danum.

Mabalin nga ulit-uliten nga aramiden daytoy.

Kitaen pay a naimbag no adda naiselsel a rugit iti mismo a pagayusan ti danum. No saan, mabalin pay a naappelan ti pagruaran ti danum iti ruar ti balay a nasken a dalusan.

Padasen pay ti mangikabil iti kaguduat’ tasa nga asin iti abut a pagayusan ti danum. Bay-an daytoy iti sumagmamno a minuto. Sibugan iti sangakaserola nga agburburek a danum kalpasanna.

No adda baking soda, mangipisok iti abut a pagayusan iti sangatasa sa pasarunuan a sibugan iti puraw a suka a kastoy met laeng ti kaaduna.

Kalpasan ti 15 a minuto, sibugan daytoy iti agburburek a danum.

Mabalin pay a paglaoken ti baking soda ken asin. Ipisok iti pagayusan nga abut sa bay-an nga agtalinaed iti sumagmamano nga oras. Sibugan iti agburburek a danum kalpasanna.

Adda pay magatang a sinankampana a goma a bomba a mabalin nga isullat iti abut a pagayusaan. Maitalmetalmeg daytoy iti abut a pagayusan ti danum.

No adda sabali a tubo a pagayusan a naisilpo iti barado a lababo, sullatan daytoy iti nabasa a rigis tapno napigpigsa ti pannakaiduron ken pannakaikkat ti naisullat a banag.

Maisingasing pay ti pannakadalus iti P-trap tapno maikkat ti naiserra a banag. P-trap ti awag iti nagkurba a tubo a pagayusan ti danum iti sirok ti lababo.

Sakbay a warwaren ti P-trap, mangikabil iti planggana iti sirokna a mangtaya iti agayus a danum ken rugit.

Adda pay dagiti magatgatang a plumber snake. Maikutikot daytoy a barut iti abut a pagayusan.Ngem uray no kasta, ababa laeng ti madanon ti plumber snake.

Mabalin pay nga aramaten ti ordinario a barut a kas iti maararamat a pagsalapayan iti nalabaan a lupot. Pilkuen ti murdong ti barut tapno saan a maisagudasagud iti uneg ti tubo a dalusan.

Annadan pay ti panagaramat ti plumber snake ken ania man a barut ta mabalin a maguradan ti lababo.

Tapno kanayon a nawaya ti pagayusan ti danum iti lababo, kanayonen a sibugan iti baking soda ken suka. Pagtalinaeden pay dagitoy a nasayaat ti angot ti lababo.

Saan pay nga agipaayus kadagiti namanteka a bambanag, butay ti kape, ken dadduma pay a bambanag a mabalin a maisullat iti pagayusan ti danum.

Nasken pay a masibugan ti pagayusan iti adu a danm tunggal aramaten.—O

Immanges iti dakkel ni Boss Toby. Pinagsinnublatna a kinita da Balong ken Ining. Nagsaltek ti panagkitana kaniak. “Agirubuatkayon. Saantayon a lumaban…” kinunana.

Nagminnulagat da Ining ken Balong. Sa kinitada ni Boss Toby.

“Boss…” ti kakaisuna a naibalikas ni Balong. “Saantayon nga ituloy ti lumaban. Binayadakon ti multatayo,” nagtungtung-ed ni Boss Toby. “Ti pudno a mammallot, ammona no kaano a sumardeng. Naabaktayo, ngem inikkannatayo iti gundaway nga agpanunot. Ditay’ ammo ti mapasamak iti laban ni Sikap. Saantayon a makigasanggasat. Nasigsigurado no para ken ni Jakjak ti sumaruno a labantayo!”

“B-boss…!” dandani di simngaw ti boses ni Ining. “Apounayen, bossing!” Narban ti rupa ni Ining. “Agagyamanak, bossing…”

Nadlawko met nga immanges iti dakkel ni Balong ket inawidna ti abaga daytoy. Saan a nagtimek ngem winagwagna ti abaga ni Ining.

Kayatko nga itaraok ti panagdir-ik iti desision ni Boss Toby, ngem kasla adda mangbekbekkel kaniak. Ni Partak ketdi ti nagtaraok iti nakaat-atiddog ket indanggay ni Lasak ti paraw a taraokna. Saanen nga agpaspasgar daytoy.

Madamdama pay bassit, addan da Ate Melba ken ti ipagna. Agkatkatawa ni Ate Melba a nangsallabay ken ni Ining. “Imbagamon, dad?” kinuna ni Ate Melba.

“Wen!” intung-ed ni Boss Toby.

“Ammom, Ining, immay ni boss-mo idiay yanko itay makadesision. Imbagana a nasaysayaat laengen nga agmulta ngem ti makigasanggasattayo pay.”

Dumakkel-bumassit dagiti abut ti agong ni Ining. Marmarba ti rupana a kasla tiptipdenna ti panagsangitna. “Thank you, a-ate,” kinunana.

“Maminsan laeng a mapadasan ti tao ti biag ti kinaagtutubo. Itedtayo dayta ken ni Jakjak,” intungtung-ed manen ni Boss Toby. “Adu pay a pallot ti agur-uray kadatayo. “Ala, agsaganatayon ta intayon. Awagak laengen ti nagtarusantayo ta agpakadaak!”

ADDA nagparikna kaniak. Bigaten. Sinapulko dagiti abut ti kartonko. Pudno, naipasirko ti dapuen a lawag iti ruar. No kuan, agiwes ti luganmi a kagiddato ti panagbalbaliw ti ungor ti makina. No kuan, tumayengteng met a lawag no malabsanmi ti kapuskolan ti angep. Iti akinsango a tugaw, naganaygay ti panagsarsarita da Ining ken Balong.

Nagtaraok da Partak ken Lasak. Nabainanak. Napaludasak ti oras gapu iti pannakailibayko. Iti tugaw iti sanguananmi, nagareng-eng ni Ate Melba a masirsiripko a nakasadag iti abaga ni Boss Toby.

“Yantayon?” kinuna ni Ate Melba.

“Bantay. Asidegtayon iti boundary,” insungbat ni Boss Toby. “Agalmusartayo idiay boundary. Sumingisington ti init,” kinuna met ni Balong.

“Isagsagana itan ni Jakjak ti pagpakanna. Agbasanto manen ti barok!” Anian a sarangsang ti timek ni Ining.

No mano pay a kurba, ken namin-ano pay a panagbaliw ti ungor ti makina ti luganmi. Madamdama pay, nagmenor ken nagpaigid ni Balong. Addakamin iti boundary a kunkuna da bossing.

Dimsaag dagiti amomi. Naglayon ni Ining iti likud ti lugan ket linuktanna ti ridaw. “Lumang-abkayo met iti presko nga angin!” kinunana.

Nagtaraok da Partak ken Lasak. Iti abut ti kartonko, naipasirko nga awanen ti angep ket gumilgilap dagiti bulong iti aglawlaw iti pumirak a raniag ti sumingsingising nga init.—O